ନୂଆଦିଲ୍ଲୀ, 1 ସେପ୍ଟେମ୍ବର (ହି.ସ.)- ପ୍ରଧାନମନ୍ତ୍ରୀ
ନରେନ୍ଦ୍ର ମୋଦି ଚୀନର ତିଆଞ୍ଜିନ୍ରେ ଶଂଘାଇ ସହଯୋଗ ସଂଗଠନ ଶିଖର ସମ୍ମିଳନୀରେ ଅବସରରେ ସୋମବାର
ଦିନ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ସହିତ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି । ଉଭୟ
ନେତା ୟୁକ୍ରେନ୍ ସଂଘର୍ଷ ସମେତ ବିଶ୍ୱ ସ୍ତରୀୟ ମୁଦ୍ଦାଗୁଡ଼ିକୁ ନେଇ ଆଲୋଚନା କରିଥିଲେ ଏବଂ
ଭାରତ-ରୁଷ ମଧ୍ୟରେ ସାଂଘିକତାକୁ ଆହୁରି ଶକ୍ତିଶାଳୀ କରିବା ଉପରେ ଜୋର ଦେଇଥିଲେ।
ବୈଠକରେ ପ୍ରଧାନମନ୍ତ୍ରୀ
ମୋଦି ରାଷ୍ଟ୍ରପତି ପୁଟିନଙ୍କ ସମ୍ମୁଖରେ ୟୁକ୍ରେନ୍ ସଂଘର୍ଷ ଶୀଘ୍ର ଶେଷ କରିବାର ଆବଶ୍ୟକତା ଥିବା
କଥା ଉଠାଇଥିଲେ।
ବିଦେଶ ମନ୍ତ୍ରଣାଳୟ ଅନୁସାରେ,
ଉଭୟ ନେତା ଅର୍ଥନୈତିକ,
ଆର୍ଥିକ ଓ ଶକ୍ତି କ୍ଷେତ୍ର ସହିତ ଅନେକ ଦ୍ୱିପାକ୍ଷିକ ସହଯୋଗ ବିଷୟରେ ଆଲୋଚନା କରିଥିଲେ ଓ
ଏହି କ୍ଷେତ୍ରଗୁଡ଼ିକରେ ଦ୍ୱିପାକ୍ଷିକ
ସମ୍ପର୍କରେ ନିରନ୍ତର ବୃଦ୍ଧି ଉପରେ ସନ୍ତୋଷ ପ୍ରକାଶ କରିଥିଲେ। ପ୍ରଧାନମନ୍ତ୍ରୀ ମୋଦି ୟୁକ୍ରେନ୍ ସଂଘର୍ଷର ସମାଧାନ ପାଇଁ ନିକଟରେ ଗ୍ରହଣ କରାଯାଇଥିବା
ପ୍ରୟାସଗୁଡିକ ଉପରେ ନିଜ ସମର୍ଥନ ପୁନର୍ବ୍ୟକ୍ତ କରିଥିଲେ ଏବଂ ଏହି ସଂଘର୍ଷକୁ ଶୀଘ୍ର ଶେଷ କରି
ସ୍ଥାୟୀ ଶାନ୍ତି ଉପାୟ ଖୋଜିବା ଆବଶ୍ୟକତା ଉପରେ ଜୋର ଦେଇଥିଲେ।
ମୋଦି ଓ ପୁଟିନ୍ ଉଭୟ ଦେଶ
ମଧ୍ୟରେ ବିଶେଷ ଓ ବିଶେଷାଧିକୃତ ରଣନୀତିଗତ ସାଂଘିକତାକୁ ଆହୁରି ଶକ୍ତିଶାଳୀ କରିବା ପାଇଁ ନିଜ ସମର୍ଥନ
ଜଣାଇଥିଲେ । ପ୍ରଧାନମନ୍ତ୍ରୀ ମୋଦି ରାଷ୍ଟ୍ରପତି ପୁଟିନଙ୍କୁ କହିଥିଲେ ଯେ ସେ ଏହି ବର୍ଷ ଶେଷରେ
ଭାରତରେ ହେବାକୁ ଯାଉଥିବା 23ତମ ବାର୍ଷିକ ଶିଖର ସମ୍ମିଳନୀ ପାଇଁ ତାଙ୍କ ସ୍ୱାଗତ କରିବାକୁ ଅତ୍ୟନ୍ତ ଆଗ୍ରହୀ।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା