ଜୟପୁର, ୨୯ ଅଗଷ୍ଟ (ହି.ସ.)-

ଲଗାଣ ବର୍ଷାରେ ରାସ୍ତା ମଝିରେ ସୃଷ୍ଟି ହେଲା ଘାଇ l ଚାରି ଖଣ୍ଡ ଲୁହା ପାଇପ୍ ସାଜିଛି ଗାଁ ରାସ୍ତା । ଯାତାୟାତ ବାଧାପ୍ରାପ୍ତ l ବାଧ୍ୟ ହୋଇ ଜୀବନକୁ ବାଜି ଲଗାଇ ଗମନା ଗମନ କରୁଛନ୍ତି ଅଂଚଳ ବାସୀ l

ବୈପାରିଗୁଡା ବ୍ଲକ ଅନ୍ତର୍ଗତ ଦଣ୍ଡାବାଡ଼ି ପଞ୍ଚାୟତର ପଣଶପୁଟ ଗ୍ରାମରେ ଏଭଳି ଚିତ୍ର ଦେଖିବାକୁ ମିଳିଛି। ଗତ କିଛି ଦିନର ଲଗାଣ ବର୍ଷାରେ ଦଣ୍ଡାବାଡ଼ି ଓ ପଣଶପୁଟ ରାସ୍ତା ମଝିରେ ଥିବା କଲଭର୍ଟ ଭୁଶୁଡ଼ି ପଡ଼ିଛି, ରାସ୍ତା ମଝିରେ ଘାଇ ସୃଷ୍ଟି ହୋଇଛି l ଫଳରେ ଚିପାକୁର ଓ କାଠପୋଡା ପଂଚାୟତ ସମତ ୨୫ ଖଣ୍ଡ ଗାଁକୁ ଯୋଗାଯୋଗ ସଂପୂର୍ଣ୍ଣ ବିଚ୍ଛିନ୍ନ ହୋଇପଡ଼ିଛି। ବାଧ୍ୟହୋଇ ଲୋକେ କଲଭର୍ଟ ଉପରେ ଚାରି ଖଣ୍ଡ ଲୁହା ପାଇପ୍ ପକେଇ ଯାତାୟତ କରୁଛନ୍ତି। ରାସ୍ତାରେ ଘାଇ ସୃଷ୍ଟି ହେବା ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅଭିଭାବକ ମାନେ ପିଲାଙ୍କୂ ସ୍କୁଲ କଲେଜ ଛାଡ଼ିବା ପାଇଁ ଭୟ କରୁଛନ୍ତି। ସ୍ବାସ୍ଥ୍ୟ ସେବା ସଂପୂର୍ଣ୍ଣ ବ୍ୟାଘାତ ହୋଇଛି। ଗାଁ ଗୁଡ଼ିକରେ ଆମ୍ବୁଲାନ୍ସ ପହଞ୍ଚି ପାରୁନଥିବାରୁ ଗର୍ଭବତୀ ମହିଳା କିମ୍ବା ଗୁରୁତର ରୋଗୀଙ୍କୁ ଡାକ୍ତରଖାନା ପର୍ଯ୍ୟନ୍ତ ପହଞ୍ଚେଇବା କଷ୍ଟକର ହୋଇ ପଡୁଛି।

ଏ ସଂପର୍କରେ ଦଣ୍ଡାବାଡି ସରପଞ୍ଚ ଚେଣ୍ଡିଆ ଖିଲଙ୍କୁ ପଚାରିବାରୁ, ଏହା ଆରଡ଼ି ବିଭାଗର କାମ ଏବଂ ପୂର୍ବରୁ ଦୁଇଥର ଏହି କଲଭର୍ଟ ଭୁଶୁଡ଼ି ପଡ଼ିଥିଲା। ନିଜ ଖର୍ଚ୍ଚରେ ମରାମତି କରିଥିଲି। ଏଥର ରାସ୍ତା ମଝିରେ ଘାଇ ସୃଷ୍ଟି ହୋଇଛି। ବାରମ୍ବାର ଆରଡ଼ି ବିଭାଗ ଯନ୍ତ୍ରୀଙ୍କୁ କହିବା ସତ୍ୱେ ସେ କୌଣସି ପଦକ୍ଷେପ ନେଇନାହାନ୍ତି। ତେଣୁ ମୁଁ ମୋ ପଞ୍ଚାୟତବାସୀଙ୍କ ସୁବିଧା ପାଇଁ ଆସନ୍ତାକାଲି ଗମନାଗମନର ସୁବିଧା କରିବି ବୋଲି ପ୍ରକାଶ କରିଥିଲେ ।

ହିନ୍ଦୁସ୍ଥାନ ସମାଚାର / ପିକେପି