ଜୟପୁର, ୩୦ ଅଗଷ୍ଟ (ହି.ସ.) - ଦୁର୍ଦ୍ଧାନ୍ତ ଅପରାଧି ଆକାଶ ମହୁରିଆଙ୍କ ମୃତ୍ୟୁ ମାମଲାରେ ଗତକାଲି କ୍ରାଇମବ୍ରାଂଚ ପୁଲିସ ପୂର୍ବତନ ଏସଆଇ ଶିବ ଶଙ୍କର ସାହୁକୁ ଗିରଫ କରି କୋର୍ଟ ଚାଲାଣ କରିଛି। ଗତକାଲି କ୍ରାଇମବ୍ରାଂଚ ପୁଲିସ ଶିବ ଶଙ୍କର ସାହୁଙ୍କୁ କଳାହାଣ୍ତି ଜିଲ୍ଲାର ଏକ ଗଣେଷ ପୂଜା ବଜାରରେ ବୁଲୁଥିବା ସମୟରେ ଗିରଫ କରିଥିଲା। ଗିରଫ କରି ଗତକାଲି ସକାଳୁ ଜୟପୁର ଆଣିବା ପରେ ସନ୍ଧ୍ୟାରେ ମାଜିଷ୍ଟ୍ରେଟଙ୍କ ନିକଟରେ ହାଜର କରିବା ପରେ ଜୟପୁର କାରାଗାରକୁ ପଠାଇ ଦିଆଯାଇଛି।
ପ୍ରକାଶ ଥାଉକି ଗତ ୨୦୧୭ ମସିହାରେ ବିଭିନ୍ନ ଅପରାଧିକ ମାମଲାରେ ଜଡିତ ଥିବା ଅଭିଯୁକ୍ତ ଆକାଶ ମହୁରିଆକୁ ପୁଲିସ ଗୋଡାଉଥିବା ସମୟରେ ଗାଡିରୁ ପଡି ମୃତ୍ୟୁ ବରଣ କରିଥିବା ନେଇ ଟାଉନଥାନାରେ କେସ ହେବା ପରେ ଆକାଶ ମହୁରିଆଙ୍କ ଭଉଣି ହ୍ୟୁମାନ ରାଇଟସରେ ଅଭିଯୋଗ କରିଥିଲେ। ଅଭିଯୋଗ ପରେ କ୍ରାଇମ ବ୍ରାଂଚ ପୁଲିସ ଏକ ମାମଲା ରୁଜୁ କରି ପୂର୍ବତନ ଟାଉନଥାନା ଅଧିକାରୀ ତପନ ରଥ, ଏସଆଇ ଶିବ ଶଙ୍କର ସାହୁ, ଏସଆଇ ବଳିଆର ସିପ୍ସ ଓ ଏସଡିପିଓ ରାଜେନ୍ଦ୍ର ସେନାପତିଙ୍କ ନାରେ ମାମଲା ରୁଜୁ କରିଥିଲା। ଏହି ଘଟଣାରେ ତଦନ୍ତକାରି ଅଧିକାରୀ ଭାବେ ଶିବ ଶଙ୍କର ସାହୁ ଥିବା ଯୋଗୁଁ ତାଙ୍କ ନାରେ ଚାର୍ଜ ସିଟ ଦାଖଲ ହୋଇଥିଲା। ସେହି ଦିନଠାରୁ ଶିବ ସାହୁଙ୍କୁ ଚାକିରିରୁ ନିଲମ୍ବନ କରାଯାଇଥିଲା। ଗତକାଲି ତାଙ୍କୁ କ୍ରାଇମବ୍ରାଂଚ ପୁଲିସ ଗିରଫ କରି କୋର୍ଟ ଚାଲାଣ କରିଥିବା ଜଣା ପଡିଛି।
ହିନ୍ଦୁସ୍ଥାନ ସମାଚାର / ପିକେପି
