ପୁରୀ, ୩୦ ଅଗଷ୍ଟ (ହି.ସ.)- ପୁରୀ ଜିଲ୍ଲା ଚନ୍ଦନପୁର ଥାନା ପୋଲିସ ବ୍ରାଉନସୁଗାର ବିକ୍ରି ଅଭିଯୋଗରେ ତିନି ଜଣଙ୍କୁ ଗିରଫ କରିଥିବା ବେଳେ ସେମାନଙ୍କ ନିକଟରୁ ସମୁଦାୟ ୧୫୭.୩୮ ଗ୍ରାମ୍ ବ୍ରାଉନସୁଗାର ଜବତ କରିଛି । ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ୧ ଲକ୍ଷ ୫୭ ହଜାର ଟଙ୍କା ହେବ ।

ଚନ୍ଦନପୁର ଥାନା ଅନ୍ତର୍ଗତ ନୂଆ ଜଗନ୍ନାଥ ସଡ଼କର ଭାଇଲିପୁର ଛକ ନିକଟ ଅନ୍ତିକେରା ପୋଲ ଉପରେ ବ୍ରାଉନସୁଗାର ବିକ୍ରି ହେଉଥିବା ସୂଚନା ପାଇ ଚନ୍ଦନପୁର ପୋଲିସ ଘଟଣାସ୍ଥଳରେ ଚଢ଼ଉ କରିଥିଲା । ଚନ୍ଦନପୁର ଥାନା ଅଧିକାରୀ ଓ ପୋଲିସ ଟିମ୍ ସେଠାରେ ଚଢ଼ଉ କରିଥିଲେ । ଦୁଇଟି ମୋଟର ସାଇକେଲ୍ ଓ ହୋଣ୍ଡା ଆକ୍ଟିଭାରେ ବ୍ରାଉନସୁଗାର ରଖି ସମ୍ପୃକ୍ତ ତିନି ଅଭିଯୁକ୍ତ ବିକ୍ରୀ ଉଦ୍ଦେଶ୍ୟରେ ସେଠାରେ ଛିଡା ହୋଇଥିଲେ । ପୋଲିସକୁ ଦେଖି ସେମାନେ ଖସିଯିବା ପାଇଁ ଉଦ୍ୟମ କରିଥିଲେ । ପୋଲିସ ତାଙ୍କୁ ଗୋଡାଇ ଧରିଥିଲା । ସେମାନଙ୍କୁ ପଚାରିବାରେ ସେମାନେ ବ୍ରାଉନସୁଗାର ବିକ୍ରି କରୁଥିବା ସ୍ୱୀକାର କରିଥିଲେ । ଘଟଣାସ୍ଥଳରୁ ଦୁଇଟି ବାଇକ୍ ଓ ଗୋଟିଏ ହୋଣ୍ଡା ଆକ୍ଟିଭା ସହ ୧୫୭.୩୮ ଗ୍ରାମ୍ ବ୍ରାଉନସୁଗାର ଓ ନଗଦ ୧ ଲକ୍ଷ ୬୩ ହଜାର ୫୨୦ ଟଙ୍କା ପୋଲିସ ଜବତ କରିଛି । ଏହା ସହ ସେମାନଙ୍କ ନିକଟରୁ ୩ଟି ମୋବାଇଲ ଫୋନ୍‌, ଗୋଟିଏ ଭଙ୍ଗା କତୁରୀ ଓ ଗୋଟିଏ ଛୁରୀ ଜବତ ହୋଇଛି । ଏ ସଂକ୍ରାନ୍ତରେ ଚନ୍ଦନପୁର ଥାନାରେ ୧୫୧/୨୫, ଏନଡିପିଏସ ଆକ୍ଟ ୨୧(ବି), ୨୯ ରେ ଏକ ମାମଲା ରୁଜ୍ଜୁ ହୋଇଛି । ଘଟଣାରେ ତିନି ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି । ଅଭିଯୁକ୍ତ ମାନେ ହେଲେ ପ୍ରଦୀପ କୁମାର ପଣ୍ଡା (୨୨), ଲିଟୁ ପ୍ରଧାନ (୪୦) ଏବଂ ନିରଞ୍ଜନ ପରିଡ଼ା (୩୦) । ପ୍ରଦୀପଙ୍କ ଘର ଚନ୍ଦନପୁର ଥାନା ଅନ୍ତର୍ଗତ ଚାଷପଡ଼ା ଗ୍ରାମରେ ହୋଇଥିବା ବେଳେ ଲିଟୁ ଓ ନିରଞ୍ଜନଙ୍କ ଘର ସେହି ଥାନା ଅନ୍ତର୍ଗତ ଭାଇଲିପୁର ଗ୍ରାମରେ ବୋଲି ଜଣାପଡିଛି । ଆଜି ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ଏସପି ପ୍ରତୀକ ସିଂ ଏହି ସୂଚନା ଦେଇଛନ୍ତି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ