ବାରିପଦା, ୨୬ ଅଗଷ୍ଟ (ହି.ସ)- ବାରିପଦା ସହରର ପ୍ରତିଷ୍ଠିତ ତଥା ପୁରାତନ ଲାଲ ବଜାର ରାଜା ଗଣେଶ ପୂଜା ଚଳିତ ଥର ୧୯ ବର୍ଷରେ ପଦାର୍ପଣ କରିଛି। ବୁଧବାର ଗଣେଶ ପୂଜା ହେବାକୁ ଥିବା ବେଳେ ମାସକ ପୂର୍ବରୁ ପୂଜା ପ୍ରସ୍ତୁତି ଆରମ୍ଭ ହୋଇଥିଲା। ସହରରେ ଅନୁଷ୍ଠିତ ହେଉଥ‌ିବା ଅନ୍ୟାନ୍ୟ ଗଣେଶ ପୂଜା ମଣ୍ଡପ ମଧ୍ୟରେ ଲାଲବଜାର ମଣ୍ଡପର ବିଶେଷତ୍ବ ରହିଥାଏ। ଗତ ୨୦୦୬ ମସିହାରେ ସ୍ଥାନୀୟ ଲାଲବଜାର ଅଞ୍ଚଳର ଜନସାଧାରଣଙ୍କ ପ୍ରଚେଷ୍ଟାରେ ଗଣେଶ ପୂଜା ଆରମ୍ଭ ହୋଇଥିଲା। ମୁମ୍ବାଇ ସ୍ଥିତ ଲାଲବାଗଚା ରାଜା ଶୈଳୀରେ ଏଠାରେ ମଧ୍ୟ ବିଘ୍ନ ବିନାଶକ ଗଜାନନ ପୂଜା ପାଇଥାନ୍ତି। ଏଠାକାର ମୂର୍ତ୍ତି ହିଁ ଲାଲ ବଜାର ରାଜା ପୂଜା କମିଟିର ସବୁଠୁ ଆକର୍ଷଣର କେନ୍ଦ୍ରବିନ୍ଦୁ ଅଟେ। ବାରିପଦା ସହରର ସବୁଠୁ ବଡ଼ ପୂଜା ପେଣ୍ଡାଲରେ ଉଚ୍ଚ ଶ୍ରୀ ଗଣେଶଙ୍କ ମୂର୍ତ୍ତି ପ୍ରସ୍ତୁତ କରାଯାଇଥାଏ। ଏହି ମୂର୍ତ୍ତିକୁ ପଡୋଶୀ ପଶ୍ଚିମବଙ୍ଗ ରାଜ୍ୟରୁ ମୂର୍ତ୍ତି କାରିଗର ମାନେ ଆସି ପ୍ରସ୍ତୁତ କରିଥାନ୍ତି। ଚଳିତବର୍ଷ ମଧ୍ୟ ଶ୍ରୀ ଗଣେଶ ପୂଜାକୁ ନିଆରା ଢଙ୍ଗରେ ପାଳନ କରିବା ପାଇଁ କମିଟି ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି। କମିଟି ପକ୍ଷରୁ ସଦସ୍ୟ ମାନଙ୍କୁ ନେଇ ବୈଠକ କରି ବଜେଟ୍ ପ୍ରସ୍ତୁତି କରାଯାଇଛି। ପୂଜାର ତୋରଣ, ସାଜସଜ୍ଜା, ଆନୁଷଙ୍ଗିକ ବ୍ୟବସ୍ଥା ଓ ମୂର୍ତ୍ତି ତିଆରି ଶେଷ ହୋଇଛି। ସହରରେ ସବୁଠାରୁ ଆକର୍ଷଣୀୟ ପୂଜାକୁ ବେଶ୍ ଶାନ୍ତି ଶୃଙ୍ଖଳାରେ ସହ ପ୍ରତିବର୍ଷ ପାଳନ ହୋଇଆସୁଥିବା ବେଳେ ଚଳିତ ବର୍ଷ ସରସ ସୁନ୍ଦର ଭାବେ ମହାଆଡମ୍ବରରେ ପାଳନ କରାଯିବା ପାଇଁ ପୂଜା କମିଟି ସଦସ୍ୟ ଓ ଉପଦେଷ୍ଟା ମଣ୍ଡଳୀ ମାନେ ବେଶ ସକ୍ରିୟ ରହିଛନ୍ତି। ଏଠାକାର ଘଟ ଉତ୍ତୋଳନ ଠାରୁ ଆରମ୍ଭ କରି ପୂଜାବିଧି, ପ୍ରସାଦ ବଣ୍ଟନ ଓ ବିସର୍ଜନରେ ସ୍ୱତନ୍ତ୍ରତା ରହିଛି। ପ୍ରାୟ ସପ୍ତାହକ ଧରି ମଣ୍ଡପ ପାର୍ଶ୍ଵରେ ସାଂସ୍କୃତିକ କାର୍ଯ୍ୟକ୍ରମ ଆଦି ଅନୁଷ୍ଠିତ ହେବ। ସପ୍ତାହ ମଧ୍ୟରେ ପ୍ରସାଦ ବଣ୍ଟନ ବ୍ୟବସ୍ଥା ସମେତ ବିସର୍ଜନରେ ମଧ୍ୟ ସ୍ଵତନ୍ତ୍ରତା ରହିଛି। ବିସର୍ଜନ ସମୟରେ ଡିଜେ ବଦଳରେ ପାରମ୍ପରିକ ବାଜାକୁ ବେଶି ପ୍ରାଧାନ୍ୟ ଦିଆଯାଇଥାଏ। ସେଥ‌ିପାଇଁ ଭଷାଣି ସମୟରେ ରାଜ୍ୟର ବିଭିନ୍ନ ସ୍ଥାନରୁ ଲୋକ ବାଦ୍ୟ ଦଳ ଆସିଥାନ୍ତି। ତାଙ୍କର କଳା ପ୍ରଦର୍ଶନ ଭଷାଣିରେ ବାରିପଦା ସହରରେ ମୁଖ୍ୟ ଆକର୍ଷଣର କେନ୍ଦ୍ରବିନ୍ଦୁ ସାଜିଥାଏ। ବାରିପଦା ନଗରପାଳ କୃଷ୍ଣାନନ୍ଦ ମହାନ୍ତିଙ୍କ ପୌରହିତରେ କମିଟି ପକ୍ଷରୁ ପୂଜା ପ୍ରସ୍ତୁତି ହେଉଥିବା ବେଳେ ଗଣେଶ ଚନ୍ଦ୍ର ଦାସ, ବରିଷ୍ଠ ଆଡଭୋକେଟ ବିଭୁପ୍ରସାଦ ଦାଶ, ଆଡଭୋକେଟ ଜ୍ୟୋତିପ୍ରକାଶ ରଥ, ପାର୍ଥସାରଥୀ ସ୍ୱାଇଁ, ରବୀନ୍ଦ୍ର ସ୍ୱାଇଁ, ତିମିରିକାନ୍ତ ଦାସ, ତୁଷାରକାନ୍ତି ଦାସ ପ୍ରମୁଖ ସମେତ ଅନ୍ୟାନ୍ୟ ସଦସ୍ୟ ମାନଙ୍କ ସହଯୋଗରେ ଚଳିତ ବର୍ଷ ଆହୁରି ଆକର୍ଷଣିୟ ପୂଜା ପ୍ରସ୍ତୁତି ଜାରି ରହିଛି l

ହିନ୍ଦୁସ୍ଥାନ ସମାଚାର / ଦିଲ୍ଲୀପ