କେନ୍ଦୁଝର, ୩୦ ଅଗଷ୍ଟ (ହି.ସ.)- କେନ୍ଦୁଝରଗଡ ପୌରପାଳିକାର ସ୍ବାୟତ୍ତ ଶାସନ ଦିବସ ପାଳନ ଅବସରରେ ନଗର ଭବନଠାରେ
ଚକ୍ଷୁ ପରୀକ୍ଷା ଓ ମୋତିଆବିନ୍ଦୁ ଚିହ୍ନଟ ଶିବିର ଅନୁଷ୍ଠିତ ହୋଇଯାଇଛି । କେନ୍ଦୁଝର ଡେଭଲପମେଣ୍ଟ ଟ୍ରଷ୍ଟ, ଭୂମିକା ଚକ୍ଷୁ ଚିକିତ୍ସାଳୟ ଓ କେନ୍ଦୁଝରଗଡ ପୌରପାଳିକାର ମିଳିତ ସହଯୋଗରେ ବିଶାଳ ଚକ୍ଷୁ ପରୀକ୍ଷା ଶିବିରକୁ ପୌରାଧ୍ୟକ୍ଷା ନିକୁ ସାହୁ, ଉପାଧ୍ଯକ୍ଷ ବରଦା ପ୍ରସନ୍ନ ଦାସ ଓ ସମାଜସେବୀ ଭକ୍ତବତ୍ସଳ ମହାନ୍ତି ଉଦଘାଟନ କରିଥିଲେ । ଭୂମିକାର ଜୋନାଲ ମ୍ୟାନେଜର କର୍ଣ୍ଣାଟ କିଶୋର ଜେନାଙ୍କ ମାର୍ଗଦର୍ଶନରେ ହସ୍ପିଟାଲ ମ୍ୟାନେଜର ରଣଜିତ କୁମାର ପଣ୍ଡା, ଅପଟମ ସୟନ ସୁନ୍ଦର ମାଇତି, ସ୍ବାସ୍ଥ୍ୟସେବିକା ଅନିତା ରାଉଳ, ଭବସ୍ମିତା ପାତ୍ର, ଜସମିନ ମହାରଣା, ପୂଜାରାଣୀ ମହାନ୍ତି, ସୁପରିଟେଣ୍ଡେଣ୍ଟ ଡାକ୍ତର ପ୍ରଦିପ କୁମାର ବାରିକ ଚକ୍ଷୁ ପରୀକ୍ଷା କରିଥିଲେ । ପୌରପାଳିକାର ୨୧ଗୋଟି ୱାର୍ଡ ଅନ୍ତର୍ଗତ ୮୨ଟି ବସ୍ତିରୁ ୨୮୪ ଜଣ ବ୍ୟକ୍ତିଙ୍କର ଚକ୍ଷୁ ପରୀକ୍ଷା କରାଯାଇ ପ୍ରାଥମିକ ସେବା ଯୋଗାଇ ଦିଆଯାଇଛି । ସମସ୍ତ ରୋଗୀଙ୍କୁ କେନ୍ଦୁଝର ଡେଭଲପମେଣ୍ଟ ଟ୍ରଷ୍ଟ ତରଫରୁ ମାଗଣା ଔଷଧ ବଂଟନ କରାଯାଇଛି । ୫୫ ଜଣ ବରିଷ୍ଠ ନାଗରିକଙ୍କୁ ପରୀକ୍ଷା କରାଯାଇ ଚାଳିଶା ଚଷମା ବଂଟନ କରାଯାଇଛି । ଶିବିରରେ ୨୨ ଜଣ ମୋତିଆ ବିନ୍ଦୁ ଚିହ୍ନଟ କରାଯାଇ ଅସ୍ତୁ ଉପଚାର ପାଇଁ ମନୋନୀତ କରାଯାଇଛି ।
ଭୁମିକା ଚକ୍ଷୁ ଚିକିତ୍ସାଳୟର ବରିଷ୍ଠ କର୍ମୀ ବଳରାମ ମଲ୍ଲିକ, କ୍ଷେତ୍ରୀୟ ସଂଗଠକ ହିମାଂଶୁ କୁମାର ପାତ୍ର, ମଣ୍ଟୁ ନାୟକ,ସମସ୍ତ କାଉନସିଲର, ସ୍ବଚ୍ଛସାଥି, ସୁପରଭାଇଜର ଉପସ୍ଥିତ ରହି ଚକ୍ଷୁ ଶିବିର ପରିଚାଳନା କରିଥିଲେ । ଟ୍ରଷ୍ଟର ଅଧ୍ଯକ୍ଷା ଅଧୂବକ୍ତା ଜଗଜିତା ଦାସ ଅନ୍ଧତ୍ୱମୁକ୍ତ ଅଭିଯାନ ଜାରି ରହିବ ବୋଲି ଜଣାଇଛନ୍ତି ।
ହିନ୍ଦୁସ୍ଥାନ ସମାଚାର / SANTOSH KUMAR MOHAPATRA
