ସମ୍ବଲପୁର, ୨୫, ନଭେମ୍ବର (ହି.ସ.) ସମ୍ବଲପୁର ଜିଲ୍ଲା ଜମନକିରା ବ୍ଲକ ଡିମିରିମୁଣ୍ଡା ସ୍ଥିତ ଭାରତ ମୟ ଆଶ୍ରମ ପରିସରରେ ଗତ ୨୦ ତାରିଖ ଠାରୁ ଆରମ୍ଭ ହୋଇଥିବା କୁଚିଣ୍ଡା ଉପଖଣ୍ଡ ସ୍ତରୀୟ ପାଞ୍ଚ ଦିବସୀୟ କର୍ମଶାଳା ଆଜି ଉଦଯାପିତ ହୋଇଯାଇଛି । ଏହି କର୍ମଶାଳାରେ ପ୍ରାଥମିକ ଶିକ୍ଷା,ଆରୋଗ୍ୟ ଶିକ୍ଷା,ଗ୍ରାମ ବିକାଶ ସିଷ୍କ, ଜାଗରଣ ଶିକ୍ଷା ଓ ସଂସ୍କାର ଶିକ୍ଷା ଆଦି ପାଞ୍ଚ ଦିବସୀୟ ଶିକ୍ଷା ଉପରେ ତାଲିମ ଦିଆଯାଇଥିଲା । ଉଦଯାପନ ଉତ୍ସବରେ ସମାଜସେବୀ ତଥା ଶିକ୍ଷାବିତ୍ ସୁବାସ ଚନ୍ଦ୍ର ନାୟକ ମୁଖ୍ୟ ଅତିଥି ଭାବରେ ଯୋଗ ଦେଇ ସମାଜ ଓ ଦେଶ ଗଠନ ପାଇଁ ଏକଲ ଅଭିଯାନର ଆଚାର୍ଯ୍ୟ ଓ ଆଚାର୍ଯ୍ୟମାନେ ଛାତ୍ରଛାତ୍ରୀଙ୍କୁ ଉତ୍ତମ ଆଚରଣ ସହ ସତ୍ ମାର୍ଗରେ ପରିଚାଳିତ ହେବା ଦିଗରେ ସଚେତନ କରିବାକୁ ଆହ୍ବାନ ଦେଇଥିଲେ । ଭାରତ ମୟ ଆଶ୍ରମର ବାବା ଶିବାନନ୍ଦ ଜୀ ମୁଖ୍ୟବକ୍ତା ଭାବରେ ଯୋଗ ଦେଇ ପରିବେଶ ସୁରକ୍ଷା ପାଇଁ ସୁଚିନ୍ତିତ ଅଭିଯାନ କାର୍ଯ୍ୟ କରୁ ବୋଲି ପରାମର୍ଶ ଦେଇଥିଲେ । ଅଭିଯାନର ସମ୍ବଲପୁର ଜିଲ୍ଲା ପ୍ରମୁଖ ପ୍ରଦୀପ ସ୍ୱାଇଁଙ୍କ ସଭାପତିତ୍ବ ଓ ଜମନକିରା ବ୍ଲକ ପ୍ରମୁଖ ଜଗଦୀଶ ବେହେରାଙ୍କ ସଂଯୋଜନାରେ ଆୟୋଜିତ ଏହି କର୍ମଶାଳାରେ ଉପଖଣ୍ଡର ୬୦ ଟି ଅଣ ଆନୁଷ୍ଠାନିକ ଶିକ୍ଷା କେନ୍ଦ୍ରର ଆଚାର୍ଯ୍ୟ ଓ ଆଚାର୍ଯ୍ୟ ମାନେ ପାଞ୍ଚ ଦିନ ଧରି ଶିବିରାର୍ଥି ଭାବରେ ଉପସ୍ଥିତ ଥିଲେ । ଅନ୍ୟମାନଙ୍କ ମଧ୍ୟରେ ପ୍ରାଥମିକ ଶିକ୍ଷା ଜିଲ୍ଲା ପ୍ରମୁଖ ଶଶି ନାଏକ, ରାଜ୍ୟକୁ ଯାଇଥିବା ଜିଲ୍ଲାର ପ୍ରତିନିଧି ବିନୟ ପୃଷେଠ, ବାମରା ବ୍ଲକର ପ୍ରମୁଖ ତୁଷାର ନାଏକ ପ୍ରମୁଖ ବିଭିନ୍ନ ବର୍ଗ ଉପରେ ତାଲିମ ଦେଇଥିଲେ । ଶିବିରାର୍ଥି ମାନଙ୍କୁ ମଧ୍ୟରୁ ଉତ୍ତମ ପ୍ରଦର୍ଶନ କରିଥିବା ଶୁଦୀପ ବାଘ, ସୁକମଣୀ କିସାନ ଓ ଜୟନ୍ତୀ ନିଖଣ୍ଡିଆଙ୍କୁ ଅତିଥି ଗଣ ପୁରସ୍କୃତ କରିଥିଲେ । ପ୍ରାରମ୍ଭରେ ଗୁରୁଚରଣ ରଣା ସ୍ଵାଗତ ଭାଷଣ ସହ ଅତିଥି ପରିଚୟ ପ୍ରଦାନ କରିଥିଲେ । କାର୍ଯ୍ୟକ୍ରମର ଶେଷରେ କୁଚିଣ୍ଡା ବ୍ଲକ ସଭାପତି ରମେଶ ପ୍ରଧାନ ଧନ୍ୟବାଦ ଅର୍ପଣ କରିଥିଲେ ।

---------------

ହିନ୍ଦୁସ୍ଥାନ ସମାଚାର / ଶୈଳେଶ