ମନ ମୋହିବ ଓଡିଆ ଭାଷାର ଗୌରବ ଗାଥା ଓଡ଼ିଆ ସାହିତ୍ୟ ଓ ଓଡ଼ିଆ ଫିଲ୍ମ ପ୍ୟାନୋରାମା
ଭୁବନେଶ୍ୱର, ୨୨ ନଭେମ୍ବର (ହି.ସ)- ଭୁବନେଶ୍ୱରର ଐତିହ୍ୟ, ସାଂସ୍କୃତିକ,ପ୍ରାକୃତିକ, ଆଧ୍ୟାତ୍ମିକତା, କଳା, ପରିବେଶର ହୃଦୟସ୍ପର୍ଶୀ ରୂପକୁ ଜାଣିବା ପାଇଁ ଭୁବନେଶ୍ୱର ମହାନଗର ନିଗମର ମିଳିତ ଆନୁକୁଲ୍ୟରେ ଆରମ୍ଭ ହୋଇଥିବା ‘ଏକାମ୍ର ୱାକ୍ସ’ରେ ‘ଓଡିଆ ଭାଷାର ଗୌରବ ଗାଥା ’ ଏବଂ ‘ଉତ୍କୃଷ୍ଟ କଳାର ଅନ୍ତରାଳେ-ଉତ୍କଳ – ଓଡ଼ିଆ ଫିଲ୍ମ ପ୍ୟାନୋରାମା’ ଭଳି ଦୁଇଟି ନୂଆ ଟ୍ରେଲ୍ ଯୋଡ଼ି ହୋଇଛି। ଆସନ୍ତାକାଲି ଠାରୁ ‘କଳା ଭୂମି’ଠାରେ ଏହି ଦୁଇ ଟ୍ରେଲ୍ ଆରମ୍ଭ ହେବ। ଏହି ଟ୍ରେଲ୍ ମାଧ୍ୟମରେ ଦର୍ଶକ ଓ ପର୍ଯ୍ୟଟକମାନେ ଓଡ଼ିଆ ସାହିତ୍ୟର ମହାନ୍ ସ୍ରଷ୍ଟାମାନଙ୍କ ସହ ଜଡ଼ିତ ସ୍ମୃତି ଓ କାହାଣୀକୁ ଜାଣିବାକୁ ପାଇବେ। ଅନ୍ୟପକ୍ଷରେ, ଓଡ଼ିଆ ଫିଲ୍ମ ପ୍ୟାନୋରାମା ଟ୍ରେଲ୍ ରେ ଓଡ଼ିଆ ସିନେମାର ଐତିହ୍ୟ, ନିର୍ମାତା, କଳାକାର ଓ ସହ କଥୋପକଥନର କରିପାରିବେ।
ଭାଷା, କଳା ଓ ଅଭିବ୍ୟକ୍ତିର ଜୀବନ୍ତ ଯାତ୍ରା ଉପରେ ଆଧାରିତ 'ଓଡିଆ ଭାଷାର ଗୌରବ ଗାଥା ଟ୍ରେଲ୍' ‘କଳା ଭୂମି’ ଠାରେ ପୂର୍ବାହ୍ନ ୧୧ : ୩୦ରେ ଅନୁଷ୍ଠିତ ହେବ। ଏହା ଓଡ଼ିଆ ଭାଷାର ବିକାଶ ଯାତ୍ରାକୁ ଏକ ରଙ୍ଗୀନ ଓ ଜୀବନ୍ତ ଅନୁଭବ ପ୍ରଦାନ କରିବ। ପ୍ରାଚୀନ କାଳରୁ ଆରମ୍ଭ କରି ଓଡ଼ିଆ ଭାଷାର ଶାସ୍ତ୍ରୀୟ ଗୌରବ ପର୍ଯ୍ୟନ୍ତ ଏହି ଯାତ୍ରାକୁ ସାହିତ୍ୟ, ନୃତ୍ୟ-ନାଟ୍ୟ, ଲୋକକଳା ଓ କାହାଣୀ କହିବା ମାଧ୍ୟମରେ ପ୍ରଦର୍ଶିତ ହେବ। ଓଡ଼ିଆ ଭାଷାର ସୌନ୍ଦର୍ଯ୍ୟ ଓ ଗରିମାକୁ ନୂଆ ଢଙ୍ଗରେ ଅନୁଭବ କରିବା ସକାଶେ ଏହି ଟ୍ରେଲ୍ ରେ ରହିଛି କିଛି ବିଶେଷ ଆକର୍ଷଣ! ଏଥିରେ ବିଭିନ୍ନ ଯୁଗରେ ଓଡ଼ିଆ ଭାଷା କିପରି ବଢ଼ିଛି, ତାହାର ସୁନ୍ଦର ଉପସ୍ଥାପନା,ଲୋକନୃତ୍ୟ ଜରିଆରେ କଥା, ଚରିତ୍ର ଓ ସଂସ୍କୃତିର ଝଲକ, ଶାସ୍ତ୍ରୀୟ ସାହିତ୍ୟ ଓ କବିତାରୁ ପ୍ରେରଣା ନେଇ ଓଡ଼ିଶୀ ନୃତ୍ୟ, ପୁରୁଣା ଓ ନୂଆ ଢଙ୍ଗରେ କାହାଣୀ କହିବାର ମଜା ଓ ସ୍ଥାନୀୟ ଭାଷା ବିଷୟରେ ଗଭୀର ଆଲୋଚନା,ଓଡ଼ିଆ ଭାଷା ଓ ସାହିତ୍ୟର ମହାନ୍ ବ୍ୟକ୍ତିଙ୍କ ସହ ସିଧା ସଳଖ କଥାବାର୍ତା,ସାହିତ୍ୟପ୍ରେମୀ, ସଂସ୍କୃତି ଅନୁରାଗୀ, ଛାତ୍ରଛାତ୍ରୀ ଓ ପରିବାର ସହିତ ଆସି ଏହି ଟ୍ରେଲ୍ ରେ ଯୋଗ ଦେଇ ଭାଷା ଶିଖିବାର ଏକ ନୂଆ ସୁଯୋଗ ପାଇବେ।
ସେହିପରି ଏକାମ୍ର ୱାକ୍ସର ୨୩ ନଭେମ୍ବରରୁ ଆରମ୍ଭ ହେବାକୁ ଥିବା ଅନ୍ୟ ଏକ ଟ୍ରେଲରେ 'ଉତ୍କୃଷ୍ଟ କଳାର ଅନ୍ଢରାଳେ-ଉତ୍କଳ – ଓଡ଼ିଆ ଫିଲ୍ମ ପ୍ୟାନୋରାମା' ରେ ପ୍ରତି ରବିବାର କଳା ଭୂମିରେ ହେବ ଓଡ଼ିଆ ସିନେମାର ମହକ୍! ଏହା 'କଳା ଭୂମି'ର ଖୋଲା ଆକାଶ ତଳେ ଥିବା ଥିଏଟରରେ ପ୍ରତି ରବିବାର ସମୟ: ସନ୍ଧ୍ୟା ୫:୩୦ରୁ ରାତି ୮:୩୦ ପର୍ଯ୍ୟନ୍ତ ଆୟୋଜିତ ହେବ। ଏଠାରେ ପୁରୁଣା ଓ ଐତିହାସିକ ଓଡ଼ିଆ ଚଳଚ୍ଚିତ୍ରଗୁଡ଼ିକ ବଡ଼ ପରଦାରେ ପ୍ରଦର୍ଶନ,ଚଳଚ୍ଚିତ୍ର ଇତିହାସ, ନିର୍ଦ୍ଦେଶକ ଓ ସାଂସ୍କୃତିକ ପୃଷ୍ଠଭୂମି ବିଷୟରେ ସୁନ୍ଦର ପରିଚୟ,ଚଳଚ୍ଚିତ୍ର ବିଶେଷଜ୍ଞ, ସିନେପ୍ରେମୀ ଓ ସାଂସ୍କୃତିକ କର୍ମୀଙ୍କ ସହ ଖୋଲା କଥାବାର୍ତା ସହିତ ସାଙ୍ଗମାନଙ୍କ ସହ ଆସି ଓଡ଼ିଆ ସିନେମା, ହସ୍ତଶିଳ୍ପ ଓ ସଂସ୍କୃତିର ଏକ ଅଦ୍ଭୁତ ମିଶ୍ରଣକୁ ଉପଭୋଗ କରିପାରିବେ। ଆଗାମୀ ପ୍ରତି ରବିବାର ସନ୍ଧ୍ୟା କଳା ଭୂମିରେ ଓଡ଼ିଆ ଚଳଚ୍ଚିତ୍ରର ମହକ ଓ ଆଲୋକରେ ରଙ୍ଗିନ ହୋଇଉଠିବ! ଏହି ଦୁଇ ଟ୍ରେଲର ସୁନ୍ଦର ଅନୁଭୂତି ପାଇବା ପାଇଁ ଇଛୁକ କଳାପ୍ରେମୀ ଓ ଦର୍ଶକ ଆଗୁଆ ଏକାମ୍ର ୱାକ୍ସ ଡଟ୍ କମ୍ ରେ ପଞ୍ଜିକରଣ କରିବେ ବୋଲି ଆୟୋଜକ କର୍ତୃପକ୍ଷଙ୍କ ପକ୍ଷରୁ କୁହାଯାଇଛି।
ସୂଚନା ଥାଉ କି ଗତ ୭ ନଭେମ୍ବର ଠାରୁ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ ଓ ଭୁବନେଶ୍ୱର ମହାନଗର ନିଗମର ମିଳିତ ଆନୁକୁଲ୍ୟରେ 'ଏକାମ୍ର ୱାକ୍ସ'ର ୯ମ ସଂସ୍କରଣ ଆରମ୍ଭ ହୋଇଥିଲା। ଭୁବନେଶ୍ୱରର ଉନ୍ନତ ଐତିହ ଓ କଳା ସଂସ୍କୃତିକୁ ଜାଣିବା ଏହି ୱାକ୍ସ'ର ନିୟମିତ ଟ୍ରେଲଗୁଡ଼ିକ ୧୫ ନଭେମ୍ବର ରୁ ଆରମ୍ଭ ହୋଇ ୨୮ ଫେବୃଆରୀ ୨୦୨୬ ପର୍ଯ୍ୟନ୍ତ ଚାଲିବ । ରାଜଧାନୀର ଭବ୍ୟ କଳା, ସଂସ୍କୃତିକୁ ଅଧିକ ଜାଣିବା ପାଇଁ ପର୍ଯ୍ୟଟକ ପାଇଁ ନୂଆ ଦୁଇ ଟ୍ରେଲ୍ ସମେତ ସମୁଦାୟ ୯ଟି ଟ୍ରେଲ ରହିଛି ।
---------------
ହିନ୍ଦୁସ୍ଥାନ ସମାଚାର / ବନ୍ଦନା