ସମ୍ବଲପୁର, ୦୯ ନଭେମ୍ବର (ହି.ସ.) ଖଡିଆ ସାଂସ୍କୃତିକ ସେବା ସମାଜ ଆନୂକୁଲ୍ୟରେ ଧନକଉଡା ବ୍ଳକ ବସନ୍ତପୁର ପଞ୍ଚାୟତର ପାପଡେରା ଠାରେ ଆଜି ବାନ୍ଦେଇ ତିହାର ଅନୁଷ୍ଠିତ ହୋଇଯାଇଛି । ସମ୍ବଲପୁର ଜିଲ୍ଲା ସଭାପତି ରାଜୁ ଖଡିଆଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଖଡିଆ ସମାଜର ସମ୍ବଲପୁର, ବରଗଡ, ଝାରସୁଗୁଡା ଏବଂ ସୁନ୍ଦରଗଡ ଜିଲାରୁ ଆସିଥିବା କର୍ମକର୍ତ୍ତା ମାନେ ସାମିଲ ହୋଇଥିଲେ। ପ୍ରଥମେ ଗୋପୂଜନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହାପରେ ଅନୁଷ୍ଠିତ ସଭାରେ ବାନ୍ଦେର ତିହାର ର ମହତ୍ତ୍ବ ଉପରେ ଅତିଥି ମାନେ ମତବ୍ୟକ୍ତ କରିଥିଲେ । ଖଡିଆ ସାଂସ୍କୃତିକ ସେବା ସମାଜର ଉପସଭାପତି ତରଣୀ ଖଡିଆ ପ୍ରାରମ୍ଭିକ ସୂଚନା ଦେଇଥିଲେ । ଗୋରୁଗାଇ ଚାଷ କାର୍ଯ୍ୟରେ ସାହାଯ୍ୟ କରି ଖଡିଆ ସମାଜର ମଙ୍ଗଳ ସାଧନ କରିଥାନ୍ତି । ତେଣୁ କାର୍ତ୍ତିକ ପୂର୍ଣ୍ଣମୀ ଦିନ ସେମାନଙ୍କ ଗୋଡ ଧୋଇ, ତେଳ ଫୁଳ ଦେଇ ସୁଖାଦ୍ୟ ଖାଇବାକୁ ଦିଆଯାଏ ବୋଲି ଉପସଭାପତି ବସନ୍ତ କୋକବାକ ସୂଚନା ଦେଇଥିଲେ । ବର୍ତ୍ତମାନ ସମୟରେ ଅନେକ ପରମ୍ପରାକୁ ସମାଜର ଯୁବପିଢୀକୁ ଜଣାଇବା ପାଇଁ ଏହାର ସାମୁହିକ ଭାବେ ଆୟୋଜନ କରାଯାଉଛି । ସୁନ୍ଦରଗଡ ଜିଲାରୁ ଆସିଥିବା ଶ୍ରୀରାମ କୁଲୁ କାର୍ଯ୍ୟକ୍ରମରେ ଖଡିଆ ସମାଜର ଶିକ୍ଷା, ସ୍ବାସ୍ଥ୍ୟ, ଅର୍ଥନୈତିକ ବିକାଶ ସହ ସାମାଜିକ ସଂସ୍କାର ଏବଂ ଭାଷା ସଂସ୍କୃତିର ସଂରକ୍ଷଣ ଉପରେ ଆଳୋଚନା କରିଥିଲାଲେ । ଏହାପୂର୍ବରୁ ଖଡିଆ ସମାଜର ପୂର୍ବ ପୁରୁଷ ମାନଙ୍କୁ ସ୍ମରଣ କରାଯିବା ସହ କରମସାନୀ ଏବଂ ସମଲେଇଙ୍କ ପୂଜାର୍ଚ୍ଚନା କରାଯାଇ ମଞ୍ଚ ରେ କାର୍ଯ୍ୟକ୍ରମ ଆୟୋଜନ କରାଯାଇଥିଲା । କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସୁନ୍ଦରାଗଡ ଜିଲାରୁ ଚୁନୂ କୁଲୁ, ସନ୍ତୋଷ କେରକେଟା, ଶିବ କିଡୋ, ରମେଶ ସୁରେନ, ଧମା ଅଞ୍ଚଳରୁ ସୁନିଲ ବାଗ, ଝୁନୁ ଖଡିଆ, ଧନକଉଡା ସଭାପତି ପ୍ରଫୁଲ୍ଲ ଖଡିଆ ପ୍ରମୁଖ ମଞ୍ଚାସୀନ ରହିଥିଲେ । ସଭା ଶେଷରେ ବିଷ୍ଣୁ କଡିଆ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମ ଆୟୋଜନରେ ଦିଲିପ ଖଡିଆ, ଡାକ୍ତର ଖଡିଆ, ବସନ୍ତ ଖଡିଆ, ସୁଗ୍ରୀବ ଖଡିଆ, ସଙ୍ଗର ଖଡିଆ ସହଯୋଗ କରିଥିଲେ ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
