– ଦିଲ୍ଲୀର ମୁଖ୍ୟମନ୍ତ୍ରୀ ଏବଂ ସଂଘର ଅଖିଳ ଭାରତୀୟ କାର୍ଯ୍ୟକାରିଣୀ ସଦସ୍ୟ ଇନ୍ଦ୍ରେଶ କୁମାର କାର୍ଯ୍ୟକ୍ରମରେ ଉପସ୍ଥିତ ରହିବେ

ନୂଆଦିଲ୍ଲୀ, 10 ଡିସେମ୍ବର (ହି.ସ.)। ରାଷ୍ଟ୍ରୀୟ ସ୍ୱୟଂସେବକ ସଂଘର ସ୍ଥାପନାର 100ତମ ବାର୍ଷିକୀ ଅବସରରେ, ଆସନ୍ତା ବୁଧବାର (11 ଡିସେମ୍ବର) ଦିନ 12:30ରେ ଇନ୍ଦିରା ଗାନ୍ଧୀ ରାଷ୍ଟ୍ରୀୟ କଳା କେନ୍ଦ୍ରର ସମବେତ ସଭାଗୃହରେ ‘ହିନ୍ଦୁସ୍ଥାନ ସମାଚାର’ ଦ୍ୱାରା ‘‘ସାମାଜିକ-ସାଂସ୍କୃତିକ ଚେତନା ଏବଂ ସଂଘ’’ ବିଷୟରେ କାର୍ଯ୍ୟକ୍ରମର ଆୟୋଜନ କରାଯିବ।

ଏହି କାର୍ଯ୍ୟକ୍ରମର ପ୍ରମୁଖ ଉଦ୍ଦେଶ୍ୟ ଦେଶରେ ସାମାଜିକ ଓ ସାଂସ୍କୃତିକ ଚେତନାକୁ ଜାଗ୍ରତ କରିବା ଏବଂ ସଂଘର ଅବଦାନକୁ ସାଧାରଣ ଲୋକ ମାନଙ୍କ ମଧ୍ୟରେ ପହଁଚାଇବା ରହିଛି ।

କାର୍ଯ୍ୟକ୍ରମ ସଂଯୋଜକ ହିନ୍ଦୁସ୍ଥାନ ସମାଚାରର କ୍ଷେତ୍ରୀୟ ସମ୍ପାଦକ ଡ. ରାଜେଶ ତିୱାରୀ ବୁଧବାର ଦିନ ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ କାର୍ଯ୍ୟକ୍ରମର ମୁଖ୍ୟ ଅତିଥି ଦିଲ୍ଲୀର ମୁଖ୍ୟମନ୍ତ୍ରୀ ରେଖା ଗୁପ୍ତା ହେବେ। ଅଧ୍ୟକ୍ଷତା ହିନ୍ଦୁସ୍ଥାନ ସମାଚାରର ସମୂହ ସମ୍ପାଦକ ଏବଂ ଇନ୍ଦିରା ଗାନ୍ଧୀ ରାଷ୍ଟ୍ରୀୟ କଳା କେନ୍ଦ୍ରର ଅଧ୍ୟକ୍ଷ ରାମବାହାଦୁର ରାୟ କରିବେ। ହିନ୍ଦୁସ୍ଥାନ ସମାଚାର ଗ୍ରୁପର ଅଧ୍ୟକ୍ଷ ଅରବିନ୍ଦ ଭାଲଚନ୍ଦ୍ର ମାର୍ଡିକରଙ୍କ ବିଶେଷ ଉପସ୍ଥିତି ରହିବ।

ଡ଼ଃ ତିୱାରୀ କହିଛନ୍ତି ଯେ କାର୍ଯ୍ୟକ୍ରମର ମୁଖ୍ୟ ବକ୍ତା ଜାତୀୟ ସ୍ୱୟଂସେବକ ସଂଘର ଅଖିଳ ଭାରତୀୟ କାର୍ଯ୍ୟକାରିଣୀ ସଦସ୍ୟ ଇନ୍ଦ୍ରେଶ କୁମାର ଆଧୁନିକ ସମାଜରେ ସାଂସ୍କୃତିକ ଚେତନା ଏବଂ ସାମାଜିକ ଦାୟିତ୍ୱର ଗୁରୁତ୍ୱ ଉପରେ ନିଜ ମତାମତ ରଖିବେ । ସେ କହିଛନ୍ତି ଯେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ରେଖା ଗୁପ୍ତା ସାମାଜିକ ଚେତନା ଏବଂ ଯୁବକମାନଙ୍କ ମଧ୍ୟରେ ନେତୃତ୍ୱ କ୍ଷମତା ବୃଦ୍ଧି ବିଷୟରେ ଆଲୋକ ପାତ କରିବେ। ସେହିପରି ଇସ୍କନ ବେଙ୍ଗାଲୁରୁର ଉପାଧ୍ୟକ୍ଷ ଭରତର୍ଷଭ ଦାସ କାର୍ଯ୍ୟକ୍ରମର ବିଶିଷ୍ଟ ଅତିଥି ହେବେ।

କାର୍ଯ୍ୟକ୍ରମର ସଂଯୋଜକ ଡ଼ଃ ତିୱାରୀ କହିଛନ୍ତି ଯେ ସଂଘର ଶତାବ୍ଦୀ ଯାତ୍ରା ସଂଘର୍ଷ, ସେବା, ସମର୍ପଣ, ସଂଗଠନ ଏବଂ ସଂସ୍କାରରେ ପରିପୂର୍ଣ୍ଣ । ସଂଘର ସ୍ପଷ୍ଟ ମତ ଯେ ଭାରତୀୟ ସଂସ୍କୃତିରେ ନିହିତ ମୂଳ ତତ୍ତ୍ୱଗୁଡ଼ିକ ହିଁ ରାଷ୍ଟ୍ର ନିର୍ମାଣ ପାଇଁ ଆବଶ୍ୟକ । ସମତା ଏବଂ ବନ୍ଧୁତାରେ ଆଧାରିତ ସମାଜ ଗଠନ ହିଁ ସଂଘର ଲକ୍ଷ୍ୟ।ସେ କହିଛନ୍ତି ଯେ ପ୍ରତ୍ୟେକ ବ୍ୟକ୍ତିଙ୍କୁ ଏହା ବୁଝିବା ଆବଶ୍ୟକ ଯେ ସେ ନିଜ ଦେଶକୁ କେଉଁ ଦିଗକୁ ନେବାକୁ ଚାହୁଁଛି ଏବଂ ସେଥିରେ ତାଙ୍କର ଅଂବଦାନ କ’ଣ ହୋଇପାରେ। ସଂଘ ନିଜ ସ୍ୱୟଂସେବକମାନଙ୍କୁ ଭାରତ-ବୋଧରୁ ପ୍ରେରିତ କରି ନିଷ୍କାମ କର୍ମ ଏବଂ ନିଃସ୍ୱାର୍ଥ ସେବାର ପାଠ ପଢ଼ାଏ। ଏହା ସବୁ ଜୀବନରେ ଆଧ୍ୟାତ୍ମିକତାର ସମାବେଶ ଦ୍ୱାରା ମାତ୍ର ସମ୍ଭବ ବୋଲି ମନେ କରାଯାଏ ବୋଲି ସେ କହିଛନ୍ତି ।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ