“ବନ୍ଦେ ମାତରମ୍”ଗୀତ ହେଉଛି ରାଷ୍ଟ୍ରପ୍ରେମ, ଆତ୍ମବିଶ୍ୱାସ ଓ ଏକତାର ପ୍ରତୀକ : ବିଜୟ ପାଲ ସିଂ ତୋମାର
- “ବନ୍ଦେ ମାତରମ୍”ଗୀତର ଶୀର୍ଷକକୁ ରାଜନୈତିକ ସ୍ଳୋଗାନ ଓ ଆବାହ ସଂଗୀତ ଭାବେ ୧୫୦ ବର୍ଷ ଧରି ନିୟମିତ ବ୍ୟବହାର କରିବା ସାରା ବିଶ୍ୱରେ ବିରଳ ।
- ଏହି ମହାନ୍ ପରମ୍ପରାକୁ ସ୍ମରଣ କରିବା ଉଦ୍ଦେଶ୍ୟରେ ଯଶସ୍ୱୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଜୀଙ୍କ ଆହ୍ୱାନରେ ସାରା ଦେଶରେ ଏହି ଗୀତର ୧୫୦ତମ ପୂର୍ତି ପାଳନ ହେଉଛି ।
- ସ୍ୱଦେଶୀ ଦ୍ରବ୍ୟ ଆପଣାଇବା ପାଇଁ ଶପଥପାଠ କରାଗଲା
ନୂଆପଡ଼ା ଭୁବନେଶ୍ୱର, 07 ନଭେମ୍ବର (ହି.ସ.) - ସ୍ୱାଧୀନତା ସଂଗ୍ରାମ ଆନ୍ଦୋଳନରେ ସମସ୍ତଙ୍କ ପାଇଁ ପ୍ରେରଣା ପାଲଟିଥିବା ରାଷ୍ଟ୍ରଗୀତ “ବନ୍ଦେ ମାତରମ୍”ର ଶୀଷର୍କକୁ ନେଇ ଦେଶର ବିଭିନ୍ନ ଭାଷାରେ ନାଟକ ପ୍ରଦର୍ଶିତ ହୋଇଛି। ସାରା ବିଶ୍ୱରେ କୌଣସି ଏକ ଗୀତର ଶୀର୍ଷକକୁ ରାଜନୈତିକ ସ୍ଳୋଗାନ ଓ ଆବାହ ସଂଗୀତଭାବେ ୧୫୦ ବର୍ଷ ଧରି ନିୟମିତ ବ୍ୟବହାର କରିବା ସମ୍ପୂର୍ଣ୍ଣ ବିରଳ । “ବନ୍ଦେ ମାତରମ୍”ଗୀତ ହେଉଛି ରାଷ୍ଟ୍ରପ୍ରେମ, ଆତ୍ମବିଶ୍ୱାସ ଓ ଏକତାର ପ୍ରତୀକ ବୋଲି ବିଜେପି ରାଜ୍ୟ ପ୍ରଭାରୀ ବିଜୟ ପାଲ ସିଂ ତୋମାର କହିଛନ୍ତି ।
“ବନ୍ଦେ ମାତରମ୍”ର ୧୫୦ ବର୍ଷ ପୂର୍ତି ଉପଲକ୍ଷେ ବିଜେପି ଅନୁଷ୍ଠିତ କାର୍ଯ୍ୟକ୍ରମରେ ଶ୍ରୀ ତୋମାର କହିଛନ୍ତି ଯେ, ୧୮୭୫ ମସିହା ନଭେମ୍ବର ୭ ତାରିଖରେ ପ୍ରଖ୍ୟାତ ବଙ୍ଗଳା ଲେଖକ ବଙ୍କିମଚନ୍ଦ୍ର ଚଟ୍ଟୋପାଧ୍ୟାୟଙ୍କ ଦ୍ୱାରା ରଚିତ ଏହି ଗୀତିଟି ତାଙ୍କ ସମ୍ପାଦିତ ମାସିକ ସାହିତ୍ୟ ପତ୍ରିକା “ବଙ୍ଗ ଦର୍ଶନ”ରେ ପ୍ରଥମ ଥର ପାଇଁ ପ୍ରକାଶିତ ହୋଇଥିଲା। ସେହି ପ୍ରଥମ ସମ୍ପାଦନର ଏବେ ୧୫୦ ବର୍ଷ ପୂରଣ ହୋଇଛି। “ବନ୍ଦେ ମାତରମ୍” ଗୀତର ଶୀଷର୍କଟି ରାଜନୈତିକ ସ୍ଲୋଗାନ ରୂପେ ୧୯୦୫ ମସିହାରୁ ବ୍ୟବହୃତ ହୋଇ ଆସୁଛି। ୧୮୯୬ରେ କଲିକତାଠରେ ଅନୁଷ୍ଠିତ କଂଗ୍ରେସ ଅଧିବେଶନରେ “ବନ୍ଦେ ମାତରମ୍” ଗୀତକୁ ବିଶ୍ୱକବି ରବୀନ୍ଦ୍ରନାଥ ଟାଗୋର ନିଜେ ସ୍ୱର ସଂଯୋଜନା କରିବା ସହ ନିଜ କଣ୍ଠରେ ଗାନ କରିଥିଲେ। “ବନ୍ଦେ ମାତରମ୍” ନାମରେ କଲିକତାରେ ଏବଂ ଲଣ୍ଡନରେ ଇଂରାଜୀ ସମ୍ବାଦପତ୍ର ପ୍ରକାଶିତ ହୋଇଥିଲା।
୧୯୫୦ ମସିହା ଜାନୁଆରୀ ୨୪ ତାରିଖରେ ସମ୍ବିଧାନ ପ୍ରଣୟନ ସଭା ଦ୍ୱାରା ଜନଗଣ ମନକୁ ରାଷ୍ଟ୍ରୀୟ ସଂଗୀତ ଏବଂ “ବନ୍ଦେ ମାତରମ”କୁ ରାଷ୍ଟ୍ରୀୟ ଗୀତ ରୂପେ ସ୍ୱୀକୃତି ମିଳିଥିଲା। ଏହି ଗୀତଟି ୧୮୯୬ରୁ ୧୯୪୭ ପର୍ଯ୍ୟନ୍ତ ଭାରତବର୍ଷର ରାଜନୈତିକ ସଭାଗୁଡ଼ିକରେ ପାରମ୍ଭିକ ସଂଗୀତ ରୂପେ ଗାନ ହୋଇ ଆସୁଛି। ଏହି ମହାନ୍ ପରମ୍ପରାକୁ ସ୍ମରଣ କରିବା ଉଦ୍ଦେଶ୍ୟରେ ଯଶସ୍ୱୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଜୀଙ୍କ ଆହ୍ୱାନରେ ସାରା ଦେଶରେ ଏହି ଗୀତର ୧୫୦ତମ ପୂର୍ତି ପାଳନ ହେଉଛି । ଏହି ଅବସରରେ ମୋଦିଜୀ ଆଜି ଏକ ସ୍ମାରକୀ ଡାକ ଟିକେଟ ଓ ୧୫୦ ଟଙ୍କିଆ ମୁଦ୍ରା ଉନ୍ମୋଚନ କରିଛନ୍ତି ।
ଏହି ଅବସରରେ ଉପ ମୁଖ୍ୟମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହଦେଓ ଉପସ୍ଥିତ କାର୍ଯ୍ୟକର୍ତାମାନଙ୍କୁ ସ୍ୱଦେଶୀ ସାମଗ୍ରୀ ଓ ବସ୍ତୁ ଆପଣାଇବା ପାଇଁ ଶପଥପାଠ କରାଇଥିଲେ।
ନୂଆପଡ଼ା ବିଜେପି ଜିଲ୍ଲା ସଭାପତି କମଲେଶ ଦିକ୍ଷୀତ ଙ୍କ ସଭାପତିତ୍ୱ ରେ ହୋଇଥିବା ଆଜିର କାର୍ଯ୍ୟକ୍ରମ ରେ ଅନ୍ୟ ମାନଙ୍କ ମଧ୍ୟରେ ରାଜ୍ୟ ସହ ପ୍ରଭାରୀ ଶ୍ରୀମତି ଲତା ଉଷେଣ୍ଡି, ସାଂସଦ ପ୍ରତାପ ଷଡ଼ଙ୍ଗୀ, ବିଧାୟକ ଅମର ନାୟକ,ସନ୍ତୋଷ ଖଟୁଆ,ଦୁର୍ଗା ଚରଣ ତନ୍ତୀ,ଉମ ଚରଣ ମଲ୍ଲିକ,ବିଜୟ ଦଳବେହେରା , ରାଜ୍ୟ ସାଧାରଣ ସମ୍ପାଦକ ବିରଞ୍ଚି ନାରାୟଣ ତ୍ରୀପାଠୀ, ପୁର୍ଣିମା ନାୟକ , ରାଜ୍ୟ ସମ୍ପାଦକ ସରୋଜ କର, ସ୍ମିତା ପ୍ରଧାନ ଙ୍କ ସମେତ ଦଳର ଅନେକ ନେତୃୃବୃନ୍ଦ ଓ କାର୍ଯ୍ୟକର୍ତା ଉପସ୍ଥିତ ଥିଲେ।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
