ଭବାନୀପାଟଣା; 14ଜାନୁୟାରୀ (ହିଁ. ସ)
ଶିଶୁ ଅଧିକାର ସୁରକ୍ଷା ଓ ବାଲ୍ୟବିବାହ ପ୍ରତିରୋଧ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ରୂପେ ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗର ମାନନୀୟା ଅଧ୍ୟକ୍ଷା ବବିତା ପାତ୍ର ଓ ମାନନୀୟ ସଦସ୍ୟା କଲ୍ପନା ଲେଙ୍କା ଜାନୁଆରୀ ୧୨ ଓ ୧୩ ତାରିଖ ୨୦୨୬ ତାରିଖରେ ଦୁଇ ଦିନିଆ ପରିଦର୍ଶନରେ କଳାହାଣ୍ଡି ଜିଲ୍ଲାକୁ ଆସିଥିଲେ। ପରିଦର୍ଶନର ପ୍ରଥମ ଦିନରେ ମାନନୀୟା ଅଧ୍ୟକ୍ଷା ଭବାନୀପାଟଣା ସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିର, ବ୍ରଜବିହାରରେ “ବନ୍ଦେ ମାତରମ” ସଭା ଉଦ୍ଘାଟନ କରିଥିଲେ। ପରେ ସେ ଭବାନୀପାଟଣା ସହରାଞ୍ଚଳର ୱାର୍ଡ ନମ୍ବର–୯ ଓ ୧୦ ର ଅଙ୍ଗନବାଡ଼ି କେନ୍ଦ୍ରଗୁଡ଼ିକୁ ପରିଦର୍ଶନ କରି ଶିଶୁମାନଙ୍କ ପୋଷଣ ଅବସ୍ଥା ଓ ଓଜନ ନିରୀକ୍ଷଣ ଉପରେ ଗୁରୁତ୍ୱ ଦେଇଥିଲେ। ପରେ ସେ ଜୁନାଗଡ଼ ସ୍ଥିତ ବାଳିକା ଏସଏସଡି ବିଦ୍ୟାଳୟ ଏବଂ କୁଲିହାରୀ ଗ୍ରାମର “ମା ସର୍ବମଙ୍ଗଳା” ଏସଏଚଜି ଛତୁଆ ୟୁନିଟ୍ ପରିଦର୍ଶନ କରିଥିଲେ । ଗୋଲାମୁଣ୍ଡା ବ୍ଲକ୍ରେ ଆୟୋଜିତ ବାଲ୍ ସଭାରେ ଯୋଗଦେଇ ମାନନୀୟା ଅଧ୍ୟକ୍ଷା “୧୦୦ ଦିନର ବାଲ୍ ବିବାହ ମୁକ୍ତ ଅଭିଯାନ” ବିଷୟରେ ବିସ୍ତୃତ ଆଲୋଚନା କରି ଶିଶୁ ଓ କିଶୋର–କିଶୋରୀ ମାନଙ୍କ ସଶକ୍ତିକରଣ ମାଧ୍ୟମରେ ସମାଜ ପରିବର୍ତ୍ତନରେ ଆଦ୍ୱିକା ଗୋଷ୍ଠୀର ଗୁରୁତ୍ୱପୂର୍ଣ୍ଣ ଭୂମିକାକୁ ଉଲ୍ଲେଖ କରିଥିଲେ। ଏହି ଅବସରରେ ଆଦ୍ୱିକା ଗୋଷ୍ଠୀ ସଦସ୍ୟମାନେ ସାମାଜିକ ମାନଚିତ୍ର ମାଧ୍ୟମରେ ଅସୁରକ୍ଷିତ ସ୍ଥାନ ଚିହ୍ନଟ, ସମ୍ପୃକ୍ତ ବିଭାଗ ସହ ସମନ୍ୱୟ ରଖିବା ଓ ବାଲ୍ୟବିବାହ ପ୍ରତିରୋଧରେ ନିଜ ଭୂମିକା ବିଷୟରେ ଉପସ୍ଥାପନା କରିଥିଲେ। ବାଳ୍ ସଭାରେ ବାଲ୍ୟ ବିବାହ ମୁକ୍ତ ଭାରତର ଶପଥ ନେଇ ବିକଶିତ ରାଷ୍ଟ୍ରର ଗଠନରେ ଅଂଶୀଦାର ହେବାପାଇଁ ଉତ୍ସାହିତ କରିଥିଲେ। ପରେ ସେ “ମା ଦୁଆରଶୂନି” କେଁ ଗାଁ ଓ “ମା ସନ୍ତୋଷୀ” କନ୍ଧବାରାଝୋଳା ଛତୁଆ ୟୁନିଟ୍ ପରିଦର୍ଶନ କରି ଥିଲେ । ଭବାନୀପାଟଣା ସ୍ଥିତ ବାଳ୍ ସେବା ନିକେତନ ଏବଂ ନେହେରୁ ସେବା ସଂଘ ଶିଶୁ ଯତ୍ନ ଅନୁଷ୍ଠାନ ପରିଦର୍ଶନ କରି ଶିଶୁମାନଙ୍କ ସହ ଆଲୋଚନା କରିଥିଲେ।
ପରିଦର୍ଶନର ଦ୍ୱିତୀୟ ଦିନରେ ଭବାନୀପାଟଣା ସ୍ଥିତ ସରକାରୀ ବାଳିକା ଉଚ୍ଚବିଦ୍ୟାଳୟରେ ବାଲ୍ୟବିବାହ ମୁକ୍ତ ଅଭିଯାନ ଉପରେ ଏକ ସଚେତନତା ସଭା ଆୟୋଜିତ ହୋଇଥିଲା। ସଭାରେ ବାଲ୍ୟବିବାହର କୁପରିଣାମ, ଏହାର ପ୍ରତିରୋଧ ଓ ଏଥିରେ ବାଳିକାମାନଙ୍କ ସକ୍ରିୟ ଭାଗିଦାରି ଉପରେ ଆଲୋଚନା ହୋଇଥିଲା। ଏହି ଅବସରରେ ବାଲ୍ୟବିବାହ ବିରୋଧରେ ଶପଥ ପାଠ ଓ ହସ୍ତାକ୍ଷର ଅଭିଯାନ ମଧ୍ୟ ଆୟୋଜିତ ହୋଇଥିଲା। ଏହାପରେ ସରକାରୀ ପର୍ଜ୍ୟ ବେକ୍ଷଣ ଏବଂ ସ୍ବତନ୍ତ୍ର ଗୃହ ପରିଦର୍ଶନ କରିଥିଲେ। ପରିଶେଷରେ ଜିଲ୍ଲାପାଳଙ୍କ କାର୍ଯ୍ୟାଳୟ ସ୍ଥିତ ସଦଭାବନା ସଭା ଗୃହରେ ମାନନୀୟା ଅଧ୍ୟକ୍ଷା ଜିଲ୍ଲାସ୍ତରୀୟ ଅଧିକାରୀମାନଙ୍କ ସହ ଏକ ସମୀକ୍ଷ୍ୟା ବୈଠକ କରି ଦୁଇ ଦିନିଆ ପରିଦର୍ଶନ ର ବିବରଣୀ ଉପସ୍ଥାପନ କରିଥିଲେ। ଏହି ବୈଠକରେ ଧର୍ମଗଡ଼ ବିଧାୟକ ସୁଧୀର ରଞ୍ଜନ ପାଟଯୋଷୀ , ଜିଲ୍ଲାପାଳ ପାୱାର ସଚିନ ପ୍ରକାଶ, ଅତିରିକ୍ତ ଜିଲ୍ଲାପାଳ ତନ୍ମୟ କୁମାର ଦରୱାନ୍,ଜିଲ୍ଲା ସମାଜ କଲ୍ଯାଣ ଅଧିକାରୀ. ମୁଜିବୁନ ନିଶା, ଙ୍କ ସମେତ ଜିଲ୍ଲାସ୍ତରୀୟ ଅଧିକାରୀ ପ୍ରମୁଖ ଉପସ୍ଥିତ ଥିଲେ।
ହିନ୍ଦୁସ୍ଥାନ ସମାଚାର / ଜୟକୃଷ୍ଣ
