ସୁବର୍ଣ୍ଣପୁର, ୨୯ ଜୁନ୍ (ହି.ସ.)- ସୁବର୍ଣ୍ଣପୁର ଜିଲ୍ଲା ପ୍ରସିଦ୍ଧ ଶ୍ରୀ ପାତାଳୀକ୍ଷେତ୍ର କୋଟସମଲାଇରେ ମହାପ୍ରଭୁଙ୍କ ପବିତ୍ର ରଥଯାତ୍ରା ମହୋତ୍ସବ ଅନୁଷ୍ଠିତ ହୋଇଯାଇଛି । ଶୁକ୍ରବାର ଭୋର ସକାଳୁ ୫ଟାରେ ମଙ୍ଗଳ ଆଳତି, ସକାଳ ୭ଟାରେ ଖେଚୁଡି ଭୋଗ, ୮ଟାରେ ମଙ୍ଗଳାରୋପଣ, ଦ୍ଵାରପାଳ ପୂଜା, ଦ୍ଵାରଫିଟା, ଖେଚୁଡି ଭୋଗ, ମହାପ୍ରଭୁଙ୍କ ବେଶ, ରଥ ପ୍ରତିଷ୍ଠା ଆଦି ରୀତିନୀତି କରାଯାଇଥିଲା । ସକାଳ ୧୦ଟାରେ ଛଳିଆ ପାହାଡ ଶିଖରରୁ ମହାପ୍ରଭୁଙ୍କୁ ଧାଡି ପହଣ୍ଡିରେ ଅଣାଯାଇ ରଥାରୂଢ କରାଯାଇଥିଲା । ଅପରାହ୍ନ ୧ଟାରେ ମହାପ୍ରଭୁଙ୍କୁ ଗାଁର ଗଡତ୍ୟା ଚମରା ଅମାତ୍ ଛେରାପହଁରା ନୀତି ସମ୍ପାଦନ କରିଥିଲେ । ତା ପରେ ୨ଟାରେ ମହାପ୍ରଭୁଙ୍କ ରଥଟଣା ହୋଇଥିଲା । ବଳରାମଙ୍କ ତାଳଧ୍ୱଜ ରଥ ତା ପରେ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଓ ମହାବାହୁଙ୍କ ନନ୍ଦିଘୋଷ ରଥ ଟଣା ଯାଇଥିଲା । ଏହି ଅବସରରେ ଲକ୍ଷ ଲକ୍ଷ ଭକ୍ତ ଶ୍ରୀଜୀଉଙ୍କ କୃପା ପାଇଁ ଧାଇଁ ଆସିଥିଲେ ।

ଏଥିରେ ରାଜମଣୀ ସାହୁ, ନାରାୟଣ ଦେହୁରୀ, ଅଧ୍ୟାପକ ପଣ୍ଡିତ ହରିଶ୍ଚନ୍ଦ୍ର ହୋତା ଓ ରବିନାରାୟଣ ପାଣିଗ୍ରାହୀ ପ୍ରମୁଖ ଧାରା ବିବରଣି ପ୍ରଦାନ କରିଥିଲେ । ପାତାଳୀ ଶ୍ରୀକ୍ଷେତ୍ର ଭଜନ ଗ୍ରୁପ ଦ୍ବାରା ଭଜନ କାର୍ଯ୍ୟକ୍ରମ, ମହିଳା ନାମ ସଂକିର୍ତନ ଆଦି ପରିବେଷଣ ହୋଇଥିଲା । ଅଖିଳ ଭାରତୀୟ ସେବା ସଂଗଠନ, ରାଷ୍ଟ୍ରୀୟ ସ୍ଵୟଂ ସେବା ସଂଗଠନ, ମାହେଶ୍ଵରୀ ସେନା, ପାତାଳୀ ସେନା, ପବନା ଶ୍ରମ ଗ୍ରୁପ, ପୋଲିସ ବିଭାଗ, ସ୍ବାସ୍ଥ୍ୟ, ପାନୀୟ ଜଳ ବିଭାଗ, ଦମକଳ ବାହିନୀ ସହ ଅନ୍ୟ ବିଭାଗ ସହଯୋଗ କରିଥିଲେ ।

ହିନ୍ଦୁସ୍ଥାନ ସମାଚାର / ଗୋପବନ୍ଧୁ