ବାରିପଦା, ୨୯ ଅଗଷ୍ଟ (ହି.ସ.)- କୁଡୁମି ସମ୍ପ୍ରଦାୟକୁ ଆଦିବାସୀ ମାନ୍ୟତା ଦାବି କରି କୁଡୁମୀ ସେନା ପକ୍ଷରୁ କଳା ଦିବସ ପାଳନ କରାଯିବ। ନିଜର ହକ ପାଇଁ ବିଜେପି ସରକାର ବିରୁଦ୍ଧରେ ପଲ୍ଲୀରୁ ଦିଲ୍ଲୀ ପର୍ଯ୍ୟନ୍ତ ଆନ୍ଦୋଳନ କରିବା ବୋଲି ଶୁକ୍ରବାର ଲାୟନ୍ସ କ୍ଳବ ଠାରେ ଆହୁତ ସାମ୍ବାଦିକ ସମ୍ମିଳନୀରେ ସୂଚନା ପ୍ରଦାନ କରିଛନ୍ତି। କୁଡୁମି ସମ୍ପ୍ରଦାୟକୁ ୧୯୫୦ ସେପ୍ଟେମ୍ବର ୬ ତାରିଖରେ ଆଦିବାସୀ ଜନଜାତି ତାଲିକାରୁ ବାଦ ଦିଆଯାଇଥିଲା। ଏଥିପରେ କୁଡୁମୀ ଜାତିକୁ ପୁନଃ ଆଦିବାସୀ ତାଲିକା ଭୁକ୍ତ କରିବା ପାଇଁ ଦାବି ହେଇ ଆସୁଥିଲେ ମଧ୍ୟ ଦାବି ପୂରଣ ହୋଇନାହିଁ। ତେଣୁକରି କୁଡୁମି ସେନା ପକ୍ଷରୁ ସେପ୍ଟେମ୍ବର ୬ ତାରିଖକୁ କଳା ଦିବସ ଭାବେ ପାଳିତ କରାଯାଇଥାଏ। ବିଜେପି ସରକାରଙ୍କ ପକ୍ଷରୁ ଜାରି ହୋଇଥିବା ଆଦିବାସୀ ମାନ୍ୟତା ପାଇଁ ଘୋଷଣା ପତ୍ରରେ ୧୬୯ଟି ଜନଜାତିର ନାମ ରହିଥିବା ବେଳେ କୁଡୁମି ସମ୍ପ୍ରଦାୟର ନାମ ନାହିଁ। ଯାହାକୁ ନେଇ କୁଡୁମି ସମ୍ପ୍ରଦାୟର ଜନସାଧାରଣଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେବେ ଆଦିବାସୀ ମାନ୍ୟତା ପାଇଁ ବାରମ୍ବାର ଓ ଆନ୍ଦୋଳନ ଜାରି ଥିଲେ ସୁଦ୍ଧା ବର୍ତ୍ତମାନ ସୁଦ୍ଧା ମାନ୍ୟତା ମିଳିଲା ନାହିଁ। ଦୀର୍ଘଦିନରୁ କୁଡୁମି ଜାତିକୁ ଅଣଦେଖା କରୁଥିବା ଅଭିଯୋଗ ହୋଇଛି। ତେଣୁକରି ବିକ୍ଷୋଭ ପ୍ରଦର୍ଶନ କରି ଆଦିବାସୀ ମାନ୍ୟତା ପାଇଁ ଦାବି କରି ବାରିପଦାରେ ବିଶାଳ ଜନ ଶୋଭାଯାତ୍ରା ଅନୁଷ୍ଠିତ ହେବ। ହଜାର ହଜାର ସଂଖ୍ୟାରେ କୁଡୁମୀ ସମ୍ପ୍ରଦାୟର ଲୋକେ କୁଡୁମୀ ଜାତିକୁ ପୁନଃ ଆଦିବାସୀ ତାଲିକା ଭୁକ୍ତ କରିବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ବିରୁଦ୍ଧରେ ଆନ୍ଦୋଳନ କରିବେ। ସରକାରୀ ଅବହେଳା ପାଇଁ ସେମାନେ ଆଦିବାସି ମାନ୍ୟତା ପାଉନଥିବା ବେଳେ ଅସନ୍ତୋଷ ପ୍ରକାଶ କରିଛନ୍ତି। ଆଗାମୀ ଦିନରେ ଦାବୀ ପୂରଣ ନହେଲେ ଆନ୍ଦୋଳନ ତୀବ୍ରତର କରାଯିବା ନେଇ ସଙ୍ଗଠନ ପକ୍ଷରୁ ଚେତାବନୀ ଦିଆଯାଇଛି।
ଉକ୍ତ କାର୍ଯ୍ୟକ୍ରମରେ କୁଡୁମୀ ସେନାର ସଭାପତି ଜୟୀମୁନି ମହାନ୍ତ ଅଧ୍ୟକ୍ଷତାରେ କୁଡୁମୀ ସଂଗଠନର ପ୍ରମୁଖ କର୍ମକର୍ତ୍ତା ମାନଙ୍କ ସହଯୋଗରେ କାର୍ଯ୍ୟକ୍ରମ ଅନୁଷ୍ଠିତ ହୋଇଛି।
ହିନ୍ଦୁସ୍ଥାନ ସମାଚାର / ଦିଲ୍ଲୀପ
