କୋଲକାତା, ୧୭ ନଭେମ୍ବର (ହି.ସ.)- ନିଶା କାରବାର ଅଭିଯୋଗରେ ପଶ୍ଚିମବଙ୍ଗର ନଦିଆ ଜିଲ୍ଲା ଜେଲ୍ ରେ ବନ୍ଦୀ ସବିର ଅହମ୍ମଦକୁ ଏବେ ଦିଲ୍ଲୀର ଲାଲକିଲ୍ଲା ମେଟ୍ରୋ ଷ୍ଟେସନ ନିକଟରେ ହୋଇଥିବା ଭୀଷଣ ବିସ୍ଫୋରଣ ସହିତ ଯୋଡାଯାଉଛି । ଜେଲ୍ ରେ ଥିବା ସମୟରେ ସେ କିପରି ଦେଶ ବିରୋଧୀ କାର୍ଯ୍ୟକଳାପରେ ସାମିଲ୍ ଥିଲା ତାହା ଜାତୀୟ ତଦନ୍ତ ଏଜେନ୍ସିଗୁଡ଼ିକ ତଦନ୍ତ କରୁଛନ୍ତି । କିଛି ଦିନ ପୂର୍ବରୁ ଦିଲ୍ଲୀ ବିସ୍ଫୋରଣରେ ୧୩ ଜଣଙ୍କ ମୃତ୍ୟୁ ହୋଇଥିଲା । ଭାରତୀୟ ତଦନ୍ତ ଏଜେନ୍ସି ଅନୁଯାୟୀ, ବିସ୍ଫୋରଣରେ ଏକ ଆତଙ୍କବାଦୀ ମଡ୍ୟୁଲ୍ ସକ୍ରିୟ ଭୂମିକା ଗ୍ରହଣ କରିଥିଲା । ଏହି ନେଟୱାର୍କ ଶାହିନ ଶାହିଦର ନେତୃତ୍ୱରେ ଅନେକ ସୋସିଆଲ ମିଡିଆ ଗ୍ରୁପ୍ ମାଧ୍ୟମରେ କାର୍ଯ୍ୟ କରୁଥିଲା । ଏହି ମାମଲାରେ ଗିରଫ ହୋଇଥିବା ଶାହିନକୁ ପଚରାଉଚରା ସମୟରେ ଜଣାପଡିଥିଲା ଯେ, ନଦିଆ ଜିଲ୍ଲାର ପଲାସିପଡ଼ାର ବାସିନ୍ଦା ସବିର ଅହମ୍ମଦ, ଯିଏ ବର୍ତମାନ ଜେଲ୍ ରେ ଅଛି, ସେ ମଧ୍ୟ ଏହି ଗ୍ରୁପ୍ ଗୁଡ଼ିକରେ ସକ୍ରିୟ ଥିଲା ଏବଂ ଅନ୍ୟ ସଦସ୍ୟମାନଙ୍କୁ ଭାରତ ବିରୋଧୀ ପ୍ରଚାର ଏବଂ କାର୍ଯ୍ୟକଳାପରେ ସାମିଲ୍ ହେବା ପାଇଁ ଉତ୍ସାହିତ କରୁଥିଲା ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ