ନୂଆଦିଲ୍ଲୀ, 19 ଡିସେମ୍ବର (ହି.ସ.)- ଗୋଆ ମୁକ୍ତି ଦିବସ ଅବସରରେ ରାଷ୍ଟ୍ରପତି
ଦ୍ରୌପଦୀ ମୁର୍ମୁ,
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ରୀୟ ଗୃହମନ୍ତ୍ରୀ ଅମିତ
ଶାହ ଶୁକ୍ରବାର ଗୋଆକୁ ପୁର୍ତ୍ତୁଗୀଜ୍ ଶାସନରୁ ମୁକ୍ତ କରିବାରେ ଲଢ଼ିଥିବା ସେନାନୀମାନଙ୍କର
ସାହସ ଓ ବଳିଦାନକୁ ନମନ କରିଛନ୍ତି ଏବଂ ଗୋଆର ଜନତାଙ୍କ ଉଜ୍ଜ୍ୱଳ ଓ ସମୃଦ୍ଧ ଭବିଷ୍ୟତ ପାଇଁ
କାମନା କରିଛନ୍ତି।
ରାଷ୍ଟ୍ରପତି ଦ୍ରୌପଦୀ
ମୁର୍ମୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ କହିଛନ୍ତି ଯେ ଗୋଆ ମୁକ୍ତି ଦିବସ ଅବସରରେ ଦେଶ
ସେହି ବୀରମାନଙ୍କୁ କୃତଜ୍ଞତା ସହ ସ୍ମରଣ କରୁଛି, ଯେଉଁମାନେ
ଉପନିବେଶ ଶାସନ ବିରୋଧରେ ନିରନ୍ତର ସଂଘର୍ଷ କରିଥିଲେ। ସେ ସ୍ୱାଧୀନତା ସେନାନୀ ଓ ସଶସ୍ତ୍ର
ବାହିନୀଙ୍କ ଅତୁଟ ସଙ୍କଳ୍ପ ଓ ସମର୍ପଣକୁ ନମନ କରି ଗୋଆବାସୀଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ କାମନା
କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର
ମୋଦୀ ‘ଏକ୍ସ’ରେ ସେୟାର କରିଥିବା ବାର୍ତ୍ତାରେ କହିଛନ୍ତି ଯେ ଗୋଆ ମୁକ୍ତି ଦିବସ ଦେଶର ଜାତୀୟ
ଯାତ୍ରାର ଏକ ନିର୍ଣ୍ଣାୟକ ଅଧ୍ୟାୟକୁ ସ୍ମରଣ କରାଏ। ସେ କହିଛନ୍ତି ଯେ ଅନ୍ୟାୟ ବିରୋଧରେ ଦୃଢ଼ ଭାବେ
ଠିଆ ହୋଇ ସ୍ୱାଧୀନତା ପାଇଁ ଯୁଦ୍ଧ କରିଥିବାମାନଙ୍କର ଅଦମ୍ୟ ସାହସ ଆଜି ମଧ୍ୟ ପ୍ରେରଣା ଦେଉଛି
ଏବଂ ଗୋଆର ସର୍ବାଙ୍ଗୀଣ ବିକାଶ ପ୍ରୟାସକୁ ଦିଗଦର୍ଶନ ଦେଉଛି।
କେନ୍ଦ୍ରୀୟ ଗୃହମନ୍ତ୍ରୀ
ଅମିତ ଶାହ ଗୋଆର ଜନତାଙ୍କୁ ଶୁଭେଚ୍ଛା ଜଣାଇ କହିଛନ୍ତି ଯେ ୧୯୬୧ ପର୍ଯ୍ୟନ୍ତ ଭାରତୀୟମାନଙ୍କୁ
ଗୋଆ ଯିବା ପାଇଁ ଅନୁମତି ନେବାକୁ ପଡ଼ୁଥିଲା। ସେ ପ୍ରଭାକର ବୈଦ୍ୟ, ବାଲା ରାୟ ମାପାରୀ, ନାନାଜୀ
ଦେଶମୁଖ ଏବଂ ଜଗନ୍ନାଥ ରାଓ ଜୋଶୀ ସହିତ ସେହି ମହାନ ବ୍ୟକ୍ତିମାନଙ୍କୁ ସ୍ମରଣ କରିଛନ୍ତି, ଯେଉଁମାନେ ଗୋଆର ମୁକ୍ତି ପାଇଁ ସଂଘର୍ଷ କରିଥିଲେ। ସେ କହିଛନ୍ତି ଯେ
ଦେଶଭକ୍ତମାନଙ୍କର ବଳିଦାନ ପରେ ହିଁ ଗୋଆ ଭାରତର ଅଭିନ୍ନ ଅଂଶ ହୋଇପାରିଥିଲା।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
19 Dec 2025