ବାରିପଦା, ୨୬ ଅଗଷ୍ଟ (ହି.ସ.)- ବାରିପଦା ସହରରେ ନୂତନ ବସଷ୍ଟାଣ୍ଡ ନିର୍ମାଣ କରିବା ପାଇଁ ୨ ହଜାରରୁ ଉର୍ଦ୍ଧ୍ବ ଗଛ କଟାଯିବାକୁ ନିଷ୍ପତ୍ତି ହୋଇଛି। ଯାହାକୁ ଭଞ୍ଜସେନା ପକ୍ଷରୁ ବିରୋଧ କରି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଛି l ବାରିପଦା ସହର ବିଶ୍ୱର ସବୁଠାରୁ ଉତ୍ତପ୍ତ ସହର ଭାବେ ପରିଗଣିତ ହୋଇଥିବା ବେଳେ ବୃକ୍ଷ ରୋପଣ କାର୍ଯ୍ୟକ୍ରମକୁ ପ୍ରାଧାନ୍ୟ ଦିଆଯାଉଛି। କିନ୍ତୁ ସରକାରୀ ସ୍ତରରେ ଅନେକ ଗଛ କାଟିବାକୁ ନିଷ୍ପତ୍ତି ନିଆଯାଇଛି। ବାରିପଦାରେ ଅନେକ ସରକାରୀ ଜମି ଥିବା ସତ୍ତ୍ୱେ ପାଲବଣିରେ ବସଷ୍ଟାଣ୍ଡ ନିର୍ମାଣ ନିଷ୍ପତ୍ତି ହୋଇଛି। ଯାହା ଫଳରେ ୨ହଜାରରୁ ଉର୍ଦ୍ଧ୍ବ ମୂଲ୍ଯବାନ ଗଛ କଟାଯିବ। ପ୍ରସ୍ତାବିତ ଜାଗାର ୩୦୦ ମିଟର ଦୂରରେ ୧୨ ଏକର ସରକାରୀ ଜମି, ଲେଡି ହେମିଲଟନ ବାଳିକା ମହାବିଦ୍ୟାଳୟ ପଛପଟେ ୭ଏକର ଜମି ରହିଛି। ଉକ୍ତ ଜମି ଜବରଦଖଲ ମୁକ୍ତ ଥିବାବେଳେ କମ ଗଛ ରହିଛି। ଏହା ସତ୍ତ୍ୱେ ସେଠାରେ ବସଷ୍ଟାଣ୍ଡ ନ କରି ଗଛ କାଟି ଦେବାକୁ ସରକାରୀ ନିଷ୍ପତ୍ତି ହୋଇଛି। ଏହାଦ୍ଵାରା ପରିବେଶକୁ ହାନି ପହଞ୍ଚିବା ସହ ବାରିପଦା ବାସୀ ଗ୍ରୀଷ୍ମ ଋତୁରେ ପୂର୍ବ ଅପେକ୍ଷା ଅଧିକ ଗରମ ଅନୁଭବ କରିବେ। ଏହିପରି ଘୃନ୍ୟ ପ୍ରଚେଷ୍ଟାକୁ ଭଞ୍ଜସେନା ପକ୍ଷରୁ ନିନ୍ଦା କରି, ଏହିଭଳି ଜନବିରୋଧୀ କାର୍ଯ୍ୟ ବନ୍ଦ କରିବା ନିବେଦନ କରିଛନ୍ତି।

ପ୍ରତିନିଧି ଦଳରେ ବାରିପଦା ସହର ସଭାପତି ରାକେଶ ମହାନ୍ତି, ରାକେଶ ଆଚାର୍ଯ୍ୟ, ଦୀପକ କୁମାର ବେହେରା, ଆକାଶ ବାରିକ, ଚୈତନ୍ୟ ମୁଖୀ ପ୍ରମୁଖ ଉପସ୍ଥିତ ଥିଲେ। ଆଉ ଆଗାମୀ ଦିନରେ ଯଦି ଏଭଳି ଜନବିରୋଧୀ କାର୍ଯ୍ୟକୁ ବନ୍ଦ ନ ହେବ ଭଞ୍ଜସେନା ପକ୍ଷରୁ ଜିଲ୍ଲାପାଳ ଏବଂ ଡିଏଫଓ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବ ବୋଲି ଜିଲ୍ଲା ସାଧାରଣ ସମ୍ପାଦକ ତଥା ଜିଲ୍ଲା ମୁଖପାତ୍ର ଜ୍ଯୋତିରଞ୍ଜନ ପୃଷ୍ଟି ଏକ ପ୍ରେସ ବିବୃତ୍ତି ଦ୍ଵାରା ଜଣାଇଛନ୍ତି l

ହିନ୍ଦୁସ୍ଥାନ ସମାଚାର / ଦିଲ୍ଲୀପ