ନୂଆଦିଲ୍ଲୀ, 17 ଜୁନ (ହି.ସ.)। ପରମ ଶକ୍ତିପୀଠର ଅଧ୍ୟକ୍ଷା ସାଧ୍ବୀ ଋତମ୍ଭରା କହିଛନ୍ତି ଯେ, କୃଷ୍ଣ ଜନ୍ମଭୂମିରେ ଭଗବାନ୍ ଶ୍ରୀକୃଷ୍ଣଙ୍କ ଏକ ଭବ୍ୟ ମନ୍ଦିର ନିଶ୍ଚିତ ଭାବେ ନିର୍ମିତ ହେବ ଏବଂ ନ୍ୟାୟାଳୟ ତରଫରୁ ଖୁବ ଶୀଘ୍ର ଏ ସମ୍ପର୍କିତ ରାୟ ସାମନାକୁ ଆସିବ । ଦିଲ୍ଲୀ ବିଧାନସଭା ବାଚସ୍ପତି ଵିଜେନ୍ଦ୍ର ଗୁପ୍ତାଙ୍କ ସହିତ ହମାରେ ପ୍ରେରଣା ସ୍ରୋତ: ଦ୍ୱାପର କେ ଶ୍ରୀକୃଷ୍ଣ ନାମକ ପୁସ୍ତକର ଲୋକାର୍ପଣ ଅବସରରେ ସେ ଏହା କହିଛନ୍ତି ।
ଏହି ପୁସ୍ତକର ଲୋକାର୍ପଣ ଦିଲ୍ଲୀର ଶ୍ରୀ ଆଲ୍ ଇଣ୍ଡିଆ ଶ୍ୱେତାମ୍ବର ସ୍ଥାନକବାସୀ ଜୈନ କନ୍ଫରେନ୍ସ ର କେନ୍ଦ୍ରୀୟ କାର୍ଯ୍ୟାଳୟ (ଜୈନ ଭବନ) ଅବସ୍ଥିତ ସଭାଗାରରେ ହୋଇଥିଲା। ପୁସ୍ତକଟି ଲେଖକ ଦୀପକ କୁମାର ଦ୍ୱାରା ରଚିତ।
ଲୋକାର୍ପଣ ସମାରୋହରେ ବିଶେଷ ଅତିଥି ଭାବରେ ସାଧ୍ବୀ ଋତମ୍ଭରାଙ୍କ ସହିତ ବିଶିଷ୍ଟ ଅତିଥି ଭାବରେ ଶ୍ରୀ ଆଲ୍ ଇଣ୍ଡିଆ ଶ୍ୱେତାମ୍ବର ସ୍ଥାନକବାସୀ ଜୈନ କନ୍ଫରେନ୍ସ ର ଜାତୀୟ ଅଧ୍ୟକ୍ଷ ଅତୁଲ୍ ଜୈନ ଏବଂ ମହାମନ୍ତ୍ରୀ ଡ଼ଃ ଅମିତରାୟ ଜୈନ, ଅଖିଲ ଭାରତୀୟ ଇତିହାସ ସଂକଳନ ଯୋଜନା ର ଜାତୀୟ ସଂଗଠନ ସଚିବ ଡ଼ଃ ବାଳମୁକୁନ୍ଦ ପାଣ୍ଡେ, ଦିଲ୍ଲୀ ବିଧାନସଭା ଅଧ୍ୟକ୍ଷ ବିଜେନ୍ଦ୍ର ଗୁପ୍ତା, ବରିଷ୍ଠ ଅଧିବକ୍ତା ବିଷ୍ଣୁ ଶଙ୍କର ଜୈନ, ଜୈନ କନ୍ଫରେନ୍ସ ର ଜାତୀୟ ସମନ୍ୱୟକ ପ୍ରଶାନ୍ତ ଜୈନ ସହିତ ଅନେକ ଅନ୍ୟାନ୍ୟ ଗଣମାନ୍ୟ ବ୍ୟକ୍ତିବର୍ଗ ଅଂଶଗ୍ରହଣ କରିଥିଲେ।
ଦୀପ ପ୍ରଜ୍ଵଳନ ସହ ଆରମ୍ଭ ହୋଇଥିବା ସମାରୋହକୁ ସମ୍ବୋଧନ କରିବାବେଳେ ଜୈନ କନ୍ଫରେନ୍ସ ର ଜାତୀୟ ଅଧ୍ୟକ୍ଷ ଅତୁଲ୍ ଜୈନ ଭଗବାନ ଶ୍ରୀକୃଷ୍ଣ ସହ ସଂପୃକ୍ତ ଅନେକ ପ୍ରସଙ୍ଗକୁ ଉଲ୍ଲେଖ କରି କହିଥିଲେ ଯେ, ଜୈନ ଧର୍ମର ୨୨ତମ ତୀର୍ଥଙ୍କର ଅରିଷ୍ଟନେମି ଜୀ, ଭଗବାନ ଶ୍ରୀକୃଷ୍ଣଙ୍କର ଭାଇ ଥିଲେ। ସେ କହିଲେ ଯେ ଭଗବାନ ଶ୍ରୀକୃଷ୍ଣ ଆମ ସମସ୍ତଙ୍କର ଆଦର୍ଶ ଓ ପ୍ରେରଣା ସ୍ରୋତ। ପୁସ୍ତକ ରୂପେ ଏହା ଗୋଟିଏ ଏମିତି ଗଭୀର ଗବେଷଣାମୂଳକ ଗ୍ରନ୍ଥ ଯାହା ମାଧ୍ୟମରେ ଭଗବାନ ଶ୍ରୀକୃଷ୍ଣଙ୍କର ଜୀବନ ଦର୍ଶନକୁ ପ୍ରତ୍ୟକ୍ଷ ଭାବରେ ଜଣାଯାଇପାରିବ ଓ ବୁଝାଯାଇପାରିବ।
ସମାରୋହରେ ଅଖିଲ ଭାରତୀୟ ଇତିହାସ ସଂକଳନ ଯୋଜନା ର ଜାତୀୟ ସଂଗଠନ ସଚିବ ଡ଼ଃ ବାଳମୁକୁନ୍ଦ ପାଣ୍ଡେ ମଥୁରା ଅବସ୍ଥିତ ଶ୍ରୀକୃଷ୍ଣ ଜନ୍ମଭୂମି ସଂପର୍କରେ ଉଲ୍ଲେଖ କରି କହିଥିଲେ ଯେ, ବିଶ୍ୱରେ ବସୁଥିବା ପ୍ରତ୍ୟେକ ହିନ୍ଦୁ ଓ ହିନ୍ଦୁ ସମାଜ ଶ୍ରୀକୃଷ୍ଣ ଜନ୍ମଭୂମିକୁ ମୁକ୍ତ କରାଇବା ପାଇଁ ସମ୍ପୂର୍ଣ୍ଣ ଭାବେ ସମର୍ଥ। କିନ୍ତୁ ଆମେ ସଂବିଧାନ ଓ ଆଇନର ମାଧ୍ୟମରେ ସେଠାରେ ଦିନେ ନିଶ୍ଚିତ ଭାବରେ ମନ୍ଦିର ନିର୍ମାଣ କରିବୁ।
ସେ କହିଥିଲେ ଯେ, ଭଗବାନ ଶ୍ରୀକୃଷ୍ଣଙ୍କୁ ଭକ୍ତିଭାବରେ ଜାଣିବା କାମ ସମସ୍ତେ କରନ୍ତି, କିନ୍ତୁ ସତ୍ୟ ହେଉଛି ଯେ ଭଗବାନ ଶ୍ରୀକୃଷ୍ଣଙ୍କୁ ବଞ୍ଚିବା (ଅନୁଭବ କରିବା) ସମ୍ଭବ, କିନ୍ତୁ ପ୍ରଭୁ ରାମଙ୍କୁ ବଞ୍ଚିବା ଅତ୍ୟନ୍ତ କଠିନ। ପୁସ୍ତକ ସହ ସଂପୃକ୍ତ ପ୍ରସଙ୍ଗଗୁଡ଼ିକୁ ଉଲ୍ଲେଖ କରି ସେ କହିଲେ ଯେ, ଏହି ପୁସ୍ତକ ଗବେଷଣା କରୁଥିବା ଅଧ୍ୟେତାମାନେ ପାଇଁ ବହୁତ ଉପଯୋଗୀ ସିଦ୍ଧ ହେବ, ଏଥିରେ କୌଣସି ସନ୍ଦେହ ନାହିଁ।
ଦିଲ୍ଲୀ ବିଧାନସଭା ଅଧ୍ୟକ୍ଷ ବିଜେନ୍ଦ୍ର ଗୁପ୍ତା କହିଛନ୍ତି ଯେ, ଭଗବାନ ଶ୍ରୀକୃଷ୍ଣ ସହ ସଂପୃକ୍ତ ତଥ୍ୟଗୁଡ଼ିକୁ କେନ୍ଦ୍ର କରି ପ୍ରସ୍ତୁତ ଏହି ପୁସ୍ତକର ଏହା ଦ୍ୱିତୀୟ ସଂସ୍କରଣ। ଭଗବାନ ଶ୍ରୀକୃଷ୍ଣଙ୍କୁ ଏକ ନୂତନ ଅବତାର ଭାବରେ ବୁଝିବା ପାଇଁ ଏହି ପୁସ୍ତକ ପ୍ରେରଣାର ସ୍ରୋତ ହେବ।
ସମାରୋହରେ ବରିଷ୍ଠ ଅଧିବକ୍ତା ବିଷ୍ଣୁ ଶଙ୍କର ଜୈନ ଶ୍ରୀକୃଷ୍ଣ ଜନ୍ମଭୂମି ସହ ସଂପୃକ୍ତ ମାମଲାଗୁଡ଼ିକ ବିଷୟରେ ବିସ୍ତୃତ ତଥ୍ୟ ଦେଇ କହିଲେ ଯେ, ସର୍ବୋଚ୍ଚ ନ୍ୟାୟାଳୟରେ ଏହା ଉପରେ ମାମଲା ଚାଲିଛି। ସେ କହିଲେ, ଭଗବାନ ଶ୍ରୀକୃଷ୍ଣ ନିଜେ ଏହି ସବୁ ଦେଖୁଛନ୍ତି। ଏହି ଦିନ ଦୂର ନୁହେଁ ଯେତେବେଳେ ମଥୁରାରେ ମଧ୍ୟ ପ୍ରାଣ ପ୍ରତିଷ୍ଠା ହେବ।
ସମାରୋହର ସମାପନ କରିବାବେଳେ ବିଶେଷ ଅତିଥି ସାଧ୍ବୀ ଋତମ୍ଭରା କହିଥିଲେ ଯେ, ଭାରତରେ ଇତିହାସକୁ ଗଳ୍ପ ଭାବରେ କୁହା ଯାଇ ଏହାକୁ ବିଷ ଭାବେ ପ୍ରସ୍ତୁତ କରାଯାଇଛି । ଆମ ଘରେ ଆମକୁ ଶରଣାର୍ଥୀ ଭାବରେ ଦେଖାଇ, ଆମର ପୂର୍ବପୁରୁଷଙ୍କ ଅପମାନ କରାଯାଇଛି। ସ୍ୱାଧୀନତା ପୂର୍ବ ଓ ପରେ ଏହି ନାଟକ ଚାଲିଥିଲା। ସନାତନୀମାନେ ଧର୍ମରୁ ଦୂର ହେଉନ୍ତି ବୋଲି ଷଡ଼ଯନ୍ତ୍ର ହୋଇଥିଲା, ଯାହାର ଆମେ ଶିକାର ହୋଇଛୁ। କିନ୍ତୁ ଏହା ମନେ ରଖିବା ଦରକାର ଯେ, ମୂଳ ସହିତ ଯୋଡି ରହିଲେ ହିଁ ଆମେ ସଚେତନ ଓ ଶକ୍ତିଶାଳୀ ହେବା। ଅଯୋଧ୍ୟାରେ ଶ୍ରୀରାମ ମନ୍ଦିର ସେମାନଙ୍କୁ ସ୍ମରଣ କରାଏ, ଯେଉଁମାନେ ମନ୍ଦିର ପାଇଁ ନିଜ ଜୀବନକୁ ଅର୍ପଣ କରିଥିଲେ। ଅଯୋଧ୍ୟା ପରି ମଥୁରାରେ ମଧ୍ୟ ଭଗବାନ ଶ୍ରୀକୃଷ୍ଣଙ୍କର ଏକ ଭବ୍ୟ ମନ୍ଦିର ଏକ ଦିନ ନିଶ୍ଚିତ ଭାବରେ ଗଢ଼ିଉଠିବ। ଶୀଘ୍ର ହିଁ ନ୍ୟାୟାଳୟରୁ ଏହା ସଂପର୍କରେ ନିଷ୍ପତ୍ତି ସମସ୍ତଙ୍କ ସାମ୍ନାରେ ଆସିବ।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
