ଭୁବନେଶ୍ୱର, ୨୬ ଅଗଷ୍ଟ (ହି.ସ.) – ଆର୍ଯ୍ୟ ସମାଜ, ଓଡ଼ିଶା ପକ୍ଷରୁ ଆସନ୍ତା ନବରାତ୍ରର ପ୍ରଥମ ଦିବସ, ସେପ୍ଟେମ୍ବର ୨୨ ତାରିଖରେ ଚନ୍ଦ୍ରଶେଖରପୁର ୱାର୍ଡ଼ ନଂ-୯ ଶ୍ରୀଅରବିନ୍ଦ ନଗରସ୍ଥିତ ସ୍ୱାମୀ ବ୍ରହ୍ମାନନ୍ଦ ଭବନଠାରେ ନବମାତୃକା ପୂଜା ଅନୁଷ୍ଠିତ ହେବ ବୋଲି ଆର୍ଯ୍ୟ ସମାଜ, ଓଡ଼ିଶାର ଅଧ୍ୟକ୍ଷ ଡଃ ଆର୍ଯ୍ୟକୁମାର ଜ୍ଞାନେନ୍ଦ୍ର ଏକ ପ୍ରେସ୍ ବିଜ୍ଞପ୍ତିରେ ଜଣାଇଛନ୍ତି।
ଏହି କାର୍ଯ୍ୟକ୍ରମର ସୁପରିଚାଳନା ପାଇଁ ମଙ୍ଗଳବାର ପୂର୍ବାହ୍ନରେ ଡଃ ଜ୍ଞାନେନ୍ଦ୍ରଙ୍କ ପୌରହିତ୍ୟରେ ଏକ ପ୍ରସ୍ତୁତି ବୈଠକ ସ୍ୱାମୀ ବ୍ରହ୍ମାନନ୍ଦ ଭବନଠାରେ ଅନୁଷ୍ଠିତ ହୋଇଯାଇଛି। ପୂର୍ବବର୍ଷ ମାନଙ୍କ ଭଳି ଚଳିତବର୍ଷ ସମାଜର ବିଭିନ୍ନ ବର୍ଗର ୯ଜଣ ମା’ଙ୍କୁ ପୂଜା କରାଯିବ। ଏହି ଉପଲକ୍ଷେ ବୈଦିକ ଯଜ୍ଞ, ମାତୃପୂଜା ଓ ବିଶିଷ୍ଟ ସନ୍ଥ ସ୍ୱାମୀ ବ୍ରହ୍ମାନନ୍ଦ ସରସ୍ୱତୀ, ବାବା ପ୍ରଣବାନନ୍ଦ ଦାସ ଓ ସିଦ୍ଧଗିରି ମଠର ମହନ୍ତ ବାବା ବିଶ୍ୱନାଥ ଦାସ ଆଶୀର୍ବଚନ ଦେବାର କାର୍ଯ୍ୟକ୍ରମ ରହିଛି। ସମସ୍ତ କାର୍ଯ୍ୟକ୍ରମକୁ ଉତ୍କଳ ଆର୍ଯ୍ୟ ପ୍ରତିନିଧି ସଭାର କାର୍ଯ୍ୟକାରୀ ଅଧ୍ୟକ୍ଷ ପଣ୍ଡିତ ବୀରେନ୍ଦ୍ର କୁମାର ପଣ୍ଡା ପରିଚାଳନା କରିବେ ଓ ପଣ୍ଡିତ ବିନୋଦ ବିହାରୀ ଦାସ ସହଯୋଗ କରିବେ।
ଏହି ଏକଦିବସୀୟ ମାତୃପୂଜା କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଭୁବନେଶ୍ୱର ମହାନଗର ନିଗମର ମେୟର ସୁଲୋଚନା ଦାସ ଯୋଗଦେବେ ଓ ସମ୍ମାନିତ ଅତିଥି ଭାବେ ପୂର୍ବତନ ମନ୍ତ୍ରୀ ନିରଞ୍ଜନ ପଟ୍ଟନାୟକ, ଭୁବନେଶ୍ୱର ଉତର ବିଧାୟକ ସୁଶାନ୍ତ କୁମାର ରାଉତ, ପର୍ବତନ ମନ୍ତ୍ରୀ ପଂଚାନନ କାନୁନଗୋ, ପୂର୍ବତନ କୁଳପତି ପ୍ରଫେସର ଡଃ ପ୍ରଫୁଲ୍ଲ ମିଶ୍ର, ପ୍ରଫେସର ଡଃ ହରେକୃଷ୍ଣ ଶତପଥୀ, ବାଗ୍ମୀ ପ୍ରଦ୍ୟୁମ୍ନ କୁମାର ଶତପଥୀ, ପ୍ରଗତିବାଦୀର କାର୍ଯ୍ୟକାରୀ ସମ୍ପାଦକ ବିରୁପାକ୍ଷ ତ୍ରିପାଠୀ ଓ ପୁରୀ ଜିଲ୍ଲା ପରିଷଦର ପୂର୍ବତନ ଅଧ୍ୟକ୍ଷା ଶ୍ରୀମତୀ ମଞ୍ଜୁ ମହାନ୍ତି ଯୋଗଦେବା ପାଇଁ ସଦୟ ସ୍ୱୀକୃତି ପ୍ରଦାନ କରିଛନ୍ତି।
ବିଶିଷ୍ଟ ବେଦବିତ୍ ଡଃ ଇଂ ପ୍ରିୟବ୍ରତ ଦାସ, ଇଂ ବ୍ରଜବନ୍ଧୁ ପଣ୍ଡା ଓ ଶନ୍ନୋଦେବୀ ମାତୃପୂଜାର ଉଦ୍ଦେଶ୍ୟ ଉପରେ ନିଜସ୍ୱ ମତ ସହ ଆଶୀର୍ବାଦ ପ୍ରଦାନ କରିବେ। ଡଃ ଜ୍ଞାନେନ୍ଦ୍ର ଆହୁରି କହିଛନ୍ତି ଯେ, ଏହି ମାତୃପୂଜା କାର୍ଯ୍ୟକ୍ରମରେ ୯ଜଣ ମା’ଙ୍କ ମଧ୍ୟରେ ଦୁଇଜଣ ପତିହରା ମା’ ମଧ୍ୟ ଭାଗ ନେବେ। ସେମାନେ ହେଲେ କନକଲତା ବିଶ୍ୱାଳ ଓ ସବିତା ପ୍ରଧାନ। ଜୀବିତ ମା’ମାନଙ୍କୁ ପୂଜା ଦ୍ୱାରା ସମାଜକୁ ଏକ ସଂସ୍କାରର ବାର୍ତା ଦେବା ଆର୍ଯ୍ୟ ସମାଜର ମୁଖ୍ୟ ଉଦ୍ଦେଶ୍ୟ। ମା ସ୍ୱର୍ଣ୍ଣପ୍ରଭା ପଟ୍ଟନାୟକ, ପୁଷ୍ପରେଣୁ ଶତପଥୀ, ରାଜଶ୍ରୀ ମହାପାତ୍ର, ଆରତୀ ଜ୍ଞାନେନ୍ଦ୍ର, ସୁଲୋଚନା ପାଣିଗ୍ରାହୀ, ବିଚିତ୍ରା ରଥ, ବିୟୋତପ୍ରଜ୍ଞା ତ୍ରିପାଠୀ। ସେଂଟ ଜାଭିୟର ଇଂଟରନ୍ୟାସନାଲ ସ୍କୁଲ୍ର ୯ଜଣ ଛାତ୍ରୀ ନବମାତୃକାଙ୍କୁ ପୂଜା ଆରଧନା କରିବାର କାର୍ଯ୍ୟକ୍ରମ ରହିଛି।
ହିନ୍ଦୁସ୍ଥାନ ସମାଚାର / ଭାନୁ ଚରଣ
