ମାଲକାନଗିରି, ୨୬ ଅଗଷ୍ଟ (ହି.ସ.)- ପ୍ରବଳ ବର୍ଷା ଯୋଗୁ ଗୋବିନ୍ଦପାଲି ଘାଟି ସପ୍ତଧାରା ନଦୀ ଜଳ ରାସ୍ତା ଉପରେ ୩ ଫୁଟ ଉଚ୍ଚରେ ପ୍ରବାହିତ ହେବା ଦ୍ବାରା ଜୟପୁର- ମାଲକାନଗିରି ୩୨୬ ନମ୍ବର ଜାତୀୟ ରାଜପଥରେ ଯାନବାହନ ଚଳାଚଳ ୨ ଘଣ୍ଟା ପାଇଁ ଠପ ହୋଇଯାଇଥିଲା। ରାସ୍ତାର ଉଭୟ ପାର୍ଶ୍ବରେ ବହୁ ସଂଖ୍ୟାରେ ଯାନବାହନ ଅଟକି ରହିଥିଲା। ଆଜି ସକାଳ ୯ ଟାରେ ମାଲକାନଗିରି ସହରରେ ପ୍ରବଳ ବର୍ଷା ହେବା ଦ୍ବାରା ଜାତୀୟ ରାଜପଥରେ କୃତିମ ବନ୍ୟା ସୃଷ୍ଟି ହୋଇ ପାଣିର ସୁଅ ଛୁଟି ଥିଲା। ବର୍ଷା ଯୋଗୁ ଅନ୍ଧାର ହୋଇଯାଇଥିବାରୁ ଟ୍ରକ ଓ ବସ ଗୁଡିକ ଲାଇଟ ଲଗାଇ ପାଣି ସ୍ରୋତରେ ଯାତାୟତ କରୁଥିବାର ଦେଖିବାକୁ ମିଳିଥିଲା।
ଜିଲ୍ଲାର ୭ ବ୍ଲକରେ ୨୪ ଘଣ୍ଟା ମଧ୍ୟରେ ସର୍ବ ମୋଟ ୩୪୩ ମିଲିମିଟର ବର୍ଷା ହୋଇଥିବା ବେଳେ ସମଗ୍ର ଜିଲ୍ଲାରେ ହାରାହାରି ୪୯.୦୧ ମିଲିମିଟର ବର୍ଷା ରେକର୍ଡ଼ ହୋଇଛି । ମାଲକାନଗିରି ବ୍ଲକ ଅଞ୍ଚଳରେ ୩୨.୮ ମିଲିମିଟର ବର୍ଷା, ମାଥିଲି ବ୍ଲକରେ ୯୬ ମିଲିମିଟର ବର୍ଷା, ଖଇରପୁଟ ବ୍ଲକରେ ୮୨ ମିଲିମିଟର ବର୍ଷା, କୋରୁକୋଣ୍ଡା ବ୍ଲକରେ ୨୬ ମିଲିମିଟର, ଚିତ୍ରକୋଣ୍ଡା ବ୍ଲକରେ ୬୦ ମିଲିମିଟର, କାଲିମେଳା ବ୍ଲକରେ ୨୮ ମିଲିମିଟର, ପଡିଆ ବ୍ଲକରେ ୧୮.୩ ମିଲିମିଟର ବର୍ଷା ହୋଇଥିବାର ଜିଲା ଜରୁରୀକାଳୀନ ବିଭାଗ ସୂତ୍ରରୁ ସୂଚନା ମିଳିଛି।
ହିନ୍ଦୁସ୍ଥାନ ସମାଚାର / ଶିବବ୍ରତ
