ମାଲକାନଗିରି, 30 ଅଗଷ୍ଟ (ହି.ସ.) ଭିନ୍ନକ୍ଷମ ଭେଣ୍ଡିଆ ପୁଅ ସହ ୯ ପ୍ରାଣୀ କୁଟୁମ୍ବର ବୋଝ ମୁଣ୍ଡାଇଛନ୍ତି ଜଣେ ବୃଦ୍ଧ । ମୁଣ୍ଡ ଗୁଞ୍ଜିବାକୁ ପକ୍କା ଘରଟିଏ ନାହିଁ । ବର୍ଷଭିଜା କୁଡ଼ିଆରେ ଦୟନୀୟ ଜୀବନ ବିତାଉଛନ୍ତି। ତଥାପି ଆଜି ପର୍ଯ୍ୟନ୍ତ ଏହି ଗରିବ ପରିବାରକୁ ଆବାସ ଯୋଜନାରେ ସାମିଲ କରାଯାଇ ନାହିଁ। ଏମିତିକି ୯ ଜଣ ସଦସ୍ୟ ଥିବା ବେଳେ ମାତ୍ର ୫ ଜଣଙ୍କୁ ମିଳୁଛି ୨୫ କେଜି ଜାଉଳ। ଅର୍ଥାଭାବରୁ ୪ ପିଲାଙ୍କ ମଧ୍ୟରୁ ୩ ପିଲାଙ୍କ ପାଠପଢାରେ ଡୋରି ବନ୍ଧାଯାଇଛି । ପୌରାଞ୍ଚଳର ୧୪ ନମ୍ବର ୱାର୍ଡ ଝାଟିମାଟି କଲୋନି ପରଜାଗୁଡା ବସ୍ତିରେ ରହୁଥିବା ଭୀମ ବାଘଙ୍କ ପରିବାରର ଏ ଅବସ୍ଥା।

ବାର୍ଦ୍ଧକ୍ୟ ଅବସ୍ଥାରେ ଉପନୀତ ଭୀମ। ମୂଲ ଲାଗିଲେ ପରିବାର ଚଳୁଛି। ପରିବାର କହିଲେ ଭିନ୍ନକ୍ଷମ ପୁଅ ସହିତ ୪ ପୁଅଝିଅ, ବୃଦ୍ଧ ପିତା ଏବଂ ଦୁଇ ଭାଇଭଉଣୀ। ୨୦୨୨ ମସିହାରେ କାମ କରୁଥିବା ବେଳେ ଘର ଉପରୁ ତଳକୁ ପଡିଯାଇ ବଡ଼ପୁଅ ଟୁନା(୨୨)ଙ୍କ ଅଣ୍ଟା ଭାଙ୍ଗିଯାଇଥିଲା। ସେବେଠୁ ଦୁଇଟି ଯାକ ଗୋଡ ଅଚଳ ହୋଇଯାଇଛି। ବନ୍ଦ ହୋଇଯାଇଛି ତାଙ୍କ ପାଠପଢା । କେବଳ ହୁଇଲ ଚେୟାର ହିଁ ତାଙ୍କ ସାହା ଭରସା ପାଲଟିଛି। ସାନ ପୁଅ ମୁନା (୧୯) ଓ ଝିଅ ରାନୁ (୧୭) ଅର୍ଥ ଅଭାବରୁ ଉଚ୍ଚଶିକ୍ଷାରୁ ବଞ୍ଚିତ ହୋଇ ଘରେ ରହିଛନ୍ତି। ସାନ ଝିଅ ଲାଡୁଲି (୯) କୁମୁଟିଗୁଡା ଉଚ୍ଚପ୍ରାଥମିକ ବିଦ୍ୟାଳୟର ତୃତୀୟ ଶ୍ରେଣୀରେ ପଢୁଛି।

ଟୁନାଙ୍କୁ ସରକାରୀ ସହାୟତା ଭାବରେ ଭିନ୍ନକ୍ଷମ ଭତ୍ତା ବାବଦରେ ମାସକୁ ୧୨୦୦ ଟଙ୍କା ଏବଂ ହୁଇଲ୍ ଚେୟାରଟିଏ ମିଳିଛି। ପରିବାରରେ ୯ ଜଣ ସଦସ୍ୟ ରହୁଥିବା ବେଳେ ମିଳୁଛି ମାତ୍ର ୨୫ କେଜି ଚାଉଳ। ଜମିବାଡ଼ି ବୋଲି କିଛି ନାହିଁ। ପରଘରେ ମୂଲ ଲାଗି ପରିବାର ଚଳାଉଛନ୍ତି ଭୀମ I ମୁଣ୍ଡ ଗୁଞ୍ଜିବାକୁ ଭଲ ଘରଟିଏ ବି ନାହିଁ। ବର୍ଷାପବନ ହେଲେ ଛାତି ଥରିଯାଉଛି। ଭଙ୍ଗା ଝାଟିମାଟିର ପଲିଥୁନ କୁଡ଼ିଆ ଭିତରକୁ ପାଣି ପଶିଯାଊଛି। ଦଦରା ଘରେ ରୋଷେଇଠାରୁ ଆରମ୍ଭକରି ଶୋଇବା, ବସିବା ସବୁକିଛି। ପ୍ରଶାସନ ଏ ଦିଗରେ ତୁରନ୍ତ ଦୃଷ୍ଟିଦେବା ଦରକାର। ଗରିବ ପରିବାରକୁ ପକ୍କା ଘରଟିଏ ସହିତ ଭିନ୍ନକ୍ଷମ ଟୁନାଙ୍କୁ ଅନ୍ତୋଦୟ ଅନ୍ନପୂର୍ଣ୍ଣା ଯୋଜନାରେ ୨୫ କେଜି ଚାଉଳ, ଭିନ୍ନକ୍ଷମ ଭତ୍ତା ୩୫୦୦ ଟଙ୍କାକୁ ବୃଦ୍ଧି କରିବାକୁ ନିବେଦନ କରିଛନ୍ତି ଭୀମ।

---------------

ହିନ୍ଦୁସ୍ଥାନ ସମାଚାର / ଶିବବ୍ରତ