ସମ୍ବଲପୁର, ୨୭ ଅଗଷ୍ଟ(ହି.ସ.) – ସମ୍ବଲପୁର ସହର ସନ୍ନିକଟ ବୁର୍ଲା ସହରର ଶ୍ରୀରାମବିହାର ପାର୍କ ସମ୍ମୁଖରେ ଆଜି ଏକ ଦ୍ରୃତଗାମୀ ବାଇକ୍ ଧକ୍କାରେ ଜଣେ ସ୍କୁଟି ଚାଳକଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି। ବାଇକ ଚାଳକଙ୍କୁ ସ୍ଥାନୀୟ ଲୋକେ ଗୁରୁତର ଅବସ୍ଥାରେ ଉଦ୍ଧାର କରି ଭିମସାର ଡାକ୍ତରଖାନାକୁ ଚିକିତ୍ସା ପାଇଁ ପଠାଇଛନ୍ତି। ବୁର୍ଲା ପୋଲିସ ଘଟଣାସ୍ଥଳରେ ପହଂଚି ମୃତକଙ୍କ ଶବ ଜବତ କରି ବ୍ୟବଚ୍ଛେଦ ପାଇଁ ଭିମସାରକୁ ପଠାଇବା ସହ ବାଇକ୍ ଓ ସ୍କୁଟିକୁ ଜବତ କରିଛି। ଏହି ଦୁର୍ଘଟଣାରେ ସମ୍ବଲପୁର ବିଶ୍ୱବିଦ୍ୟାଳୟର ଅବସରପ୍ରାପ୍ତ କର୍ମଚାରୀ ୬୨ ବର୍ଷିୟ ଦୟାନନ୍ଦ ନାଏକଙ୍କ ମୃତ୍ୟୁ ଘଟିଛି । ଅବସର ପରେ ସେ ଶ୍ରୀରାମ ବିହାରରେ ପରିବାର ସହ ରହୁଥିଲେ। ଆଜି ସକାଳ ୮ଟା ବେଳେ କୈଣସି କାମକୁ ନେଇ ନିଜ ସ୍କୁଟି ଓଡି୧୫ ବି ୮୯୯୬ରେ ଘରୁ ବୁର୍ଲା ଆଡକୁ ଯାଉଥିଲେ। ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ ଭିଆଇପି ରାସ୍ତାର ବାମପଟେ ନଯାଇ ଡାହାଣ ପଟ ରାସ୍ତାରେ ବୁର୍ଲା ସହର ପଟକୁ ଯାଉଥିଲେ। ଏହି ସମୟରେ ବୁର୍ଲା ପଟରୁ ଦ୍ରୁତ ଗତିରେ ଆସୁଥିବା ଓଡି୧୫ ଏକ୍ସ ୮୩୧୭ ନମ୍ବର ବାଇକ୍ ମୁହାଁମୁହିଁ ଧକ୍କା ଦେଇଥିଲା। ଦୁର୍ଘଟଣା ଏତେ ତୀବ୍ର ଥିଲା ଯେ, ବାଇକ ଚାଳକ ଜଣଙ୍କ ପ୍ରାୟ ୫୦ ମିଟର ଯାଏଁ ଘୋଷାଡ଼ି ହୋଇ ପଡ଼ିଥିବା ବେଳେ ବାଇକଟି ଆହୁରି ୫୦ ମିଟର ଆଗକୁ ଯାଇ ପାର୍କ କଡ଼ରେ ପଡ଼ିଥିଲା। ବାଇକ ଚାଳକ ଜଣଙ୍କ ବୁର୍ଲା ସହର ଗେଡ଼ପାଲି ଅଂଚଳର ରେଳ ବିଭାଗର କର୍ମଚାରୀ ୩୦ ବର୍ଷିୟ ରମାକାନ୍ତ ବେହେରା ବୋଲି ଜଣାଯାଇଛି।
ହିନ୍ଦୁସ୍ଥାନ ସମାଚାର/ଶୈଳେଶ/ବୀଣାପାଣି
.......................................
ହିନ୍ଦୁସ୍ଥାନ ସମାଚାର / ଶୈଳେଶ
