ତିରୁବନ୍ନାମଲାଇ, ୨୪ ନଭେମ୍ବର (ହି.ସ.)- ସୋମବାର ସକାଳେ ତାମିଲନାଡୁର ପ୍ରସିଦ୍ଧ ଅରୁଣାଚଳେଶ୍ୱର ମନ୍ଦିରରେ ଭକ୍ତଙ୍କ ଭିଡ଼ ମଧ୍ୟରେ କାର୍ତିଗଇ ଦୀପମ୍ ମହୋତ୍ସବ ଆରମ୍ଭ ହୋଇଛି । ବୈଦିକ ମନ୍ତ୍ର ଉଚ୍ଚାରଣ ମଧ୍ୟରେ ୬୩ ଫୁଟ ଉଚ୍ଚ ସ୍ୱର୍ଣ୍ଣ ପତାକା ଉତୋଳନ କରାଯାଇଛି, ଏଥି ସହିତ ଏହି ଐତିହାସିକ ୧୦ ଦିନିଆ ମହୋତ୍ସବର ଶୁଭାରମ୍ଭ ହୋଇଛି । ଅରୁଣାଚଳେଶ୍ୱର ମନ୍ଦିର ପଂଚଭୂତ ସ୍ଥଳମାନଙ୍କରେ ଅଗ୍ନି ସ୍ଥଳ ଭାବରେ ଜଣାଶୁଣା, ଏବଂ ପ୍ରତିବର୍ଷ ବିଶ୍ୱର ଲକ୍ଷ ଲକ୍ଷ ଭକ୍ତ କାର୍ତିଗଇ ଦୀପମ୍ ର ଦିବ୍ୟ ପର୍ବ ଦେଖିବା ପାଇଁ ଏଠାକୁ ଆସିଥାନ୍ତି ।

୧୦ ଦିନି ବ୍ୟାପୀ ଚାଲିବ ମହୋତ୍ସବ :-

ପ୍ରଥମ ଦିନରେ ଏକ ପଂଚମୂର୍ତି ପରେଡ୍ ଅନୁଷ୍ଠିତ ହୋଇଥିଲା । ଆଗାମୀ ଦିନରେ, ମନ୍ଦିର ପରିସରରେ ଏବଂ ତିରୁଭନ୍ନାମଲାଇର ରାସ୍ତାରେ ଭବ୍ୟ ଶୋଭାଯାତ୍ରା ଅନୁଷ୍ଠିତ ହେବ । ୭ମ ଦିନରେ, ପାରମ୍ପରିକ ରଥ ଉତ୍ସବ ଅନୁଷ୍ଠିତ ହେବ, ଯେଉଁଥିରେ ପଂଚମୂର୍ତି ଭବ୍ୟ ଛତାରେ ସୁସଜ୍ଜିତ ହୋଇ ସହର ପରିକ୍ରମା କରିବେ ।

ଡିସେମ୍ବର ୩ ରେ ଭରଣୀ ଦୀପମ୍ ଏବଂ ମହାଦୀପମ୍ :-

ଉତ୍ସବର ଶେଷ ପର୍ଯ୍ୟାୟରେ, ଡିସେମ୍ବର ୩ ତାରିଖ ଭୋର୍ ୪ଟାରେ ଗର୍ଭଗୃହରେ ଭରଣୀ ଦୀପମ୍ ପ୍ରଜ୍ୱଳିତ କରାଯିବ । ଏହି ଦିନ ସନ୍ଧ୍ୟା ୬ ଟାରେ ୨,୬୬୮ ଫୁଟ ଉଚ୍ଚ ଅନ୍ନାମଲାଇ ପାହାଡ଼ର ଶୀର୍ଷରେ ମହାଦୀପ ପ୍ରଜ୍ୱଳିତ କରାଯିବ, ଯାହାର ଦର୍ଶନ ପାଇଁ ଲକ୍ଷ ଲକ୍ଷ ଶ୍ରଦ୍ଧାଳୁ ତିରୁବନ୍ନାମଲାଇରେ ପହଂଚିଥାନ୍ତି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ