ସମ୍ବଲପୁର, ୨୫ ଅଗଷ୍ଟ (ହି.ସ.)
ରାଜ୍ୟ ସରକାରଙ୍କ ଷ୍ଟାଣ୍ଣ୍ଡିଙ୍ଗ ଅର୍ଡର ଅନୁଯାୟୀ ସାରା ରାଜ୍ୟରେ ମାସର ପ୍ରତ୍ୟେକ ୨୩ ତାରିଖ ଦିନ ଛତୁଆ ପ୍ରସ୍ତୁତି ହେବା ସହ ଯାଞ୍ଚ କମିଟିର ସଦସ୍ୟା, ସୁପରଭାଇଜର ଓ ପ୍ରଶାସନିକ ଅଧିକାରୀ ମାନଙ୍କ ଉପସ୍ଥିତିରେ ଛତୁଆ ମିଶ୍ରଣ ଏବଂ ପ୍ୟାକେଟ ପ୍ରସ୍ତୁତି କରାଯିବ । ମାତ୍ର ସମ୍ବଲପୁର ଜିଲ୍ଲା ଜମନକିରା ବ୍ଲକରେ ଖୋଲାଖୋଲି ଏହି ନିୟମ ସମ୍ପୂର୍ଣ୍ଣ ଉଲଂଘନ ହେଉଥିବା ଅଭିଯୋଗ ହେଉଛି। ଏହି କ୍ରମରେ ଉକ୍ତ ଯାଞ୍ଚ କମିଟିରେ ସଦସ୍ୟା ଭାବେ ଜଣେ ୱାର୍ଡ ମେମ୍ବର କିମ୍ବା ସରପଞ୍ଚ, ଜଣେ ପ୍ରସୂତି ମା”, ଜଣେ ଗର୍ଭବତୀ ମା”, ଅଙ୍ଗନବାଡ଼ି କର୍ମୀ, ଅଙ୍ଗନବାଡ଼ି କେନ୍ଦ୍ରରେ ପଢୁଥିବା ଜଣେ ଶିଶୁର ମା ଓ ଜଣେ ସ୍ଵେଚ୍ଛାସେବୀ ମହିଳା ପ୍ରମୁଖଙ୍କ ଅନୁପସ୍ଥିତିରେ ଛତୁଆ ପ୍ରସ୍ତୁତ ହେଉଛି । ଏହା ସାଙ୍ଗକୁ ବିଭାଗୀୟ ସମନ୍ୱିତ ଶିଶୁ ଓ ମାତ୍ରୁ କଲ୍ୟାଣ ବିଭାଗର ସୁପରଭାଇଜର, ସିଡିପିଓ ପ୍ରମୁଖ ମଧ୍ୟ ଉପସ୍ଥିତ ରହି ଛତୁଆ ପ୍ରସ୍ତୁତି ବେଳେ ଯାଞ୍ଚ ମଧ୍ୟ କରାଯାଉନାହିଁ । ସ୍ଵତନ୍ତ୍ର ଭାବେ ଏହି ନିୟମକୁ ପାଳନ କରିବା ପାଇଁ ବିଡ଼ିଓ ଏବଂ ତହସିଲଦାରଙ୍କୁ ଜିଲ୍ଲାପାଳ ନିର୍ଦ୍ଦେଶ କରିଥିଲେ ମଧ୍ୟ ସବୁକିଛି ବାଟବଣା ହୋଇଯାଇଥିବା ଦେଖିବାକୁ ମିଳିଛି। ଗତକାଲି ୨୩ ତାରିଖ ଦିନ ଜମନକିରା ବ୍ଲକର ୨ଟି ସ୍ଥାନରେ ଛତୁଆ ପ୍ରସ୍ତୁତ କରାଯାଉଥିଲା। ମାତ୍ର ଉକ୍ତ ଉଭୟ କେନ୍ଦ୍ରରେ ଛତୁଆ ପ୍ରସ୍ତୁତି ବେଳେ ଦାୟିତ୍ୱରେ ଥିବା ଯାଞ୍ଚ କମିଟିର ନା ଥିଲେ ସମସ୍ତ ସଦସ୍ୟା ନା ଥିଲେ ପ୍ରଶାସନିକ ଅଧିକାରୀ। ଏଭଳି ଚରମ ଅବହେଳା ଶିଶୁ, ପ୍ରସୂତି ଏବଂ ଗର୍ଭବତୀ ମା” ମାନଙ୍କ ପ୍ରତି ଅଣଦେଖା ଭଳି ମନେ କରାଯାଏ। ଶୁଣିବାକୁ ମିଳୁଛି କି, ଛତୁଆ ମାନ ଠିକ୍ ନଥିବାରୁ ହିତାଧିକାରୀ ମାନେ ଗାଈ ଗୋରୁ ଙ୍କୁ ଖୁଏଇ ଦେଉଥିବା ଆଉ କେତେକ ବିକ୍ରି କରି ଦେଉଥିବା ଅଭିଯୋଗ ହେଉଛି। ଆଗାମୀ ଦିନରେ ଏଭଳି ସମସ୍ୟା ଯେମିତି ଆଗକୁ ନହୁଏ ସେଥିପ୍ରତି ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବେ ବୋଲି ସାଧାରଣରେ ଦାବି ହେଉଛି।ଏସଂକ୍ରାନ୍ତରେ ଅନୁପସ୍ଥିତି ନେଇ ତହସିଲଦାର ପ୍ରଭିଣା ଵିଲୁଙ୍ଗ ଏବଂ ବିଡ଼ିଓ ରବୀନ୍ଦ୍ର କୁମାର ସେଠୀଙ୍କୁ ତାଙ୍କ ମୋବାଇଲରେ ବାରମ୍ବାର ଚେଷ୍ଟା କରିଥିଲେ ମଧ୍ୟ ଯୋଗାଯୋଗ ସମ୍ଭବପର ହୋଇନଥିଲା । ଏବେ ପ୍ରଶ୍ନ ଉଠେ ଛତୁଆ ପ୍ରସ୍ତୁତି ଉପରେ ରାଜ୍ୟ ସରକାରଙ୍କ ଆଇନ ଓ କଟକଣା କେବେ ସଠିକ୍ ଭାବେ କାର୍ଯ୍ୟକାରୀ କରିବ, ଓ ଆଇନ ଖିଲାଫୀଙ୍କ ବିରୋଧରେ କି ପ୍ରକାରର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
