ଭୁବନେଶ୍ୱର, ୧୩ ଡିସେମ୍ବର (ହି.ସ)- ଗତ କାଲି ଭୁବନେଶ୍ୱରର ସତ୍ୟ ବିହାର ଅଞ୍ଚଳର ପଳାସୁଣିରେ 'ନୋ ଲିମିଟ୍ ଏୟାର' ନାମକ ଏକ ରେଷ୍ଟୁରାଣ୍ଟରେ ଭୋର ସମୟରେ ଅଗ୍ନିକାଣ୍ଡ ଘଟିଥିଲା। ଉକ୍ତ ରେଷ୍ଟୁରାଂଟର କୌଣସି ମଦ ଅନ୍ ସପ୍ (ବାର) ଲାଇସେନ୍ସ ନଥିଲା, କିମ୍ବା ଏହା ପାଇଁ ଅବକାରୀ ବିଭାଗକୁ ଆବେଦନ କରିନଥିଲା ବୋଲି ଅବକାରୀ ବିଭାଗ ପକ୍ଷରୁ ସସ୍ପଷ୍ଟ କରାଯାଇଛି।।

ଏକ ମାସ ପୂର୍ବେ ଅବକାରୀ ଅଧିକାରୀ ଏବଂ କର୍ମଚାରୀଙ୍କ ଏକ ଦଳ ରେଷ୍ଟୁରାଂଟ ଏକ ବେଆଇନ ମଦ ବାର୍ ଚଳାଉଥିବା ଅଭିଯୋଗ ଉପରେ ଚଢାଉ କରିଥିଲା। ଖୋଜାଖୋଜି ସମୟରେ କୌଣସି ମଦ ମିଳିନଥିଲା ଏବଂ ବେଆଇନ ମଦ ବାର୍ ର କୌଣସି ପ୍ରମାଣ ପ୍ରତିଷ୍ଠା ହୋଇପାରିନଥିଲା। ଉକ୍ତ ରେଷ୍ଟୁରାଂଟ ଏନଏଚ ୧୬ ରେ ଅବସ୍ଥିତ ହୋଇଥିବାରୁ ସକାଳ ୪ଟା ପର୍ଯ୍ୟନ୍ତ ଚାଲିବା ପାଇଁ ବିଏମସି ଦ୍ୱାରା ଜାରି ଅନୁମତି ଦେଖାଇଥିଲା। କାଫେ ମାଲିକଙ୍କୁ ବୈଧ ଅବକାରୀ ଲାଇସେନ୍ସ ବିନା ମଦ ବିକ୍ରୟ ନକରିବାକୁ କିମ୍ବା ତାଙ୍କ ପରିସରରେ କାହାକୁ ମଦ ପିଇବାକୁ ନଦେବାକୁ ଚେତାବନୀ ଦିଆଯାଇଥିଲା।

ରେଷ୍ଟୁରାଂଟ ଭିତର କାର୍ଯ୍ୟକଳାପର ତଦନ୍ତ ପାଇଁ ଅବକାରୀ ଅଧୀକ୍ଷକ, ରାଜ୍ୟ ଫ୍ଲାଇଂ ସ୍କ୍ୱାଡ୍ ଏବଂ ଅବକାରୀ ଅଧୀକ୍ଷକ ଭୁବନେଶ୍ୱର ଦ୍ୱାରା ଏକ ମିଳିତ ତଦନ୍ତ କରାଯାଉଛି।

ଗତ କିଛି ମାସ ମଧ୍ୟରେ, ଭୁବନେଶ୍ୱର ଅବକାରୀ ବିଭାଗ ଦ୍ୱାରା ଚଢାଉ କରାଯାଇ ଘାଟିକିଆରେ ସ୍କାଏ ହାଇ, ବାପୁଜୀ ନଗରରେ ମେରୀ ଗୋଲ୍ଡ, ପଟିଆରେ ସିଲିସିୟସ୍ ଏବଂ ସମରା ରେଷ୍ଟ୍ରୋବାର୍ସ ନାମକ ଚାରୋଟି ରେଷ୍ଟୁରାଂଟ ବିନା ଲାଇସେନ୍ସରେ ମଦ ବାର୍ ଚଲାଉଥିବାର ଜଣାପଡ଼ିଥିଲା। ବିଭିନ୍ନ ବ୍ରାଣ୍ଡର ମଦ ବୋତଲ ଜବତ କରାଯାଇଥିଲା, ଅପରାଧୀମାନଙ୍କୁ ଗିରଫ କରାଯାଇଥିଲା ଏବଂ ଅବକାରୀ ମାମଲା ରୁଜୁ କରାଯାଇଥିଲା।

ସମସ୍ତ ଅବକାରୀ ପ୍ରବର୍ତନ ଅଧୀକ୍ଷକଙ୍କୁ ରାଜ୍ୟରେ ବେଆଇନ ବିକ୍ରୟ ସ୍ଥାନଗୁଡ଼ିକ ଉପରେ ନିରନ୍ତର ଚଢାଉ କରିବା ଏବଂ ବାର, ହୋଟେଲ, ରେଷ୍ଟୁରାଂଟ ଏବଂ ଢାବାଗୁଡ଼ିକର ଯାଂଚ କରି ଗିରଫ ଏବଂ ଜବତ କରିବାକୁ ନିର୍ଦ୍ଦେଶ ଦିଆଯାଇଛି। ସେମାନଙ୍କୁ ସିଗାରେଟ୍‌, ହୁକ୍କା କିମ୍ବା ଯେକୌଣସି ତମାଖୁ ଉତ୍ପାଦ ପରି ସାର୍ବଜନୀନ ଧୂମପାନକୁ ଅନୁମତି ଦେଉଥିବା ରେଷ୍ଟୁରାଂଟ ଏବଂ ବାରଗୁଡ଼ିକୁ ଯାଂଚ କରିବାକୁ ଏବଂ ଉଙଞଚଇ ଆଇନ ଅନୁଯାୟୀ ଦୋଷୀମାନଙ୍କ ବିରୁଦ୍ଧରେ ମାମଲା ରୁଜୁ କରିବାକୁ ନିର୍ଦ୍ଦେଶ ଦିଆଯାଇଛି। ସମସ୍ତ ଲାଇସେନ୍ସପ୍ରାପ୍ତ ଦୋକାନରେ ଅଗ୍ନି ନିରାପତା ବ୍ୟବସ୍ଥା ଯାଂଚ କରିବାକୁ ଏବଂ ପାଳନ ସୁନିଶ୍ଚିତ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।

---------------

ହିନ୍ଦୁସ୍ଥାନ ସମାଚାର / ବନ୍ଦନା