ବୌଦ୍ଧ, ୨୮ ଅଗଷ୍ଟ (ହି.ସ.) - ନୂଆଖାଇ ମିଳନର ପର୍ବ । ଗରିବ ଠାରୁ ନେଇ ଧନିକ ଶ୍ରେଣୀ ପର୍ଯ୍ୟନ୍ତ ସମସ୍ତଙ୍କ ପାଇଁ ଏକ ଭାଇଚାରା ର ପର୍ବ । ଭେଦଭାବ ଭୁଲି ଭାଇ ଭାଇ , ପରିବାରର ସମସ୍ତ ସଦସ୍ୟ ଏକ ହୁଅନ୍ତି ନୂଆଖାଇ ପାଳିବା ପାଇଁ । ସେହିପରି ସହର ହେଉ କି ଗ୍ରାମ ହେଉ ସାଙ୍ଗ ସାଥି, ପଡାବାସୀ, ଗ୍ରାମବାସୀ ସମସ୍ତେ ମିଳିମିଶି ପାଳନ କରନ୍ତି ନୂଆଖାଇ । ଏକତ୍ର ହୁଅନ୍ତି ଭେଦଭାବ, ରାଗରୁଷ. ମାନଅଭିମାନ ସବୁ ଭୁଲି । ପଶ୍ଚିମ ଓଡିଶାର ଗଣପର୍ବ ନୂଆଖାଇ । ନୂଆଖାଇ ଅବସରରେ ଆଜି ସମଗ୍ର ବୌଦ୍ଧ ଜିଲ୍ଳା ଉତ୍ସବ ମୁଖର ଓ ଚଳଚଂଚଳ ହୋଇ ଉଠିଛି । ଘର ଘରେ , ଗାଁ ଗାଁରେ ଢ଼ିଙ୍କିକୁଟା ନୂଆ ଚାଉଳରେ ଭାତ ,ଖିରୀ, ଜୁଖା ତିଆରି ହୋଇଛି ନବାନ୍ନ ପାଇଁ । ତା ସହିତ ହୋଇଛି ଭୋଜିଭାତର ଆସର । ସମସ୍ତଙ୍କ ଘରେ କୁଣିଆ, ବନ୍ଧୁବାନ୍ଧବରେ ଭରପୁର । ବାହାରେ କାମ କରୁଥିବା ଲୋକେ ସପରିବାର ଗାଁ କୁ ଆସି ନୂଆଖାଇରେ ସାମିଲ ହୋଇଛନ୍ତି । ଗ୍ରାମଦେବାଦେବୀଙ୍କ ଠାରେ ନବାନ୍ନ ଲାଗି କରିବା ପରେ ସମସ୍ତେ ନବାନ୍ନ ଗ୍ରହଣ କରିଛନ୍ତି । ନବାନ୍ନ ଭକ୍ଷଣ ପରେ ଆରମ୍ଭ ହୋଇଥିଲା ଭେଟଘାଟ ଓ ଜୁହାରମୁଣ୍ଡିଆର ପର୍ବ । ସାନ ମାନେ ବଡ ମାନଙ୍କୁ ମୁଣ୍ଡିଆ ମାରିବା ସହ ଆର୍ଶିବାଦ ଭିକ୍ଷା କରିଥିଲେ ଓ ନିଜନିଜ ଭିତରେ ଶୁଭେଚ୍ଛାର ଆଦାନ ପ୍ରଦାନ କରିଥିଲେ । ବୌଦ୍ଧଗଡ ରାଜ୍ୟର ଅଧିଷ୍ଠାତ୍ରୀ ଦେବୀ ମା ଭୌରବୀଙ୍କ ପୀଠରେ ଆଜି ସକାଳ ୧୦.୪୫ ସମୟରେ ନବାନ୍ନ ଲାଗି କରାଯାଇଛି । ଏହି ଅବସରରେ ଏକ ସାଙ୍ଗରେ ଶତାଧିକ ଭକ୍ତ ନବାନ୍ନ ଭୋଗ ଗ୍ରହଣ କରିଛନ୍ତି । ପଶ୍ଚିମ ଓଡିଶାର ଗଣପର୍ବ ନୂଆଖାଇ । ନୂଆଖାଇ ଅବସରରେ ଆଜି ସମଗ୍ର ବୌଦ୍ଧ ଜିଲ୍ଳା ଉତ୍ସବ ମୁଖର ଓ ଚଳଚଂଚଳ ହୋଇ ଉଠିଛି । ବୌଦ୍ଧଗଡ ରାଜ୍ୟର ଅଧିଷ୍ଠାତ୍ରୀ ଦେବୀ ମା ଭୌରବୀଙ୍କ ପୀଠରେ ଧାର୍ଯ୍ୟ ଲଗ୍ନରେ ନବାନ୍ନ ଲାଗି କରାଯାଇଥିଲା । ମହାନଦୀରେ ପୁଜା କରି ମହାନଦୀର ପବିତ୍ର ଜଳକୁ ଏକ ଶୋଭାଯାତ୍ରାରେ ଅଣାଯାଇ ଦେବୀଙ୍କ ପାଇଁ ନବାନ୍ନ ପ୍ରସ୍ତୁତ କରାଯାଇଥିଲା । ମୁଖ୍ୟ ପୁଜକ ଗୌରି ପ୍ରସାଦ ବଡମାଳି , ପାଳିଆ ପୂଜକ ହରିହର ବଡମାଳି, ରାଜୀବ ବଡ଼ମାଳି ବିଧି ନିୟମ ପ୍ରକାରେ ସ୍ୱତନ୍ତ୍ର ପୂଜା କରିବା ପରେ ପ୍ରଥମେ ମା ଭୈରବୀଙ୍କ ଠାରେ ନବାନ୍ନ ଲାଗି କରିବା ପରେ ପାର୍ଶ୍ୱ ଦେବାଦେବୀମାନଙ୍କୁ ନବାନ୍ନ ଅର୍ପଣ କରିଥିଲେ । ଏହି ଅବସରରେ ମନ୍ଦିର ଚୁଡାରେ ନୂତନ ଧ୍ୱଜା ଲାଗିଥିଲା । ଭୈରବୀଙ୍କ ଠାରେ ମହାଆଳତି କରିବା ପରେ ଭକ୍ତ ମାନେ ସାମୁହିକ ଭାବେ ଦେବୀଙ୍କ ନବାନ୍ନ ସେବନ କରିଥିଲେ । ସରକାରୀ ଦଳ ମୁଖ୍ୟ ସଚେତକ ତଥା ବୌଦ୍ଧ ବିଧାୟକ ସରୋଜ କୁମାର ପ୍ରଧାନ ଯୋଗଦେଇ ପୂଜା କରିଥିଲେ । ପୂଜା କାର୍ଯ୍ୟରେ ବିଭୂତି ଭୂଷଣ ବଡମାଳି , ସାନନ୍ଦ ବଡମାଳି, ତରଣୀ ବଡମାଳି, ଧନେଶ୍ୱର ବଡମାଳି, ବିଶୁ ବଡମାଳି, ରାଜୁ ବଡମାଳି, ଏକ ବଡ଼ମାଳି ଏବଂ ଅନ୍ୟ ମାନେ ସହଯୋଗ କରିଥିଲେ । ସମସ୍ତ କାର୍ଯ୍ୟକ୍ରମରେ ଅମର ସାହୁ, ସମ୍ପଦ ଅଗ୍ରୱାଲ, ହରେଷ ନାୟକ, ଆଲୋକ ମହାପାତ୍ର, ଫକୀର ଘଡେଇ ଙ୍କ ସମତେ ଅନ୍ୟମାନେ ପରିଚାଳନା କରିଥିଲେ । ଗଣମାଧ୍ୟମ ପ୍ରତିନିଧି ଓ ଶତାଧିକ ଭକ୍ତ ସାମିଲ ହୋଇଥିଲେ ।
ହିନ୍ଦୁସ୍ଥାନ ସମାଚାର / ସମ୍ପତ
