ଧର୍ମଶାଳା, ୨୮ ଜୁଲାଇ (ହି.ସ.) - ବ୍ରାହ୍ମଣୀ ନଦୀର ଉପରମୁଣ୍ଡରେ ଅଧିକ ବର୍ଷା ଯୋଗୁଁ ରେଙ୍ଗାଲି ଡ୍ୟାମର ୩ ଗୋଟି ଗେଟ ଖୋଲାଯାଇଛି । ୩ ଗୋଟି ଗେଟ ଦେଇ ନଦୀରେ ପ୍ରତି ସେକେଣ୍ଡକୁ ୪୪୫୦.୬୭ କ୍ୟୁମେକ ବନ୍ୟାଜଳ ପ୍ରବାହିତ ହେଉଥିବା ବେଳେ ଡ୍ୟାମକୁ ପ୍ରତି ସେକେଣ୍ଡରେ୫୫୦୦.୨୦ କ୍ୟୁମେକ ବନ୍ୟା ଜଳ ପ୍ରବେଶ କରୁଛି । ଏବେ ଉପରମୁଣ୍ଡରେ ବର୍ଷା କମିଯାଇଥିବାରୁ ଡ୍ୟାମକୁ ପୁର୍ବପେକ୍ଷା କମ ବନ୍ୟାଜଳ ପ୍ରବେଶ କରୁଛି । ସେହିପରି ସମଲ ବ୍ୟାରେଜର ୯ ଗୋଟି ଗେଟ ଦେଇ ବନ୍ୟାଜଳ ନଦୀରେ ପ୍ରବାହିତ ହେଉଛି । ରେଙ୍ଗାଲି ଡ୍ୟାମରେ ଗତକାଲି ୩୯୮.୨୬ ଫୁଟ ଉଚର ଜଳ ରହିଥିବା ବେଳେ ଆଜି ଏହା ବୃଦ୍ଧି ପାଇ ଆଜି ୩୯୯.୯୩ ଫୁଟରେ ରହିଛି । ରେଙ୍ଗାଲିର ଜଳଧାରଣ କ୍ଷମତା ୪୦୫.୧୮ ଫୁଟ ରହିଛି । ଚଳିତ ଥର ଡ୍ୟାମରେ ପୁର୍ବ ବର୍ଷ ପେକ୍ଷା ୪ଫୁଟ ଅଧିକ ଜଳ ବର୍ତମାନ ରହିଛି । ହେଲେ ଏବେ ଉପରମୁଣ୍ଡରେ ବର୍ଷା କମିବା ସହିତ ଡ୍ୟାମ ମଧ୍ୟକୁ କମ ବନ୍ୟାଜଳ ପ୍ରବେଶ କରୁଥିବାରୁ ଚତୁର୍ଥ ଗେଟ ଖୋଲିବାର ନାହିଁ ବୋଲି ଡ୍ୟାମ କତୃପକ୍ଷଙ୍କ ସୁତ୍ରରୁ ଜଣାପଡିଛି । ତେବେ ଆଗକୁ ଗହ୍ମା ପୁର୍ଣମୀ ରହିଥିବାରୁ ରେଙ୍ଗାଲି ଡ୍ୟାମରୁ ଜଳ ନିଷ୍କାସନ କରିବା ଜରୁରି ହୋଇପଡିଛି । ଡ୍ୟାମର ୩ ଗୋଟି ଗେଟ କିଛି ଦିନ ପାଇଁ ଖୋଲା ରହିଲେ ଡ୍ୟାମରୁ ବନ୍ୟାଜଳ ହ୍ରାସ ପାଇବ ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି । ଡ୍ୟାମ କତୃପକ୍ଷ ଏବଂ ସରକାର ଏଥିପ୍ରତି ଯତ୍ନବାନ ହେବାକୁ ନଦୀ କୁୁଳିଆ ବାସିନ୍ଦା ନିବେଦନ କରିଛନ୍ତି । ଡ୍ୟାମରୁ ବନ୍ୟାଜଳ ନିଷ୍କାସନ କରାନଗଲେ ଆଗକୁ ଲୋକେ ବଡ ବନ୍ୟାର ସମ୍ମୁଖିନ ହେବା ନେଇ ଆଶଙ୍କା ରହିଛି । ରେଙ୍ଗାଲିର ୩ ଗୋଟି ଗେଟ ଦେଇ ବନ୍ୟାଜଳ ବ୍ରାହ୍ମଣୀ ନଦୀରେ ପ୍ରବାହିତ ହେଉଥିବା ବେଳେ ନଦୀର ଜେନାପୁର ଠାରେ ଆଜି ସନ୍ଧ୍ୟା ସୁଦ୍ଧା ୬୩.୭୦ଫୁଟରେ ବନ୍ୟାଜଳ ପ୍ରବାହିତ ହେଉଛି । ଖୁବ କମ ଗତିରେ ନଦୀରେ ବନ୍ୟାଜଳ ବଡୁଥିବା ବେଳେ ତଳ ମୁଣ୍ଡରେ ବସବାସ କରୁଥିବା ଲୋକେ ଓ ଚାଷ ଜମି ଏହା ଦ୍ୱାରା ପ୍ରଭାବିତ ହେବାର ଆଶଙ୍କା ରହିଛି । ତେବେ ବନ୍ୟାର ମୁକାବିଲା ପାଇଁ ପ୍ରଶାସନ ପ୍ରସ୍ତୁତ ରହିଥିବା ବେଳେ ନଦୀ କୁଳିଆ ଲୋକେ ଅଧିକ ପ୍ୟାନିକ ନହେବା ଲାଗି ପ୍ରଶାସନ ପକ୍ଷରୁ ନିବେଦନ କରାଯାଇଛି ।

ହିନ୍ଦୁସ୍ଥାନ ସମାଚାର / ଚିନ୍ମୟ