ଦେଶକୁ ନୂତନ ଶିଖରକୁ ନେବାର ମାପକାଠି ହେଉଛି ଶିକ୍ଷା- ଧର୍ମେନ୍ଦ୍ର ପ୍ରଧାନ

ଜୟପୁର/ଭୁବନେଶ୍ୱର ,୧୯ ଜୁନ(ହି.ସ.) - ଶିକ୍ଷା ହେଉଛି ଏପରି ମାଧ୍ୟମ ଯାହା କେବଳ ବ୍ୟକ୍ତିଗତ ଜୀବନକୁ ଉନ୍ନତ କରେ ନାହିଁ, ବରଂ ଦେଶକୁ ନୂତନ ଶିଖରକୁ ନେଇଥାଏ । ଏହି କଳ୍ପନାରେ ଜାତୀୟ ଶିକ୍ଷା ନୀତି ଅଧୀନରେ ବହୁମୁଖୀ, ଦକ୍ଷତା-ଆଧାରିତ ଏବଂ ନିଯୁକ୍ତି-ଆଧାରିତ ଶିକ୍ଷା ବ୍ୟବସ୍ଥାକୁ ପ୍ରୋତ୍ସାହିତ କରାଯାଉଛି ବୋଲି ଗୁରୁବାର ରାଜସ୍ଥାନରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବା ଅବସରରେ କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଏହି ଦିନିକିଆ ଗସ୍ତକାଳରେ ଶ୍ରୀ ପ୍ରଧାନ କେନ୍ଦ୍ର ରାଷ୍ଟ୍ର କୃଷି ଏବଂ କୃଷକ କଲ୍ୟାଣ ମନ୍ତ୍ରୀ ଭାଗୀରଥ ଚୌଧୁରୀଙ୍କ ସହ ରାଜସ୍ଥାନ କେନ୍ଦ୍ରୀୟ ବିଶ୍ୱବିଦ୍ୟାଳୟର ନବମ ସମାବର୍ତ୍ତନ ଉତ୍ସବରେ ଯୋଗଦେଇଥିଲେ । ଏହାବ୍ୟତୀତ ଜୟପୁରର ମଣିପାଲ ବିଶ୍ୱବିଦ୍ୟାଳୟରେ ନବନିର୍ମିତ ଅଧ୍ୟାପକ ହଲ୍ କମ୍ପେ୍ଲକ୍ସ ଉଦଘାଟନ କରିଥିଲେ ଶ୍ରୀ ପ୍ରଧାନ । ରାଜସ୍ଥାନ କେନ୍ଦ୍ରୀୟ ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବରେ ପଦକ ଏବଂ ଡିଗ୍ରୀ ପାଇଥିବା ସମସ୍ତ ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇବା ସହ କେନ୍ଦ୍ର ଶିକ୍ଷା ମନ୍ତ୍ରୀ କହିଥିଲେ, ଶିକ୍ଷାର ସ୍ୱଭାବ ହେଉଛି ନିରନ୍ତରତା - ଏହା ଏକ ସମାବର୍ତ୍ତନ ଉତ୍ସବ ନୁହେଁ, ବରଂ ଜୀବନବ୍ୟାପୀ ଶିକ୍ଷାର ଯାତ୍ରାରେ ଏକ ସ୍ମରଣୀୟ ଅବସର । ଏହି ଅବସର କେବଳ ଛାତ୍ରଛାତ୍ରୀମାନଙ୍କ ପାଇଁ ଏକ ଶୈକ୍ଷିକ ସଫଳତା ନୁହେଁ, ବରଂ ଦେଶ ନିର୍ମାଣ ପ୍ରତି ଜୀବନ ଏବଂ ପ୍ରତିବଦ୍ଧତାର ଦାୟିତ୍ୱର ସ୍ମରଣ କରାଇଥାଏ । ଆଜି ଭାରତ ଏକ ସାମୂହିକ ସଂକଳ୍ପ ସହିତ ବିଶ୍ୱର ଅଗ୍ରଣୀ ରାଷ୍ଟ୍ର ବର୍ଗରେ ସ୍ଥାନ ପାଇବା ଆଡ଼କୁ ଅଗ୍ରସର ହେଉଛି । ଜାତୀୟ ଶିକ୍ଷା ନୀତି ଅଧୀନରେ ବିଶ୍ୱମାନର ଶିକ୍ଷା ବ୍ୟବସ୍ଥାକୁ ପ୍ରୋତ୍ସାହିତ କରାଯାଉଛି । ବିଶ୍ୱ ଶିକ୍ଷା ସହଯୋଗକୁ ସୁଦୃଢ଼ କରିବା ପାଇଁ ବିଦେଶୀ ବିଶ୍ୱବିଦ୍ୟାଳୟଗୁଡ଼ିକୁ ଭାରତରେ କ୍ୟାମ୍ପସ ସ୍ଥାପନ କରିବାକୁ ଅନୁମତି ଦିଆଯାଇଛି । ଏହି ବର୍ଗରେ ଏପର୍ଯ୍ୟନ୍ତ ଆଠଟି ବିଶ୍ୱବିଦ୍ୟାଳୟ ମଧ୍ୟ ପ୍ରତିଷ୍ଠିତ ହୋଇଛି।

ରାଜସ୍ଥାନର ପ୍ରତିଭାବାନ ଛାତ୍ରଛାତ୍ରୀମାନେ ଜେଇଇ ଏବଂ ନିଟ୍ ଭଳି ପ୍ରତିଯୋଗିତାମୂଳକ ପରୀକ୍ଷାରେ ନିରନ୍ତର ଭଲ ପ୍ରଦର୍ଶନ କରି ଦେଶର ଶିକ୍ଷାଗତ ଉତ୍କର୍ଷତାରେ ଗୁରୁତ୍ୱପୂର୍ଣ୍ଣ ଅବଦାନ ରଖିଛନ୍ତି । ଏହି ଭୂମି ଜ୍ଞାନ, ବିଜ୍ଞାନ, କଳା, ସାହିତ୍ୟ ଏବଂ ଚିନ୍ତାଧାରାର ମୂଳ ଉତ୍ସ ହୋଇଛି । ଆମକୁ ଏହି ପରମ୍ପରାକୁ ଏକ ଆଧୁନିକ ପଦ୍ଧତି ଏବଂ ନବସୃଜନ ସହିତ ଆଗକୁ ନେବାକୁ ପଡିବ । ଆଜି ଯେତେବେଳେ ଭାରତ ବିଶ୍ୱର ଚତୁର୍ଥ ବୃହତ୍ତମ ଅର୍ଥନୀତି ଭାବରେ ପରିଣତ ହୋଇଛି, ସେହି ସମୟରେ ଆମେ ବର୍ତ୍ତମାନର ଯୁବପିଢ଼ିର ନବସୃଜନ, ଦକ୍ଷତା ଏବଂ ନେତୃତ୍ୱରେ ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ର କରିବାର ଲକ୍ଷ୍ୟ ହାସଲ କରିବା ଆବଶ୍ୟକ । 'ବସୁଧୈବ କୁଟୁମ୍ବକମ୍‌' ଆଦର୍ଶ ସହିତ ଭାରତ ୧୪୦ କୋଟି ଭାରତୀୟ ଏବଂ ବିଶ୍ୱ ମାନବତାର ଲାଭ ପାଇଁ ଏକ ସମାଧାନ ପ୍ରଦାନକାରୀ ରାଷ୍ଟ୍ର ହେବା ଉଚିତ - ଏହା ଆମ ସମସ୍ତଙ୍କର ଦାୟିତ୍ୱ ଏବଂ ସଂକଳ୍ପ ବୋଲି ସେ କହିଥିଲେ ।

ଶ୍ରୀ ପ୍ରଧାନ ନୂତନ ଅଧ୍ୟାପକ ହଲ୍ କମ୍ପେ୍ଲକ୍ସ ଉଦଘାଟନୀ କାର୍ଯ୍ୟକ୍ରମରେ କହିଥିଲେ, ରାଜସ୍ଥାନର ସାଂସ୍କୃତିକ ଐତିହ୍ୟର ଛାପ ଥିବା ନୂତନ ଅଧ୍ୟାପକ ହଲ୍ କମ୍ପେ୍ଲକ୍ସ ଶିକ୍ଷଣ ପରିବେଶକୁ ପ୍ରୋତ୍ସାହିତ କରିବ । ଜୟପୁରର ମଣିପାଲ ବିଶ୍ୱବିଦ୍ୟାଳୟ ଆମର କାଳଜୟୀ ସଂସ୍କୃତି ଏବଂ ଐତିହ୍ୟକୁ ଆଧୁନିକ ଶିକ୍ଷା ସହିତ ସମନ୍ୱିତ କରିବା ଦିଗରେ ଏକ ଉଦାହରଣ । ଜାତୀୟ ଶିକ୍ଷା ନୀତିର କ୍ରିୟାନ୍ୱୟନ ସହ ଆମେ ଭାରତର ଐତିହ୍ୟ ଏବଂ ଜ୍ଞାନ ପରମ୍ପରାକୁ ଆଧୁନିକ ଶିକ୍ଷାରେ ଯୋଡିଛୁ । ରାଜସ୍ଥାନ ଭାରତର ଗୌରବମୟ ଐତିହ୍ୟର ଏକ ଶକ୍ତିଶାଳୀ ପ୍ରତୀକ। ଏହା ଏକ ଉଦୀୟମାନ, ବିକଶିତ ଏବଂ ଭବିଷ୍ୟତ ପାଇଁ ପ୍ରସ୍ତୁତ ଭାରତର ପ୍ରତୀକ ହେବା ଉଚିତ । ଏହା କେବଳ ସେତେବେଳେ ହୋଇପାରିବ ଯେତେବେଳେ ମଣିପାଲ ବିଶ୍ୱବିଦ୍ୟାଳୟ ଭଳି ବିଶ୍ୱବିଦ୍ୟାଳୟଗୁଡ଼ିକ ଏକ ଗବେଷଣା ଏବଂ ନବସୃଜନ ବିଶ୍ୱବିଦ୍ୟାଳୟରେ ପରିଣତ ହେବେ ଏବଂ ଆମର ଛାତ୍ରଛାତ୍ରୀମାନେ ନିଯୁକ୍ତିଦାତାରେ ପରିଣତ ହେବେ ବୋଲି ଶ୍ରୀ ପ୍ରଧାନ କହିଛନ୍ତି ।

---------------

ହିନ୍ଦୁସ୍ଥାନ ସମାଚାର / ବନ୍ଦନା