ସମ୍ବଲପୁର, ୩୦ ଅଗଷ୍ଟ (ହି.ସ.) ସମ୍ବଲପୁର ଜିଲ୍ଲା ଜମନକିରା ବ୍ଲକ ଅନ୍ତର୍ଗତ ସୁବର୍ଣ୍ଣପାଲି ପଞ୍ଚାୟତ ସ୍ଥିତ ଘୋଡାବାନ୍ଧୁଣୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଜନୈକ ଚତୁର୍ଥ ଶ୍ରେଣୀର ଛାତ୍ରକୁ ବିଦ୍ୟାଳୟର ପ୍ରଧାନଶିକ୍ଷକ ସମୀର ବାରିକ ମାଡ଼ ମାରିବା ଘଟଣାକୁ ନେଇ ଦିନକୁ ଦିନ ପିଡୀତ ଛାତ୍ର ଓ ଅଭିଭାବକଙ୍କୁ ନ୍ୟାୟ ଦେବା ଦାବିରେ ଜନ ଅସନ୍ତୋଷ ବଢିବାରେ ଲାଗିଛି । ପିଡୀତ ଛାତ୍ରକୁ ମାଡ ମାରିଥିବା ଅଭିଯୁକ୍ତ ପ୍ରଧାନ ଶିକ୍ଷକଙ୍କୁ ତୁରନ୍ତ ଅନ୍ୟତ୍ର ବଦଳି କରାଯିବା ପାଇଁ ବିଦ୍ୟାଳୟ ପରିଚାଳନା କମିଟି ଶେଷରେ ଜମନକିରା ବିଇଓଙ୍କୁ ଏକ ଲିଖିତ ଦାବିପତ୍ର ପ୍ରଦାନ କରିଛି । ଏହି ବିବାଦୀୟ ଘଟଣାକୁ ନେଇ ବିଦ୍ୟାଳୟ ପରିଚାଳନା କମିଟି ସଭାପତି ଉପେନ୍ଦ୍ର କୁମୁରାଙ୍କ ତତା୍ୱବଧାନରେ ଗତ ୨୩ ତାରିଖରେ ବିଦ୍ୟାଳୟ ପରିସରରେ ଏକ ବୈଠକ ଅନୁଷ୍ଠିତ ହୋଇଥିଲା । ବୈଠକରେ ପ୍ରଧାନ ଶିକ୍ଷକ ଶ୍ରୀ ବାରିକ୍ ଛାତ୍ରକୁ ମାଡ ମାରିଥିବା ମଧ୍ୟ ସ୍ୱୀକାର କରିଥିଲେ। ଏହି ସ୍ୱୀକାରୋକ୍ତି ପରେ ପରିଚାଳନା କମିଟି ସଦସ୍ୟ, ଅଭିଭାବକ, ଏବଂ ସେଠାରେ ଉପସ୍ଥିତ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇବା ସହ ଅଭିଯୁକ୍ତ ପ୍ରଧାନ ଶିକ୍ଷକଙ୍କୁ ତୁରନ୍ତ ବଦଳି ପାଇଁ ବୈଠକରେ ଏକ ପ୍ରସ୍ତାବ ଗୃହୀତ ମଧ୍ୟ ହୋଇଥିଲା। ଏହି ପରିପେକ୍ଷୀରେ ବିଦ୍ୟାଳୟ ପରିଚାଳନା କମିଟି ସଭାପତି ଉପେନ୍ଦ୍ର କୁମୁରା ଏବଂ ଅନ୍ୟ ସଦସ୍ୟମାନେ ଗତ ଶନିବାର ଜମନକିରା ବ୍ଲକ ଶିକ୍ଷା ଅଧିକାରୀଙ୍କୁ ଲିଖିତ ଭାବେ ଅଭିଯୁକ୍ତ ପ୍ରଧାନ ଶିକ୍ଷଙ୍କ ବଦଳି ପାଇଁ ଦାବି ଜଣାଇଥିଲା। ଅଭିଯୋଗରେ ଅଭିଯୁକ୍ତ ପ୍ରଧାନ ଶିକ୍ଷକ ସମୀର ବାରିକ ଘରୋଇ ଟ୍ୟୁସନରେ ଛାତ୍ରଛାତ୍ରୀଙ୍କ କଥାକଟିକୁ ନେଇ ନିଜ ପୁଅକୁ ସମର୍ଥନ କରି ଚତୁର୍ଥ ଶ୍ରେଣୀର ଆଦିବାସୀ ଛାତ୍ର ଶୋଭିତ ମୁଣ୍ଡାକୁ ଆକ୍ରୋଶମୂଳକ ବିଦ୍ୟାଳୟରେ ବିନା ଦୋଷରେ ମାଡ଼ ମାରିଥିଲେ । ଗୋଟିଏ ବେତରେ ଶୋଭିତଙ୍କ ପିଠି ଓ ହାତକୁ ଆଖିବୁଜା ମାଡ଼ ମାରି ଲହୁଲୁହାଣ କରି ସେଠାରୁ ଚାଲି ଯାଇଥିଲେ। ପରବର୍ତୀ ସମୟରେ ଶ୍ରେଣୀର ସମସ୍ତ ଛାତ୍ରଛାତ୍ରୀ ଏହି ଘଟଣା ସମ୍ପର୍କରେ ବିଦ୍ୟାଳୟର କିଛି ଶିକ୍ଷୟିତ୍ରୀ ମାନଙ୍କୁ ଜଣାଇଥିଲେ। ଶିକ୍ଷୟିତ୍ରୀ ମାନେ ଶୋଭିତଙ୍କୁ ଘଟଣା ସମ୍ପର୍କରେ ପଚାରି ଯେଉଁ ଉତର ପାଇଥିଲେ ସେଥିରେ ପ୍ରଧାନ ଶିକ୍ଷକଙ୍କ ବିରୋଧରେ କୈଣସି ସ୍ୱର ଉତୋଳନ କରିନପାରି ଶୋଭିତଙ୍କ ଅଭିଭାବକଙ୍କୁ ଜଣାଇଥିଲେ । ଏଭଳି ଘଟଣା ଶୁଣିବା ପରେ ଶୋଭିତଙ୍କ ଅଭିଭାବକ ତୁରନ୍ତ ବିଦ୍ୟାଳୟରେ ପହଂଚି ଶୋଭିତକୁ ଘରକୁ ନେଇ ଯାଇଥିଲେ। ଘରେ ପହଂଚି ଶୋଭିତର ପୋଷାକ ଖୋଲିଲା ପରେ ଶୋଭିତଙ୍କ ପିଠି ଓ ହାତ ପ୍ରଧାନ ଶିକ୍ଷକଙ୍କ ଅମାନୁଷିକ ମାଡର ନଗ୍ନଚିତ୍ର ଦେଖି ତୁରନ୍ତ ପରିବାର ଲୋକେ ବିଦ୍ୟାଳୟ ପରିଚାଳନା କମିଟି ନିକଟରେ ଏ ସମ୍ପର୍କରେ ଦୃଷ୍ଟି ଆକର୍ଷଣ କରାଇବା ପରେ ଡାକ୍ତରଖାନାରେ ଶୋଭିତର ପ୍ରାଥମିକ ଚିକିତ୍ସା କରାଇଥିଲେ। ସୂଚନାଯୋଗ୍ୟ ଅଭିଯୁକ୍ତ ପ୍ରଧାନ ଶିକ୍ଷକ ସମୀର ବାରିକ ଛାତ୍ର ଛାତ୍ରୀଙ୍କ ପ୍ରତି ଅସୈ।ଜନ୍ୟ ଓ ଆକ୍ରୋଶ ମୂଳକ ଦୃଷ୍ଟି ରଖୁଥିବା ନେଇ ତାଙ୍କ ବିରୋଧରେ ଗତ ଜାନୁଆରୀ ୬ ତାରିଖରେ ପ୍ରସ୍ତାବ ନମ୍ବର ୪୮ ଓ ଗତ ଜୁଲାଇ ୩୧ ତାରିଖରେ ପ୍ରସ୍ତାବ ନମ୍ବର ୩୫ ଅଭିଯୋଗ ରହିଥିବା ବେଳେ ପ୍ରସ୍ତାବ ୫୩ ରେ ସ୍କୁଲ ବିଦ୍ୟାର୍ଥୀ ସହାୟକ ନିଃଶୁଳ ନମ୍ବରରେ ମଧ୍ୟ ଅଭିଯୋଗ କରାଯାଇଛି । ଏଣୁ ଗୋଷ୍ଠୀ ଶିକ୍ଷା ଅଧିକାରୀ ଯଥାଶୀଘ୍ର ଅଭିଯୁକ୍ତ ପ୍ରଧାନ ଶିକ୍ଷକ ସମୀର ବାରିକଙ୍କୁ ଅନ୍ୟତ୍ର ବଦଳି କରିବାକୁ କମିଟି ଏବେ ଦୃଢ ଦାବି କରିଛି। ଏ ସମ୍ପର୍କରେ ଜମନକିରା ବିଇଓ ରୁକ୍ମଣ ପଧାନଙ୍କୁ ପଚାରିବାରୁ କମିଟି ପକ୍ଷରୁ ରିଜିଓଲେସନ ସହିତ ଏକ ଦାବିପତ୍ର ପ୍ରଦାନ କରିଛନ୍ତି ଏବଂ ସୋମବାର ଦିନ ଏକ ଟିମ୍ ବିଦ୍ୟାଳୟକୁ ଯାଇ ଘଟଣାର ଯାଂଚ କରି ବିହିତ ପଦକ୍ଷେପ ନେବେ ବୋଲି ନିଜ ପ୍ରତିକ୍ରିୟାରେ କହିଛନ୍ତି।
ହିନ୍ଦୁସ୍ଥାନ ସମାଚାର / ଶୈଳେଶ
