ନୂଆଦିଲ୍ଲୀ, 30 ଡିସେମ୍ବର (ହି.ସ.)- ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେତାଜୀ ସୁଭାଷ ଚନ୍ଦ୍ର ବୋଷଙ୍କୁ
ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ପ୍ରଧାନମନ୍ତ୍ରୀ ମୋଦି ସ୍ମରଣ କରାଇଛନ୍ତି ଯେ ଆଜିଠାରୁ ଠିକ୍
୮୨ ବର୍ଷ ପୂର୍ବେ, ଅର୍ଥାତ୍ ୩୦ ଡିସେମ୍ବର ୧୯୪୩ ରେ, ନେତାଜୀ ଆଣ୍ଡାମାନ ଓ
ନିକୋବାର ଦ୍ୱୀପପୁଞ୍ଜର ରାଜଧାନୀ ପୋର୍ଟ ବ୍ଲେୟାରରେ ସାହସ ଓ ପରାକ୍ରମ ସହିତ ଭାରତୀୟ ତିରଙ୍ଗା
ପତାକା ଉତ୍ତୋଳନ କରିଥିଲେ।
ପ୍ରଧାନମନ୍ତ୍ରୀ ମୋଦୀ ‘ଏକ୍ସ’ ରେ ପୋଷ୍ଟ କରି ଲେଖିଛନ୍ତି—
“ଆଜିହିଁ ୩୦ ଡିସେମ୍ବର, ୧୯୪୩ ରେ ନେତାଜୀ ସୁଭାଷ
ଚନ୍ଦ୍ର ବୋଷ ପୋର୍ଟ ବ୍ଲେୟାରରେ ସାହସ ଓ ପରାକ୍ରମ ସହିତ ତିରଙ୍ଗା ଉଡାଇଥିଲେ। ସେହି
ମୁହୂର୍ତ୍ତ ଆମକୁ ସ୍ମରଣ କରାଏ ଯେ ସ୍ୱାଧୀନତା କେବଳ ଆକାଂକ୍ଷାରୁ ନୁହେଁ,
ବରଂ
ସାମର୍ଥ୍ୟ, ପରିଶ୍ରମ, ନ୍ୟାୟ ଓ ସଂଗଠିତ ସଙ୍କଳ୍ପରୁ ଗଢ଼ିଉଠେ।
ଆଜିର ସୁଭାଷିତ ଏହି ଭାବକୁ ହିଁ ପ୍ରକାଶ କରେ।”
ଏହା ସହିତ ସେ ଏକ ସଂସ୍କୃତ ସୁଭାଷିତ ମଧ୍ୟ ସେୟାର କରିଛନ୍ତି—
ସାମର୍ଥ୍ୟମୂଳଂ ସ୍ୱାତନ୍ତ୍ର୍ୟଂ ଶ୍ରମମୂଳଂ ଚ ବୈଭବମ୍।
ନ୍ୟାୟମୂଳଂ ସୁରାଜ୍ୟଂ ସ୍ୟାତ୍ ସଙ୍ଘମୂଳଂ ମହାବଲମ୍ ॥
ଏହାର ଅର୍ଥ ହେଲା— ସ୍ୱାଧୀନତାର ମୂଳ ସାମର୍ଥ୍ୟରେ ଅଛି,
ବୈଭବର
ମୂଳ ପରିଶ୍ରମରେ, ସୁଶାସନର ମୂଳ ନ୍ୟାୟରେ ଏବଂ ମହାଶକ୍ତିର ମୂଳ ସଂଗଠନରେ ଅଛି।
ଉଲ୍ଲେଖନୀୟ ଯେ ଏହି ଐତିହାସିକ ଘଟଣା ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଘଟିଥିଲା,
ଯେତେବେଳେ
ଜାପାନୀ ସେନାର ସହଯୋଗରେ ନେତାଜୀଙ୍କ ଆଜାଦ ହିନ୍ଦ ଫୌଜ ଆଣ୍ଡାମାନ ଉପରେ ନିୟନ୍ତ୍ରଣ ସ୍ଥାପନ
କରି, ସେଠାରେ ତିରଙ୍ଗା ଉଡାଇ ଏହାକୁ ବ୍ରିଟିଶ ଶାସନରୁ ମୁକ୍ତ ଭାରତୀୟ
ଭୂମି ଭାବେ ଘୋଷଣା କରିଥିଲେ।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
