ସମ୍ବଲପୁର, ୧୩ ନଭେମ୍ବର (ହି.ସ) ଆଜି ଜିଲ୍ଲାପାଳ ସମ୍ବଲପୁର ସିଦ୍ଧେଶ୍ୱର ବଳିରାମ ବୋନ୍ଦରଙ୍କ ଅଧ୍ୟକ୍ଷତାରେ ୩୦ତମ ନାସନାଲ ସାଇକ୍ଲିଂଗ ଚ୍ୟାମ୍ପିଅନସିପ୍ ୨୦୨୫ ନିମନ୍ତେ ଏକ ପ୍ରସ୍ତୁତି ବୈଠକ ଆଭାସୀ ମାଧ୍ୟମରେ ଅନୁଷ୍ଠିତ ହୋଇଯାଇଛି । ଏହି ଜାତୀୟ କ୍ରୀଡାର ଆୟୋଜନ ଓଡିଶା ସାଇକ୍ଲିଙ୍ଗ ଏସୋସିଏସନ୍ ଦ୍ୱାରା ଏବଂ କ୍ରୀଡା ଓ ଯୁବ ସେବା ବିଭାଗ, ଓଡିଶା ସରକାର ଓ ଜିଲ୍ଲା ପ୍ରଶାସନ, ସମ୍ବଲପୁର ମିଳିତ ସହଯୋଗରେ ଆୟୋଜିତ ହେବ। ଏହି ଚ୍ୟାମ୍ପିଅନସିପ୍ ୩ ରୁ ୬ ଡିସେମ୍ବର ୨୦୨୫ ପର୍ଯ୍ୟନ୍ତ ଆୟୋଜିତ ହେବ, ଯେଉଁଠାରେ ଦେଶର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରୁ ଅଂଶଗ୍ରହଣକାରୀ ଯୋଗଦେବେ। ପ୍ରାୟ ୯୦୦ରୁ ୧୦୦୦ ପର୍ଯ୍ୟନ୍ତ ପ୍ରତିଭାଗୀ ଏଥିରେ ଅଂଶଗ୍ରହଣ କରିବେ। ସାଇକ୍ଲଥନ୍ ରୁଟ୍ ନକ୍ସାପାଲି ଓଭରବ୍ରିଜ୍ ରୁ ବିପିସିଏଲ ପେଟ୍ରୋଲ ପମ୍ପ, ଝାଙ୍କରପାଲି ପର୍ଯ୍ୟନ୍ତ ହେବ । ଆଜିର ବୈଠକରେ ବିଭିନ୍ନ ବିଭାଗର ଦାୟିତ୍ୱ ଓ କାର୍ଯ୍ୟବିଭାଗ, ନିବାସ ବ୍ୟବସ୍ଥା, ସୁରକ୍ଷା, ଲଜିଷ୍ଟିକ୍ସ, ମିଡିଆ କଭରେଜ୍, ଟ୍ରାଫିକ୍ ବ୍ୟବସ୍ଥାପନ ଓ ସ୍ଥାନ ପ୍ରସ୍ତୁତି ବିଷୟରେ ଆଲୋଚନା ହୋଇଥିଲା। ସମ୍ବଲପୁର ଜିଲ୍ଲାପାଳ ଅନ୍ତର୍ବିଭାଗୀୟ ସମନ୍ୱୟ ଓ ଯଥାର୍ଥ ପ୍ରସ୍ତୁତି ମାଧ୍ୟମରେ ଏହି ଆୟୋଜନକୁ ଜାତୀୟ ସ୍ତରରେ ସଫଳ କରିବା ଓ ସମ୍ବଲପୁରକୁ ଜାତୀୟ କ୍ରୀଡା ମଞ୍ଚରେ ପ୍ରତିଷ୍ଠିତ କରିବା ଉପରେ ପ୍ରୟାସ କରିବାକୁ କହିଥିଲେ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
