ଭୋପାଳ, ୧୯ ଅକ୍ଟୋବର (ହି.ସ.)- ମଧ୍ୟପ୍ରଦେଶର ସତନା ଜିଲ୍ଲାର ଏକ ପବିତ୍ର ତୀର୍ଥସ୍ଥଳ ଚିତ୍ରକୂଟରେ ଦୀପାବଳିର ପବିତ୍ର ଅବସରରେ ଆରମ୍ଭ ହୋଇଥିବା ପାଂଚ ଦିନିଆ ଦୀପୋତ୍ସବ ପ୍ରଥମ ଦିନରେ ଧାର୍ମିକ ଉତ୍ସାହ ଏବଂ ମହିମାର ଏକ ଉଲ୍ଲେଖନୀୟ ମିଶ୍ରଣ ଆଣିଥିଲା । ଶନିବାର, ଦୀପୋତ୍ସବର ପ୍ରଥମ ଦିନରେ, ପ୍ରାୟ ଚାରି ଲକ୍ଷ ଶ୍ରଦ୍ଧାଳୁ ଏହି ପବିତ୍ର ନଗରୀରେ ପହଂଚି ଠାକୁରଙ୍କ ପୂଜା କରିବା ଏବଂ କାମଦଗିରି ପରିକ୍ରମାର ପୂର୍ଣ୍ଣ୍ୟ ଲାଭ କରିଛନ୍ତି ।

ମନ୍ଦାକିନୀ ନଦୀର କୂଳ ଝଲସୁଥିବା ଆଲୋକରେ ଆଲୋକିତ ହୋଇଥିଲା, ଯେପରି ଏହି ଅଲୌକିକ ଦୃଶ୍ୟ ଦେଖିବା ପାଇଁ ଦେବତାମାନେ ସ୍ୱୟଂ ପୃଥିବୀକୁ ଅବତରଣ କରିଛନ୍ତି । ରବିବାର ମୁଖ୍ୟମନ୍ତ୍ରୀ ଡକ୍ଟର ମୋହନ ଯାଦବଙ୍କ ଆଗମନ ସମଗ୍ର କାର୍ଯ୍ୟକ୍ରମର କେନ୍ଦ୍ରବିନ୍ଦୁ ହେବ ।

ଉଲ୍ଲେଖନୀୟ ଯେ, ଚଳିତ ବର୍ଷର ଦୀପୋତ୍ସବ ଧାର୍ମିକ ବିଶ୍ୱାସର କେନ୍ଦ୍ର ହେବା ସହିତ, ଅସାଧାରଣ ପ୍ରଶାସନିକ ପ୍ରସ୍ତୁତିର ଏକ ଉଦାହରଣ ମଧ୍ୟ ସୃଷ୍ଟି କରୁଛି । କଲେକ୍ଟର ଡକ୍ଟର ସତୀଶ କୁମାର ଏସ୍‌. କହିଛନ୍ତି ଯେ, ଭକ୍ତଙ୍କ ସୁବିଧା ଏବଂ ସୁରକ୍ଷାକୁ ଧ୍ୟାନରେ ରଖି ସମଗ୍ର ମେଳା ଅଂଚଳକୁ ୧୧ଟି ଜୋନ୍ ରେ ବିଭକ୍ତ କରାଯାଇଛି । ଭିଡ଼ ପରିଚାଳନା କଷ୍ଟକର ନହେବା ପାଇଁ ପ୍ରତ୍ୟେକ ଜୋନରେ କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଏବଂ ପର୍ଯ୍ୟାପ୍ତ ପୋଲିସ ଫୋର୍ସ ମୁତୟନ କରାଯାଇଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ