ନୂଆଦିଲ୍ଲୀ, ୦୧ ଅକ୍ଟୋବର (ହି.ସ.)- କେରଳମ ବିଜେପି ଅଧ୍ୟକ୍ଷ ଏବଂ ବିଧାୟକ ରାଜୀବ ଚନ୍ଦ୍ରଶେଖର ଗୁରୁବାର ବିଜେପି କେନ୍ଦ୍ରୀୟ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀ ସମୟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଉପରେ ତୀବ୍ର ଆକ୍ରମଣ କରିଥିଲେ। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନେଇ ରାହୁଲ ଗାନ୍ଧୀଙ୍କ ମନ୍ତବ୍ୟକୁ ସମାଲୋଚନା କରିବା ସହ ତାଙ୍କ ରାଜନୈତିକ ଶୈଳୀ ଉପରେ ପ୍ରଶ୍ନ ଉଠାଇଥିଲେ।

ଚନ୍ଦ୍ରଶେଖର ଅଭିଯୋଗ କରିଥିଲେ ଯେ ଗତ ୧୨ ବର୍ଷ ମଧ୍ୟରେ ଭାରତୀୟ ଗଣତନ୍ତ୍ରରେ ରାହୁଲ ଗାନ୍ଧୀଙ୍କ ଅବଦାନ ମିଥ୍ୟା, ଭୁଲ ସୂଚନା ଏବଂ ଅରାଜକତା ପ୍ରଚାର କରିବା ପର୍ଯ୍ୟନ୍ତ ସୀମିତ ରହିଛି। ସେ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଇଁ ‘‘ଦେଶଦ୍ରୋହୀ’’ ଭଳି ଶବ୍ଦ ବ୍ୟବହାର କରିବା ରାହୁଲ ଗାନ୍ଧୀଙ୍କ ରାଜନୀତିର ପ୍ରକୃତିକୁ ଦର୍ଶାଏ।

ସେ ରାହୁଲ ଗାନ୍ଧୀଙ୍କ ରାଜନୀତିକୁ ‘‘ଫ୍ରଡ୍’’ ଏବଂ ‘‘ମିଥ୍ୟାର ରାଜନୀତି’’ ବୋଲି ବର୍ଣ୍ଣନା କରି କହିଥିଲେ ଯେ ତାଙ୍କ ପାଖରେ ଦେଶ କିମ୍ବା କେରଳ ପାଇଁ କୌଣସି ସକାରାତ୍ମକ ବାର୍ତା ନାହିଁ। ଚନ୍ଦ୍ରଶେଖର କହିଥିଲେ ଯେ ଏହି କାରଣରୁ ସେ ରାହୁଲ ଗାନ୍ଧୀଙ୍କୁ ‘‘ଫ୍ରଡ୍’’ କହିଛନ୍ତି ଏବଂ ସେ ନିଜ ଏହି ବୟାନରେ ଅଟଳ ଅଛନ୍ତି।

କେରଳରେ ଭୋଟର ତାଲିକାର ସ୍ୱତନ୍ତ୍ର ଗଭୀର ପୁନରୀକ୍ଷଣ (ଏସଆଇଆର)କୁ ନେଇ ମଧ୍ୟ ଚନ୍ଦ୍ରଶେଖର ରାହୁଲ ଗାନ୍ଧୀଙ୍କ ବୟାନ ଉପରେ ପ୍ରଶ୍ନ ଉଠାଇଥିଲେ। ସେ କହିଥିଲେ ଯେ ରାହୁଲ ଗାନ୍ଧୀ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କୁ ‘‘ବିଜେପି ଏଜେଂଟ’ ବୋଲି କହିଛନ୍ତି ଏବଂ ଏସ୍ଆଇଆର ପ୍ରକ୍ରିୟାକୁ ଗଣତନ୍ତ୍ର ବିରୋଧୀ ବୋଲି କହିଛନ୍ତି।

ଚନ୍ଦ୍ରଶେଖର ଦାବି କରିଥିଲେ ଯେ କେରଳର ତତ୍କାଳୀନ ଗୃହମନ୍ତ୍ରୀ ଏବଂ କଂଗ୍ରେସ ନେତା ରମେଶ ଚେନ୍ନିଥଲା ସର୍ବସାଧାରଣରେ ସ୍ୱୀକାର କରିଥିଲେ ଯେ ଏସଆଇଆର ମାଧ୍ୟମରେ ଭୋଟର ତାଲିକାରୁ ଜାଲି ଭୋଟରଙ୍କୁ ହଟାଇବାରେ ସାହାଯ୍ୟ ମିଳିଥିଲା। ସେ କହିଥିଲେ ଯେ ମୁକ୍ତ ଏବଂ ନିରପେକ୍ଷ ନିର୍ବାଚନ ପାଇଁ ଭୋଟର ତାଲିକାର ଶୁଚିତା ଆବଶ୍ୟକ।

ସେ ଜ୍ଞାନେଶ କୁମାରଙ୍କ ପ୍ରସଙ୍ଗରେ କହିଥିଲେ ଯେ କେରଳରେ ଏସଆଇଆର କରାଇଥିବା ମୁଖ୍ୟ ନିର୍ବାଚନ ଅଧିକାରୀ ଆଜି କେରଳର ମୁଖ୍ୟମନ୍ତ୍ରୀଙ୍କ ପ୍ରଧାନ ସଚିବ ଅଛନ୍ତି। ଚନ୍ଦ୍ରଶେଖର କହିଥିଲେ ଯେ ବିଜେପି ଏହା ଆଧାରରେ ସମ୍ପୃକ୍ତ ବ୍ୟକ୍ତିଙ୍କୁ କଂଗ୍ରେସର ଏଜେଂଟ ବୋଲି କହିବ ନାହିଁ, କାରଣ ଗଣତନ୍ତ୍ରରେ କେଉଁ ରାଜନୈତିକ ସୀମା ପାର ହେବା ଉଚିତ ନୁହେଁ ତାହା ବୁଝିବା ଜରୁରୀ।

------------------

---------------

ହିନ୍ଦୁସ୍ଥାନ ସମାଚାର / ଗଗନ