ଗଛକୁ ଧକ୍କା ଦେଲା ବାଇକ, ଚାଳକ ସହ ଆରୋହୀ ମୃତ
ଗଛକୁ ଧକ୍କା ଦେଲା ବାଇକ, ଚାଳକ ସହ ଆରୋହୀ ମୃତ ।
ଗଛକୁ ଧକ୍କା ଦେଲା ବାଇକ, ଚାଳକ ସହ ଆରୋହୀ ମୃତ


ବାରିପଦା, ୨୮ ଅଗଷ୍ଟ (ହି.ସ.)- ବାଇକରେ ଲୁଲୁଙ୍ଗ ବୁଲିବାକୁ ଯାଇଥିବା ବେଳେ ଦୁର୍ଘଟଣା ଘଟି ଦୁଇ ଜଣ ନାବାଳକ ବନ୍ଧୁଙ୍କ ମୃତ୍ୟୁ ହୋଇଛି। ରାସ୍ତା କଡରେ ଥିବା ଗଛକୁ ଧକ୍କା ଦେଇ ଘଟଣାସ୍ଥଳରେ ଦୁଇ ଜଣଙ୍କର ମୃତ୍ୟୁ ହୋଇଛି। ମୃତକ ନାବାଳକ ଦ୍ୱୟ ହେଲେ ବାଙ୍ଗିରିପୋଷି ଥାନା ଅନ୍ତର୍ଗତ ବାଙ୍ଗିରିପୋଷି ଅଞ୍ଚଳର ଶୁଭମ ନାଏକ(୧୭) ଓ ରାକେଶ ନାଏକ(୧୭)।

ଗୁରୁବାର ପୂର୍ବାହ୍ନରେ ୪ ଜଣ ସାଙ୍ଗ ଦୁଇଟି ବାଇକରେ ଶିମିଳିପାଳ ଅଭୟାରଣ୍ୟର ପାଦଦେଶ ସ୍ଥିତ ଲୁଲୁଙ୍ଗକୁ ବୁଲିବାକୁ ଆସିଥିଲେ। ବୁଲା ବୁଲି ସାରି ଘରକୁ ପ୍ରତ୍ୟାବର୍ତ୍ତନ କରିବା ବେଳେ ବାରିପଦା ସଦର ଥାନା ଅନ୍ତର୍ଗତ କୋଚିଲାଘାଟି ଗ୍ରାମ ନିକଟରେ ରାସ୍ତା ପାର୍ଶ୍ବରେ ଥିବା ଗଛକୁ ଭାରସାମ୍ୟ ହରାଇ ଏକ ବାଇକ ଧକ୍କା ଦେଇଥିଲା। ଯାହା ଫଳରେ ବାଇକ ଚାଳକ ସହ ପଛ ଆରୋହୀ ରାସ୍ତାରେ ଖସି ପଡିବାରୁ ମୁଣ୍ଡରେ ଜୋର ଆଘାତ ଲାଗି ପ୍ରଚୁର ରକ୍ତସ୍ରାବ ହୋଇଥିଲା। ଅନ୍ୟ ଦୁଇ ଜଣ ସାଙ୍ଗ ସେମାନଙ୍କୁ ଆଣି ପିଆରଏମ ହସ୍ପିଟାଲରେ ଭର୍ତ୍ତି କରିଥିଲେ। ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି। ପରିବାର ଲୋକେ ଖବର ପାଇ ହସ୍ପିଟାଲରେ ପହଞ୍ଚିଥିଲେ। ଦୁର୍ଘଟଣା ନେଇ ବାରିପଦା ସଦର ଥାନାରେ ଏକ ମାମଲା ରୁଜୁ କରି ଶବ ବ୍ୟବଚ୍ଛେଦ କରାଯାଇଛି।

ହିନ୍ଦୁସ୍ଥାନ ସମାଚାର / ଦିଲ୍ଲୀପ


 rajesh pande