ନୂଆଦିଲ୍ଲୀ, ୨୨ ନଭେମ୍ବର (ହି.ସ.)- ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଦିଲ୍ଲୀରେ ଅନୁଷ୍ଠିତ ଏସୀୟ ଏବଂ ପ୍ରଶାନ୍ତ ମହାସାଗରୀୟ ବିପର୍ଯ୍ୟୟ ସୂଚନା ପରିଚାଳନା କେନ୍ଦ୍ର (ଏପିଡିଏମ) ର ଅନ୍ତର୍ଭୁକ୍ତିଗତ ବିପର୍ଯ୍ୟୟ ବିପଦ ତଥ୍ୟ ପରିଚାଳନା ଉପରେ ଦଶମ ବୈଠକରେ ବିପଦ ମୂଲ୍ୟାଙ୍କନ, ପ୍ରାରମ୍ଭିକ ଚେତାବନୀ ବ୍ୟବସ୍ଥା, ଜଳବାୟୁ ସହନଶୀଳ ଢାଂଚା ଏବଂ ଆଂଚଳିକ ସହଯୋଗକୁ ସୁଦୃଢ଼ କରିବା ପାଇଁ ସଂକଳ୍ପ ନିଆଯାଇଛି । ବୈଠକରେ ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ବିପର୍ଯ୍ୟୟ ଏବଂ ଜଳବାୟୁ ବିପଦ ହ୍ରାସ କରିବା ପାଇଁ ମିଳିତ ପ୍ରୟାସକୁ ଆହୁରି ସୁଦୃଢ଼ କରିବା ଉପରେ ଗୁରୁତ୍ୱାରୋପ କରାଯାଇଥିଲା ।

ଗୃହ ମନ୍ତ୍ରଣାଳୟ ଅନୁଯାୟୀ, ଭାରତୀୟ ପ୍ରତିନିଧିମଣ୍ଡଳର ନେତୃତ୍ୱ କେନ୍ଦ୍ର ଗୃହ ରାଜ୍ୟମନ୍ତ୍ରୀ ନିତ୍ୟାନନ୍ଦ ରାୟ ନେଇଥିଲେ । ତାଙ୍କ ସହିତ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣର ସଦସ୍ୟ ତଥା ବିଭାଗ ଅଧ୍ୟକ୍ଷ ରାଜେନ୍ଦ୍ର ସିଂହ ତଥା ଏନଡିଏମଏ ସଚିବ ମନୀଷ ଭରଦ୍ୱାଜ ମଧ୍ୟ ଉପସ୍ଥିତ ଥିଲେ ।

ନିତ୍ୟାନନ୍ଦ ରାୟ ତାଙ୍କ ଉଦଘାଟନୀ ଭାଷଣରେ କହିଥିଲେ ଯେ, ଭାରତ ଏକ ବ୍ୟାପକ କ୍ଷମତା-ନିର୍ମାଣ କାର୍ଯ୍ୟସୂଚୀ, ଭୂସ୍ଥାନିକ ପ୍ରଯୁକ୍ତିବିଦ୍ୟା, ପ୍ରଭାବ-ଆଧାରିତ ପୂର୍ବାନୁମାନ, ବିପଦ ମୂଲ୍ୟାଙ୍କନ ଏବଂ ପ୍ରାରମ୍ଭିକ ଚେତାବନୀ ପ୍ରସାରଣକୁ ଆଗକୁ ବଢ଼ାଇ ଆଂଚଳିକ ସ୍ଥିରତାକୁ ସୁଦୃଢ଼ କରିବ । ସେ କହିଛନ୍ତି ଯେ, ଏହି ସହଭାଗୀତା ପ୍ରଧାନମନ୍ତ୍ରୀ ମୋଦିଙ୍କ ବିପର୍ଯ୍ୟୟ ବିପଦ ହ୍ରାସ ପାଇଁ ଦଶ-ସୂତ୍ରୀ ଏଜେଣ୍ଡା ଉପରେ ଆଧାରିତ, ଯାହା ସ୍ଥାନୀୟ ନିବେଶ, ପ୍ରଯୁକ୍ତିବିଦ୍ୟାର ବ୍ୟବହାର, ବିପଦ ତଥ୍ୟକୁ ସୁଦୃଢ଼ କରିବା ଏବଂ ଆଂଚଳିକ ସହଯୋଗକୁ ପ୍ରାଥମିକତା ଦିଏ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ