ସମ୍ବଲପୁର, ୧୬ ଜୁନ୍ (ହି.ସ.) ଦୁବାଇରେ ଅବସ୍ଥାନ କରୁଥିବା ସମ୍ବଲପୁରର ତିଶ୍ୟା ପାଣିଗ୍ରାହୀ ଓମାନ୍ର ଗାର୍ଡେନ୍ ଅଫ୍ ଇଡେନ୍ ସମୁଦ୍ରରେ ୧୦୦ ଫୁଟ୍ ଗଭୀରକୁ ସ୍କୁବା ଡାଇଭ୍ କରି ନୂଆ କୀର୍ତ୍ତିମାନ ସ୍ଥାପନ କରିଛନ୍ତି । ନିଜର ୧୫ ତମ ଜନ୍ମ ଦିବସ ଏବଂ ବିଶ୍ୱ ସମୁଦ୍ର ଦିବସ ଅବସରରେ ସେ ଏହି ସଫଳତା ହାସଲ କରିଛନ୍ତି । ୨୦୨୦ରେ ତିଶ୍ୟା ୧୦ ବର୍ଷ ବୟସରେ ଓଡ଼ିଶାର ସର୍ବ କନିଷ୍ଠ ସ୍କୁବା ଡାଇଭର ଆଖ୍ୟା ଅର୍ଜନ କରିଥିଲେ । ୧୨ ବର୍ଷ ବୟସରେ ୨୧ ମିଟର ଗଭୀର ସମୁଦ୍ରକୁ ଡାଇଭ୍ କରି ଆର୍ନ୍ତଜାତୀୟ ପେଡ଼ି ସଂସ୍ଥା ଦ୍ୱାରା ଏଡ଼୍ଭାନ୍ସ ୱାଟର ଡାଇଭର ମାନ୍ୟତା ପାଇଥିଲେ । ଏବେ ସଦ୍ୟତମ ଡାଇଭ୍ରେ ନିଜ ବାପା ତଥା ପେଡ଼ି ମାନ୍ୟତା ପ୍ରାପ୍ତି ସ୍କୁବା ଡାଇଭର ପ୍ରିୟଦର୍ଶୀ ପାଣିଗ୍ରାହୀ ମଧ୍ୟ ତାଙ୍କ ସହିତ ଅତଳ ସମୁଦ୍ରକୁ ଡାଇଭ୍ କରିବାରେ ସାମିଲ ହୋଇଥିଲେ । ଓମାନ୍ର ନାସେର୍ ଅଲ୍-ଖାନ୍ଜରୀ (ମସ୍କଟ୍ ଓମାନ୍ଟା ସ୍କୁବା ଡାଇଭିଂ ଏକାଡ଼େମୀର ମାଲିକ) ମଧ୍ୟ ଥିଲେ । ଗତ ୮ ତାରିଖ ଦିନ ଏହି କୀର୍ତ୍ତିମାନ ସମୟରେ ତିଶ୍ୟା ନିଜର ୧୫ତମ ଜନ୍ମ ଦିବସ ଏବଂ ବିଶ୍ୱସମୁଦ୍ର ଦିବସର ପ୍ଳାକାର୍ଡ ସମୁଦ୍ର ଭିତରୁ ପ୍ରଦର୍ଶନ କରିଥିଲେ । ସମୁଦ୍ର ତଳରେ ବିଭିନ୍ନ ପ୍ରଜାତିର ମାଛ ସହିତ କଇଁଛମାନଙ୍କ ଗହଣରେ ତିଶ୍ୟା କିଛି ସମୟ ଅତିବାହିତ କରିଥିଲେ । ତିଶ୍ୟା ପୂର୍ବତନ ସାଂସଦ ତଥା ମନ୍ତ୍ରୀ ଶ୍ରୀବଲ୍ଳଭ ପାଣିଗ୍ରାହୀ ଏବଂ ସମ୍ବଲପୁର ସରକାରୀ ମହିଳା କଲେଜ ପ୍ରାକ୍ତନ ଅଧ୍ୟକ୍ଷା ସୁନନ୍ଦା ପାଣିଗ୍ରାହୀ ଓ ପୂର୍ବତନ ବିଧାୟକ ଡା. ରାସେଶ୍ୱରୀ ପାଣିଗ୍ରାହୀଙ୍କ ନାତୁଣୀ ଅଟନ୍ତି ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
