ଭୁବନେଶ୍ବର 13 ଅକ୍ଟୋବର (ହି.ସ) : ଜାତୀୟ ଶିକ୍ଷା ଗବେଷଣା ଓ ତାଲିମ ପରିଷଦ (ଏନସିଇଆରଟି) ର ଯୁଗ୍ମ ନିର୍ଦ୍ଦେଶକ ପ୍ରଫେସର ପ୍ରକାଶ ଚନ୍ଦ୍ର ଅଗ୍ରଓ୍ବାଲ ଅକ୍ଟୋବର ୧୧ରୁ ୧୩ ତାରିଖ ପର୍ଯ୍ୟନ୍ତ ଭୁବନେଶ୍ବର ସ୍ଥିତ ଆଞ୍ଚଳିକ ଶିକ୍ଷା ପ୍ରତିଷ୍ଠାନ(ଆରଆଇଇ) ପରିଦର୍ଶନ କରୁଛନ୍ତି । ଅକ୍ଟୋବର ୧୩ ତାରିଖରେ ସେ ଦୁଇଟି କାର୍ଯ୍ୟକ୍ରମର ଉଦଘାଟନ କରିବେ । ପ୍ରଥମଟି ହେଉଛି ଓଡ଼ିଶାର ପିଏମଶ୍ରୀ ସ୍କୁଲଗୁଡ଼ିକର ଅଧ୍ୟକ୍ଷ/ପ୍ରଧାନ ଶିକ୍ଷକମାନଙ୍କ କ୍ଷମତା ନିର୍ମାଣ କାର୍ଯ୍ୟକ୍ରମ ଓ ଦ୍ବିତୀୟଟି ହେଉଛି ଜାତୀୟ ଶିକ୍ଷା ନୀତି-୨୦୨୦ କାର୍ଯ୍ୟାନ୍ବୟନ ଉପରେ ପୂର୍ବାଞ୍ଚଳର ଶିକ୍ଷକ ପ୍ରଶିକ୍ଷକମାନଙ୍କ କ୍ଷମତା ନିର୍ମାଣ କାର୍ଯ୍ୟକ୍ରମ ।
ଏହି ସରକାରୀ ଗସ୍ତ ସମୟରେ ୧୧ ଅକ୍ଟୋବରରେ ପ୍ରତିଷ୍ଠାନର ପ୍ରାଧ୍ୟାପକମାନଙ୍କ ସହ ସେ ଏକ ଆଲୋଚନାରେ ଅଂଶଗ୍ରହଣ କରିଥିଲେ । ସେ ପିଏମଶ୍ରୀ ଡିଏମ ସ୍କୁଲର ଶିକ୍ଷକମାନଙ୍କ ସହ ମତବିନିମୟ କରିଥିଲେ। ଏହି ଅବସରରେ ସେ କହିଥିଲେ ଯେ ଏ ଅଂଚଳର ସ୍କୁଲଗୁଡ଼ିକ ଯେପରି ସୁଦୃଢ ହୋଇପାରିବେ ଓ ଉତ୍କର୍ଷତା ହାସଲ କରିପାରିବେ ସେ ଦିଗରେ ଦିଗରେ ପିଏମଶ୍ରୀ ଡିଏମ ସ୍କୁଲ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିବା ଆବଶ୍ୟକ ।
କାର୍ଯ୍ୟକ୍ରମ ଆରମ୍ଭରେ ପ୍ରଫେସର ମାନସୀ ଗୋସ୍ବାମୀ ସ୍ବାଗତ ଭାଷଣ ଦେବା ସହ ଯୁଗ୍ମ ନିର୍ଦ୍ଦେଶକଙ୍କୁ ସମ୍ବର୍ଦ୍ଧିତ କରିଥିଲେ ।
ନିଜ ଭାଷଣରେ ପ୍ରଫେସର ଅଗ୍ରଓ୍ବାଲ ଜାତୀୟ ଶିକ୍ଷା ନୀତି (ଏନଇପି) ୨୦୨୦, ଫାଉଣ୍ଡେସନାଲ ଷ୍ଟେଜ୍ ପାଇଁ ଜାତୀୟ ପାଠ୍ୟକ୍ରମ ଫ୍ରେମୱାର୍କ (ଏନସିଏଫଏଫଏସ) ୨୦୨୨ ଏବଂ ସ୍କୁଲ ଶିକ୍ଷା ପାଇଁ ଜାତୀୟ ପାଠ୍ୟକ୍ରମ ଫ୍ରେମୱାର୍କ (ଏନସିଏଫଏସଇ) ୨୦୨୩ କାର୍ଯ୍ୟକାରୀ କରିବାରେ ଅଧ୍ୟାପକମାନଙ୍କ ଗୁରୁତ୍ୱପୂର୍ଣ୍ଣ ଭୂମିକା କଥା ଉଲ୍ଲେଖ କରିବା ସହ ସେମାନଙ୍କୁ ପ୍ରସଂଶା ଓ ଅନୁପ୍ରାଣିତ କରିଥିଲେ । ସେ ଆହୁରି ମଧ୍ୟ କହିଥିଲେ ଯେ ଆଜିର ପ୍ରତିଯୋଗିତାମୂଳକ ଯୁଗରେ ଏନସିଇଆରଟିର ଉଦ୍ଦେଶ୍ୟ ପୂରଣ ଏବଂ ବିକଶିତ ଭାରତ@୨୦୪୭ ସ୍ବପ୍ନକୁ ସାକାର କରିବା ପାଇଁ ଅଧ୍ୟାପକ, ଗବେଷଣା, ସମ୍ପ୍ରସାରଣ ଏବଂ ନୀତି ବିକାଶରେ ଅଧ୍ୟାପକମାନଙ୍କର ସାମୂହିକ ଅବଦାନ ଅତ୍ୟନ୍ତ ଜରୁରୀ।
ସେ ମଧ୍ୟ ଏନସିଇଆରଟି ଦ୍ବାରା ପ୍ରସ୍ତୁତ ନୂଆ ପାଠ୍ୟପୁସ୍ତକର ସମୀକ୍ଷା କରିବା ସହ ଆବଶ୍ୟକ ଲକ୍ଷ୍ୟ ହାସଲ ଲାଗି ପିଏମଶ୍ରୀ ଡିଏମ ସ୍କୁଲଗୁଡ଼ିକୁ ଆବଶ୍ୟକ ଶୈକ୍ଷିକ ସହାୟତା ପ୍ରଦାନ କରିବାକୁ ସବୁ ପ୍ରାଧ୍ୟାପକମାନଙ୍କୁ ନିବେଦନ କରିଥିଲେ । ଏହା ସହିତ କାର୍ଯ୍ୟକ୍ରମ ପରାମର୍ଶ କମିଟି (ପିଏସି)ର ସମସ୍ତ କାର୍ଯ୍ୟକୁ ଠିକ ସମୟରେ ସଂପୂର୍ଣ୍ଣ କରିବାକୁ ସେ ପରାମର୍ଶ ଦେଇଥିଲେ । ଏହା ସହିତ ସେ ବ୍ୟାପକ ଶୈକ୍ଷିକ ପ୍ରଭାବ ପାଇଁ ଗବେଷଣାତ୍ମକ ରିପୋର୍ଟ ପ୍ରକାଶନ ଓ ବିତରଣ ପାଇଁ ଶୈକ୍ଷିକ ସଦସ୍ୟମାନଙ୍କୁ ନିବେଦନ କରିଥିଲେ ।
ଏହି ବୈଠକରେ ବିଭାଗୀୟ ମୁଖ୍ୟ ପ୍ରଫେସର ରୀତାଞ୍ଜଳି ଦାଶ (ଡିଇଇ), ପ୍ରଫେସର ଲକ୍ଷ୍ମୀଧର ବେହେରା (ଡିଇ), ଡକ୍ଟର କଳିଙ୍ଗ କେତକୀ (ଡିଇଏସଏସଏଚ) ଏବଂ ଡକ୍ଟର ବେଦ ପ୍ରକାଶ ବର୍ମା (ଡିଇଏସଏମ) ଏବଂ ସେମାନଙ୍କ ବିଭାଗର ଅଧ୍ୟାପକମାନେ ଉପସ୍ଥିତ ଥିଲେ। ପିଏମଶ୍ରୀ ଡିଏମ୍ ସ୍କୁଲର ଶିକ୍ଷକମାନଙ୍କ ସହିତ ଆଲୋଚନା ସମୟରେ, ପ୍ରଧାନ ଶିକ୍ଷକ ଶ୍ରୀ ଅଖିଳେଶ୍ୱର ମିଶ୍ର ଉପସ୍ଥିତ ଥିଲେ। ଷ୍ଟାଫ କାଉନସିଲର ସଚିବ ପ୍ରଫେସର ରମାକାନ୍ତ ମହାଳିକ ଧନ୍ୟବାଦ ଅର୍ପଣ କରିଥିଲେ ।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
