ବିଜାପୁର, ୧୧ ଅକ୍ଟୋବର (ହି.ସ.)- ଛତିଶଗଡ଼ ରାଜ୍ୟ ବିଜାପୁରର ତାଡାପଲ୍ଲା ଅଂଚଳରେ ନକ୍ସଲବାଦୀଙ୍କ ଦ୍ୱାରା ବିଛାଯାଇଥିବା ଆଇଇଡି ବିସ୍ଫୋରଣରେ ଶନିବାର କୋବ୍ରା ବାଟାଲିଅନ ୨୦୬ର ଟିମ୍ ନମ୍ବର ୧୧ର ହେଡ୍ କନଷ୍ଟେବଲ୍ (ଜିଡି) ଦୀପକ ଦୁଲେ ଆହତ ହୋଇଛନ୍ତି । ପ୍ରାଥମିକ ଚିକିତ୍ସା ପରେ ଅନ୍ୟ ନିୟୋଜିତ ଯବାନମାନେ ତୁରନ୍ତ ଆହତ ଯବାନଙ୍କୁ ବିଜାପୁର ଡାକ୍ତରଖାନାକୁ ସ୍ଥାନାନ୍ତରିତ କରିଥିଲେ । ତାଙ୍କର ଚିକିତ୍ସା ଚାଲିଛି । ବିଜାପୁର ପୋଲିସ ଅଧିକ୍ଷକ ଏହି ଘଟଣାକୁ ନିଶ୍ଚିତ କରିଛନ୍ତି ।

ସକାଳେ ତାଡାପଲ୍ଲା ନିକଟରେ ନୂତନ ଭାବରେ ପ୍ରତିଷ୍ଠିତ ଏଫଓବି (ଫରୱାର୍ଡ ଅପରେଟିଂ ବେସ୍‌) ଶିବିର ନିକଟରେ କୋବ୍ରା ବାଟାଲିଅନ ୨୦୬ର ଯବାନମାନଙ୍କୁ ଏରିଆ ଡମିନେସନ୍ ଏବଂ ଡେପ୍‌ଥ ପ୍ରୋଟେକ୍ସନ୍ ଡ୍ୟୁଟିରେ ନିୟୋଜିତ କରାଯାଇଥିଲା । ସକାଳ ପ୍ରାୟ ୮ଟା ସମୟରେ, ନକ୍ସଲବାଦୀଙ୍କ ଦ୍ୱାରା ପୂର୍ବରୁ ଲଗାଯାଇଥିବା ଆଇଇଡି ବିସ୍ଫୋରଣରେ ଯବାନ ଦୀପକ ଦୁଲେ ଆହତ ହୋଇଥିଲେ । ଘଟଣା ପରେ, ନିକଟରେ ନିୟୋଜିତ ସୁରକ୍ଷା ବାହିନୀ ଦାୟିତ୍ୱ ଗ୍ରହଣ କରିଥିଲେ, ଅଂଚଳକୁ ଘେରାବନ୍ଦୀ କରିଥିଲେ ଏବଂ ଆହତ ଯବାନଙ୍କୁ ତୁରନ୍ତ ଚିକିତ୍ସା ପାଇଁ ପଠାଇଥିଲେ । ଆହତ ଯବାନଙ୍କ ସ୍ୱାସ୍ଥ୍ୟାବସ୍ଥା ବର୍ତମାନ ଭଲ ଥିବା କୁହାଯାଉଛି ଏବଂ ସମଗ୍ର ଅଂଚଳରେ ସତର୍କତା ଜାରି କରାଯାଇଛି ।

ବିଜାପୁର ପୋଲିସ ଅଧିକ୍ଷକ ଜିତେନ୍ଦ୍ର ଯାଦବ ଘଟଣାର ସତ୍ୟାସତ୍ୟ ପ୍ରକାଶ କରି କହିଛନ୍ତି ଯେ, ଅଧିକ ସୂଚନା ଅପେକ୍ଷାରେ ଥିବାବେଳେ, ଅଂଚଳରେ ତଲାସୀ ଅଭିଯାନକୁ ଜୋରଦାର୍ କରାଯାଇଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ