ବାରିପଦା, ୨୬ ଅଗଷ୍ଟ (ହି.ସ.)- ଶ୍ରୀ ଗଣେଶଙ୍କ ପୂଜା ଅଗଷ୍ଟ ୨୭ ତାରିଖରେ ଥିବାବେଳେ ଦିନ ଯେତେ ପାଖେଇ ଆସୁଛି ପୂଜା ମଣ୍ଡପ ସେତେ ଚଳଚଞ୍ଚଳ ହୋଇପଡୁଛି। ବାରିପଦା ସହରରେ ଗଣେଶ ପୂଜାକୁ ନେଇ ମଣ୍ଡପରେ ପ୍ରସ୍ତୁତି ଜୋରସୋରରେ ଜାରି ରହିଛି। ସ୍ଥାନୀୟ ସ୍ୱରୂପ ନଗରର ଆମ ଖଟି ପିଲା କ୍ଲବର ଗଣେଶ ପୂଜା ଅନ୍ୟତମ ଅଟେ। ସ୍ଥାନୀୟ ସ୍ୱରୂପ ନଗର ଅଞ୍ଚଳର ଯୁବଗୋଷ୍ଠୀ ମାନଙ୍କ ପ୍ରୟାସରେ ଗଣେଶ ପୂଜା ଆରମ୍ଭ ହୋଇଥିବା ବେଳେ ଚଳିତ ଥର ୩ ବର୍ଷରେ ପଦାର୍ପଣ କରୁଛି। ମୟୂରଭଞ୍ଜ ବିୟୁଟି ଓ ଆମ ଖଟି ପିଲା ମିଳିତ ଆନୁକୂଲ୍ୟରେ ସ୍ୱରୂପ ନଗର ସ୍ଥିତ ମା' ଅମ୍ବିକା ମନ୍ଦିର ନିକଟରେ ଗଣେଶ ପୂଜା ଆୟୋଜନ କରାଯାଇଛି । ଚଳିତ ବର୍ଷ ପୂଜା କମିଟି ପକ୍ଷରୁ ଅଖରୋଟ ଉପରେ ବସିଥିବା ବାଲ ଗଣେଷ ଥିମରେ ଗଜାନନଙ୍କ ମୂର୍ତ୍ତି ପ୍ରସ୍ତୁତ କରାଯାଇଛି। ଏହାସହିତ ଚଳିତ ବର୍ଷ ୧୮କିଲୋ ଗଣେଶଙ୍କ ପ୍ରିୟ ପ୍ରସାଦ ମୋଦକ ଲାଗି ହେବ। ନିଆରା ବିଦ୍ୟାଦାତା ଅବତାରରେ ଗଜାନନ ପୂଜା ପାଇବେ। ଉକ୍ତ ଥିମର ମୂର୍ତ୍ତି ଚଳିତ ବର୍ଷ ବାରିପଦାରେ ଆକର୍ଷଣର କେନ୍ଦ୍ରବିନ୍ଦୁ ସାଜିବ ବୋଲି ପୂଜା କମିଟି ପକ୍ଷରୁ କୁହାଯାଇଛି। ପଶ୍ଚିମବଙ୍ଗରୁ ମୂର୍ତ୍ତି କାରିଗର ମାନେ ଆସି ଥିମରେ ଗଜାନନଙ୍କ ମୂର୍ତ୍ତି ପ୍ରସ୍ତୁତି ଆରମ୍ଭ କରି ଦେଇଛନ୍ତି। ବିଭିନ୍ନ କଲେଜରେ ଅଧ୍ୟୟନରତ ଛାତ୍ର ମାନେ ନିଜ ପ୍ରଚେଷ୍ଟାରେ ପୂଜା କରୁଥିବା ବେଳେ ଚଳିତବର୍ଷ ମଧ୍ୟ ଶ୍ରୀ ଗଣେଶ ପୂଜାକୁ ନିଆରା ଢଙ୍ଗରେ ପାଳନ କରିବା ପାଇଁ ପ୍ରସ୍ତୁତି କରୁଛନ୍ତି। ପୂଜା ତୋରଣ, ସାଜସଜ୍ଜା, ଆନୁଷଙ୍ଗିକ ବ୍ୟବସ୍ଥା ଓ ମୂର୍ତ୍ତି ତିଆରି କାମ ଜୋରଦାର ଜାରି ରହିଛି। ଅଗଷ୍ଟ ୨୭ ତାରିଖ ସକାଳୁ ଘଟ ଉତ୍ତୋଳନ ଓ ପୂଜା ଆୟୋଜନ କରାଯାଇଛି। ଏଥିପରେ ଅଗଷ୍ଟ ୩୦ ତାରିଖ ସନ୍ଧ୍ୟାରେ ଭକ୍ତ ଓ ଜନସାଧାରଣଙ୍କ ମଧ୍ୟରେ ଅନ୍ନ ପ୍ରସାଦ ବଣ୍ଟନ କରାଯିବ। ବିସର୍ଜନ ହେବା ସହିତ ପାରମ୍ପରିକ ବାଦ୍ୟଯନ୍ତ୍ରରେ ଭସାଣି ଯାତ୍ରା ଅନୁଷ୍ଠିତ ହେବ ବୋଲି କ୍ଲବ ସୂତ୍ରରୁ ସୂଚନା ମିଳିଛି। ପୂଜା ଆୟୋଜକ କମିଟିରେ ଅନେକ ସଦସ୍ୟ ରହିଥିବା ବେଳେ ସଭାପତି ଭାବେ ରୋହିତ ପଟ୍ଟନାୟକ, କାର୍ଯ୍ୟକାରୀ ସଭାପତି କୁମାର ରାକେଶ, ସତ୍ୟ ପ୍ରକାଶ, ସମ୍ପାଦକ/ କୋଷାଧ୍ୟକ୍ଷ ଭାବେ ରାକେଶ ପ୍ରହରାଜ, ଯୁଗ୍ମ ସମ୍ପାଦକ ମୋହନ ଦାସ, ଅମିତ ବେରା, କାର୍ଯ୍ୟକାରୀ ସମ୍ପାଦକ ରଞ୍ଜନ ବେହେରା, ଅଫତାବ ହୁସେନ, ସହକାରୀ ସମ୍ପାଦକ ବିବେକ ସାହୁ, ରିତେଶ ପୃଷ୍ଟି, ସାଂସ୍କୃତିକ ସମ୍ପାଦକ ହିତେଶ ପୃଷ୍ଟି, ଅତିରିକ୍ତ ସାଂସ୍କୃତିକ ସମ୍ପାଦକ ଏସ କେ ଇନାୟତ, ଋଷିରାଜ ସୋରେନ, ଗଣମାଧ୍ୟମ ସଂଯୋଜକ ଦେବବ୍ରତ ଦେ, କ୍ଷୀରୋଦ କୁମାର ବେହେରା, କୁମାର ରାକେଶଙ୍କ ସମେତ ଅନ୍ୟାନ୍ୟ ସଦସ୍ୟ ମାନଙ୍କ ସହଯୋଗରେ ପୂଜାକୁ ଚଳିତ ବର୍ଷ ଆକର୍ଷଣିୟ କରିବାକୁ ପ୍ରସ୍ତୁତି ଜାରି ରହିଛି ।

ହିନ୍ଦୁସ୍ଥାନ ସମାଚାର / ଦିଲ୍ଲୀପ