ନୂଆଦିଲ୍ଲୀ, ୨୯ ଜୁଲାଇ (ହି.ସ.)- ଜମ୍ମୁ ଓ କାଶ୍ମୀରର ପହଲଗାମରେ ଏପ୍ରିଲ ୨୨ ତାରିଖରେ ୨୬ ଜଣ ପର୍ଯ୍ୟଟକଙ୍କୁ ନିର୍ମମ ଭାବରେ ହତ୍ୟା କରିଥିବା ସମସ୍ତ ତିନି ଜଣ ଆତଙ୍କବାଦୀ ସୋମବାର ଏକ ମିଳିତ ଅପରେସନରେ ସୁରକ୍ଷା ବାହିନୀ ହାତରେ ନିହତ ହୋଇଛନ୍ତି । କନ୍ଦ୍ର ଗୃହମନ୍ତ୍ରୀ ଅମିତ ଶାହ ଆଜି ଲୋକସଭାରେ ଅପରେସନ ସିନ୍ଦୁର ଉପରେ ସୋମବାର ଠାରୁ ଜାରି ରହିଥିବା ଆଲୋଚନାରେ ଭାଗ ନେଇ ସଦନ ଓ ଦେଶ ସହିତ ଏହି ସୂଚନା ସେୟାର୍ କରିଛନ୍ତି । ସେ କହିଛନ୍ତି ଯେ, ମୁଁ ଗୃହ ମାଧ୍ୟମରେ ଗତକାଲିର 'ଅପରେସନ ମହାଦେବ' ବିଷୟରେ ସମଗ୍ର ଦେଶକୁ ସୂଚନା ଦେବାକୁ ଚାହୁଁଛି । ଗତକାଲି 'ଅପରେସନ ମହାଦେବ'ରେ ସେନା, କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (ସିଆରପିଏଫ) ଏବଂ ଜମ୍ମୁ ଓ କାଶ୍ମୀର ପୋଲିସର ମିଳିତ ଅପରେସନରେ ସୁଲେମାନ, ଅଫଗାନ ଏବଂ ହମଜା ଜିବ୍ରାନ ନାମକ ତିନି ଜଣ ଆତଙ୍କବାଦୀ ନିହତ ହୋଇଥିଲେ ।
ଗୃହମନ୍ତ୍ରୀ କହିଛନ୍ତି ଯେ, ସୁଲେମାନ ଲସ୍କର-ଏ-ତୈବାର ଏ ବର୍ଗର କମାଣ୍ଡର ଥିଲା । ଆମର ଏଜେନ୍ସିଗୁଡ଼ିକ ପାଖରେ ପହଲଗାମ ଏବଂ ଗଗନଗିର ଆତଙ୍କବାଦୀ ଆକ୍ରମଣରେ ସେ ସମ୍ପୃକ୍ତ ଥିବାର ଅନେକ ପ୍ରମାଣ ଅଛି । ଅଫଗାନ ଏବଂ ହମଜା ଜିବ୍ରାନ ମଧ୍ୟ ଏ ଗ୍ରେଡ୍ ଆତଙ୍କବାଦୀ ଥିଲେ ଯେଉଁମାନେ ଆମ ଜାତୀୟ ସୁରକ୍ଷା ପାଇଁ ଏକ ଗମ୍ଭୀର ବିପଦ ଥିଲେ । ମଇ ୨୨ ତାରିଖରେ ସେନ୍ସର ମାଧ୍ୟମରେ ଆତଙ୍କବାଦୀଙ୍କ ଉପସ୍ଥିତି ନିଶ୍ଚିତ ହୋଇଥିଲା । ତା’ପରେ ଆମର ୪ ପାରାଙ୍କ ନେତୃତ୍ୱରେ ସିଆରପିଏଫ୍ କର୍ମଚାରୀ ଏବଂ ଜମ୍ମୁ-କଶ୍ମୀର ପୋଲିସ କର୍ମଚାରୀମାନେ ମିଳିତ ଭାବରେ ଆତଙ୍କବାଦୀଙ୍କୁ ଘେରି ଯାଇଥିଲେ । ବୈସରଣ ଘାଟିରେ ଆମର ନିର୍ଦ୍ଦୋଷ ନାଗରିକଙ୍କୁ ହତ୍ୟା କରିଥିବା ଲୋକଙ୍କ ମଧ୍ୟରେ ଏହି ତିନି ଜଣ ଆତଙ୍କବାଦୀ ଥିଲେ ଏବଂ ଗତକାଲି ତିନି ଜଣ ନିହତ ହୋଇଛନ୍ତି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ