ବାରିପଦା, ୩୦ ଅଗଷ୍ଟ (ହି.ସ.)- ବେଆଇନ ଦେଶୀ ମଦ କାରବାର ରୋକିବାରେ ବାରିପଦା ସଦର ଅବକାରୀ ବିଭାଗକୁ ସଫଳତା ମିଳିଛି। ବିଶ୍ୱସ୍ତ ସୂତ୍ରରୁ ଖବର ପାଇ ଅବକାରୀ ବିଭାଗ ଦ୍ଵାରା ବିଭିନ୍ନ ସ୍ଥାନରେ ଚଢ଼ଉ କରି ୧୨୨୧ ଲିଟର ଦେଶୀ ମଦ ଓ ୯୨୦୦ ଲିଟର ପୋଚ ଜବତ କରାଯାଇଛି।
ସୂଚନା ଅନୁଯାୟୀ, ବେଆଇନ ମଦ କାରବାର ହେଉଥିବା ନେଇ ଅବକାରୀ ବିଭାଗକୁ ବିଶ୍ୱସ୍ତ ସୂତ୍ରରୁ ଖବର ମିଳିଥିଲା। ଏନେଇ ଅବକାରୀ ଅଧିକ୍ଷକ ପ୍ରଶାନ୍ତ କଁହରଙ୍କ ନିର୍ଦ୍ଦେଶ କ୍ରମେ ବାରିପଦା ସଦର ଅବକାରୀ ଥାନା ଟିମ ୬ଟି ସ୍ଥାନରେ ଚଢ଼ଉ କରି ଦେଶୀ ମଦ ଜବତ କରିଛନ୍ତି। ଏହା ସହିତ ୨ଜଣକୁ ଗିରଫ କରିଥିବା ବେଳେ ଅନ୍ୟ ସ୍ଥାନରୁ ଅଭିଯୁକ୍ତ ମାନେ ଫେରାର ହୋଇଥିଲେ। ଗିରଫ ଅଭିଯୁକ୍ତ ଦ୍ୱୟ ହେଲେ ବାରିପଦା ସଦର ଥାନା ଅନ୍ତର୍ଗତ ମହୁଲିଆ ଅଞ୍ଚଳର ଗୋବିନ ସିଂ(୩୭) ଓ ସାରଦାମଣି ଖିଲାର। ଏନେଇ ଅବକାରୀ ବିଭାଗ ପକ୍ଷରୁ ମାମଲା ରୁଜୁ କରି ଉଭୟଙ୍କୁ କୋର୍ଟ ଚାଲାଣ କରାଯାଇଛି। ଚଢ଼ଉ ସମୟରେ ବାରିପଦା ସଦର ଅବକାରୀ ଥାନା ଇନ୍ସପେକ୍ଟର ସ୍ୱପ୍ନାରାଣୀ ସାହୁଙ୍କ ନେତୃତ୍ୱରେ ଅବକାରୀ ଥାନା ଏବଂ ପୁଲିସ ଥାନା କର୍ମଚାରୀ ମାନେ ଉପସ୍ଥିତ ଥିଲେ।
ହିନ୍ଦୁସ୍ଥାନ ସମାଚାର / ଦିଲ୍ଲୀପ
