ପୁଡୁଚେରୀ, ୯ ଡିସେମ୍ବର (ହି.ସ.)- ମଙ୍ଗଳବାର ଦିନ ପୁଡୁଚେରୀର ପୋର୍ଟ ଗ୍ରାଉଣ୍ଡରେ ତମିଲଗା ଭେତ୍ରି କାଝାଗମ (ଟିବିକେ) ସଭାପତି ବିଜୟଙ୍କ ଦ୍ୱାରା ଏକ ସାଧାରଣ ସଭା ଅନୁଷ୍ଠିତ ହୋଇଥିଲା । କରୁର ଘଟଣା ପରେ ଅନୁଷ୍ଠିତ ଦ୍ୱିତୀୟ ପ୍ରମୁଖ ସାଧାରଣ ସଭା ପାଇଁ ପ୍ରଶାସନ କଡ଼ା ସୁରକ୍ଷା ବ୍ୟବସ୍ଥା କରିଥିଲା ଏବଂ ଭିଡ଼କୁ ନିୟନ୍ତ୍ରଣ କରିବା ପାଇଁ କେବଳ କ୍ୟୁଆର କୋଡ୍ ପାସ୍ ଧାରୀଙ୍କୁ ପ୍ରବେଶ ଅନୁମତି ଦିଆଯାଇଥିଲା । ଏଥିପାଇଁ ପ୍ରାୟ ୫,୦୦୦ ପାସ୍ ଜାରି କରାଯାଇଥିଲା । ତଥାପି, ଅନେକ ସମର୍ଥକ ବିନା ପାସ୍ ରେ ସଭାସ୍ଥଳରେ ପହଂଚି ଥିଲେ ଏବଂ ପ୍ରବେଶ ନିମନ୍ତେ ଦାବି କରିଥିଲେ । ଏହି ସମୟରେ ପୋଲିସ ଏବଂ ସମର୍ଥକଙ୍କ ମଧ୍ୟରେ ସାମାନ୍ୟ ଝଗଡ଼ା ଏବଂ ଠେଲାପେଲା ସ୍ଥିତି ସୃଷ୍ଟି ହୋଇଥିଲା । ପରେ, ସମର୍ଥକଙ୍କ ସଂଖ୍ୟା ବୃଦ୍ଧି ପାଇବାରୁ, ପ୍ରଶାସନ ପାସ୍ ବିନା ଲୋକମାନଙ୍କୁ ପ୍ରବେଶ ଅନୁମତି ଦେଇଥିଲା ।

ସମାବେଶକୁ ସମ୍ବୋଧିତ କରି ବିଜୟ କହିଥିଲେ, ପୁଡୁଚେରୀର ସମସ୍ତ ଲୋକଙ୍କୁ ମୋର ନମସ୍କାର ଯେଉଁମାନେ ମୋ ହୃଦୟରେ ସ୍ଥାନ ରଖିଛନ୍ତି । ତାମିଲନାଡୁ, ପୁଡୁଚେରୀ, ଆନ୍ଧ୍ର ପ୍ରଦେଶ କିମ୍ବା କେରଳରେ ହେଉ, ବିଶ୍ୱର ଯେକୌଣସି ସ୍ଥାନରେ ରହୁଥିବା ତାମିଲମାନେ ମୋର ନିଜର । ଆଗାମୀ ନିର୍ବାଚନରେ ପୁଡୁଚେରୀରେ ଟିବିକେ ର ପତାକା ନିଶ୍ଚିତ ଉଡ଼ିବ। ବିଜୟ ପୁଡୁଚେରୀର ଐତିହାସିକ ଏବଂ ସାଂସ୍କୃତିକ ପରିଚୟକୁ ପ୍ରଶଂସା କରି କହିଥିଲେ ଯେ, ଏଠାକାର ସରକାର ସୁରକ୍ଷା ବ୍ୟବସ୍ଥାରେ ଯେଉଁଭଳି ସହଯୋଗ କରିଛନ୍ତି, ଏଥିରୁ ତାମିଲନାଡୁ ସରକାର ଶିକ୍ଷା ଗ୍ରହଣ କରିବା ଉଚିତ୍ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ