ଚମ୍ପୁଆ, ୨୯ ଅଗଷ୍ଟ (ହି.ସ.) - ଚମ୍ପୁଆ ବ୍ଲକ୍ ଅନ୍ତର୍ଗତ କୋଦଗାଡିଆ ନିକଟରେ କେନାଲ ରାସ୍ତା ଉପରୁ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି। ସାଇକେଲରୁ ମୁହଁ ମାଡି ପଡିଯିବା ହେତୁ ଯୁବକଙ୍କ ମୃତ୍ୟୁ ଘଟିଥିବା ନେଇ ଅନୁମାନ କରାଯାଉଛି । ମୃତ ଯୁବକ ଚମ୍ପୁଆ ବ୍ଲକ୍ ସୁନାପଶି ଗ୍ରାମ ପତଳା ସାହିର ରାଧା ମହାନ୍ତଙ୍କ ପୁଅ ଦିଲ୍ଲୀପ ମହାନ୍ତ (୪୫) । ମିଳିଥିବା ସୂଚନା ଅନୁସାରେ, ଦିଲ୍ଲୀପ ଆଜି ବାସୁଦେବପୁର ସ୍ଥିତ ଓଡ଼ିଶା ଗ୍ରାମ୍ୟ ବ୍ୟାଙ୍କ କୁ ଯାଇ କାମ ସାରି ସେଠାରୁ କୋଦଗାଡିଆ ରୁ ମୁକୁନ୍ଦପୁର ଯାଇଥିବା କାନପୁର କେନାଲ ରାସ୍ତା ଦେଇ ଘରକୁ ଫେରୁଥିଲେ । ଅପରାହ୍ନରେ ମାଟିହଣା ସାହି ନିକଟରେ କେନାଲ ରାସ୍ତା ଉପରେ ଦିଲ୍ଲୀପ ମୁହଁ ମାଡି ପଡିଥିବା ଦେଖି ସ୍ଥାନୀୟ ଲୋକେ ଚମ୍ପୁଆ ପୁଲିସକୁ ଖବର ଦେଇଥିଲେ। ଖବରପାଇ ପୁଲିସ ଘଟଣା ସ୍ଥଳରେ ପହଂଚି ମୃତଦେହକୁ ଜବତ କରିଛି । ତେବେ ଘଟଣାସ୍ଥଳରେ ଦିଲ୍ଲୀପଙ୍କ ମୃତ୍ୟୁ ଘଟିଥିବା ନେଇ ସୂଚନା ମିଳିଥିବାବେଳେ ମୃତ୍ୟୁ ର କାରଣ ଅସ୍ପଷ୍ଟ ରହିଛି । ଚମ୍ପୁଆ ପୁଲିସ ମୃତଦେହକୁ ବ୍ୟବଛେଦ ପାଇଁ ଚମ୍ପୁଆ ଉପଖଣ୍ଡ ଚିକିତ୍ସାଳୟକୁ ପଠାଇ ଘଟଣାର ତଦନ୍ତ ଆରମ୍ଭ କରିଛି।

ହିନ୍ଦୁସ୍ଥାନ ସମାଚାର / Trinath Mahanta