ପୃଥକ ସଡ଼କ ଦୁର୍ଘଟଣାରେ ୨ ଯୁବକ ମୃତ
ବାରିପଦା ଓ ଶୁଳିଆପଦା ଅଞ୍ଚଳରେ ଅଜଣା ଗାଡି ଦୁର୍ଘଟଣାରେ ୨ ଯୁବକ ମୃତ
ପୃଥକ ସଡ଼କ ଦୁର୍ଘଟଣାରେ ୨ ଯୁବକ ମୃତ


ବାରିପଦା, ୩୦ ଅଗଷ୍ଟ (ହି.ସ.)- ମୟୂରଭଞ୍ଜ ଜିଲ୍ଲାର ସଦର ମହକୁମା ବାରିପଦା ଓ ଶୁଳିଆପଦା ଅଞ୍ଚଳରେ ଅଜଣା ଗାଡି ଦୁର୍ଘଟଣାରେ ୨ ଯୁବକଙ୍କ ମୃତ୍ୟୁ ହୋଇଛି। ମୃତକ ଦ୍ୱୟ ହେଲେ ଭଞ୍ଜପୁର ଥାନା ଅନ୍ତର୍ଗତ ବେଳଗଡ଼ିଆ, ୱାର୍ଡ ନମ୍ବର ୧ ଅଞ୍ଚଳର ଦିବ୍ୟ ପ୍ରସାଦ ସିଂ (୨୩) ଓ ଝାରପୋଖରିଆ ଥାନା ଅନ୍ତର୍ଗତ ରସାଳବଣି ଗ୍ରାମର ମୃତ୍ୟୁଞ୍ଜୟ ମହାନ୍ତ (୩୨)।

ଶୁକ୍ରବାର ବିଳମ୍ବିତ ରାତିରେ ଦିବ୍ୟ ପ୍ରସାଦ ସିଂ ବାଇକ ଯୋଗେ ଘରକୁ ପ୍ରତ୍ୟାବର୍ତ୍ତନ କରୁଥିବା ସମୟରେ ବାରିପଦା ସହରର ମୁର୍ଗାବାଡ଼ି ନିକଟସ୍ଥ କୁଷ୍ଠାଶ୍ରମ ଛକରେ ଏକ ଅଜଣା ଗାଡି ତାଙ୍କୁ ଧକ୍କା ଦେଇଥିଲା। ସେ ଭାରସାମ୍ୟ ହରାଇ ରାସ୍ତାରେ ପଡି ଯାଇଥିଲେ। ଯାହା ଫଳରେ ମୁଣ୍ଡରେ ଆଘାତ ଲାଗି ପ୍ରଚୁର ରକ୍ତସ୍ରାବ ହୋଇଥିଲା। ଶନିବାର ପ୍ରାତଃ ସମୟରେ ସ୍ଥାନୀୟ ଲୋକମାନେ ଗୁରୁତର ଅବସ୍ଥାରେ ଦିବ୍ୟ ପ୍ରସାଦଙ୍କୁ ଉଦ୍ଧାର କରି ପିଆରଏମ ହସ୍ପିଟାଲ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଛନ୍ତି। ଏନେଇ ପରିବାର ଲୋକଙ୍କ ଅଭିଯୋଗକ୍ରମେ ଭଞ୍ଜପୁର ଥାନାରେ ଏକ ମାମଲା ରୁଜୁ କରାଯାଇଛି।

ସେହିପରି ଶନିବାର ଦିନ ପ୍ରାୟ ଗୋଟାଏ ସମୟରେ ଚାନ୍ଦୁଆ ଥାନା ଅନ୍ତର୍ଗତ ସାନଦେଉଳି ଛକରେ ଅନ୍ୟ ଏକ ଅଜଣା ଗାଡି ଧକ୍କାରେ ମୃତ୍ୟୁଞ୍ଜୟ ମହାନ୍ତ ଗୁରୁତ୍ତର ଭାବେ ଆହତ ହୋଇଥିଲେ ଏବଂ ଚିକିତ୍ସା ନିମନ୍ତେ ପିଆରଏମ ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ଚାନ୍ଦୁଆ ଥାନାରେ ମାମଲା ରୁଜୁ ହୋଇଛି।

ହିନ୍ଦୁସ୍ଥାନ ସମାଚାର / ଦିଲ୍ଲୀପ


 rajesh pande