ନୂଆଦିଲ୍ଲୀ, ୧୧ ଅକ୍ଟୋବର (ହି.ସ.)। କକ୍ରୋଚ୍ ଜନତା ପାର୍ଟି (ସିଜେପି)ର ଜାତୀୟ ମୁଖପାତ୍ର ଆଶୁତୋଷ ରାଙ୍କା ଓ ସୌରଭ ଦାସ ରବିବାର ଛାତ୍ର ସଂଗଠନ ଏବଂ ଦେଶର ଯୁବପିଢ଼ିଙ୍କୁ ସମ୍ବିଧାନ ଓ ଗଣତନ୍ତ୍ରର ସୁରକ୍ଷା ପାଇଁ ଶାନ୍ତିପୂର୍ଣ୍ଣ ଭାବେ ରାସ୍ତାକୁ ଓହ୍ଲାଇବା ସହ ପ୍ରତିବାଦ ଜଣାଇବାକୁ ଆହ୍ୱାନ କରିଛନ୍ତି।

ଦିଲ୍ଲୀସ୍ଥିତ ପ୍ରେସ୍ କ୍ଲବ୍ ଅଫ୍ ଇଣ୍ଡିଆରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସିଜେପିର ମୁଖପାତ୍ରମାନେ ଉଦ୍ବୋଧନ ଦେଇ କେନ୍ଦ୍ର ସରକାର ଓ ଦିଲ୍ଲୀ ପୁଲିସ ବିରୋଧରେ ଗଣତନ୍ତ୍ରକୁ ଦମନ କରିବା ଏବଂ ଶାନ୍ତିପୂର୍ଣ୍ଣ ପ୍ରତିବାଦକୁ ଦମନ କରିବା ଭଳି ଗମ୍ଭୀର ଅଭିଯୋଗ ଆଣିଛନ୍ତି। ସେମାନେ କହିଛନ୍ତି ଯେ ଶନିବାରର ପ୍ରତିବାଦ ସମୟରେ ଦିଲ୍ଲୀକୁ ଏକ ସାମରିକ ଛାଉଣିରେ ପରିଣତ କରାଯାଇଥିଲା। ଦେଶରେ ୧୯୭୫ ମସିହା ଭଳି ଏକ ଅଘୋଷିତ ଜରୁରୀକାଳୀନ ପରିସ୍ଥିତି ସୃଷ୍ଟି କରାଯାଇଛି।

ସୌରଭ ଦାସ ଅଭିଯୋଗ କରି କହିଛନ୍ତି ଯେ ଦିଲ୍ଲୀ ବିମାନବନ୍ଦରରେ ଓହ୍ଲାଇବା ମାତ୍ରେ ଦିଲ୍ଲୀ ପୁଲିସ ତାଙ୍କୁ, ଆଶୁତୋଷ ରାଙ୍କା ଓ ଅଭିଜିତ ଦୀପକେଙ୍କୁ କୌଣସି ବୈଧ ଦସ୍ତାବିଜ କିମ୍ବା ଗିରଫ ପରୱାନା ନଥାଇ ଜୋରଜବରଦସ୍ତ ବିମାନରୁ ଓହ୍ଲାଇ ଅଟକ ରଖିଥିଲା। ସେମାନଙ୍କ ମୋବାଇଲ୍ ଫୋନ୍ ଜବତ କରାଯାଇଥିଲା ଏବଂ ଆଇନଗତ ପ୍ରକ୍ରିୟା ଅନୁଯାୟୀ ଆବଶ୍ୟକ ଜବତ ତାଲିକା ମଧ୍ୟ ଦିଆଯାଇନଥିଲା। ଅଟକ ସମୟରେ ସେମାନଙ୍କ ଡିଜିଟାଲ୍ ଉପକରଣରେ ହେରଫେର କିମ୍ବା ତଥ୍ୟ ଜାଣିଶୁଣି ଭର୍ତ୍ତି କରାଯିବାର ଆଶଙ୍କା ରହିଛି ବୋଲି ସେ କହିଛନ୍ତି। ଏହା ବ୍ୟତୀତ ଅଟକ ଅବସ୍ଥାରେ ଓକିଲଙ୍କ ସହ ଯୋଗାଯୋଗ କରିବାର ମୌଳିକ ଅଧିକାରରୁ ମଧ୍ୟ ସେମାନଙ୍କୁ ବଞ୍ଚିତ କରାଯାଇଥିବା ଅଭିଯୋଗ ହୋଇଛି।

ଜାତୀୟ ମାନବାଧିକାର ଆୟୋଗ (ଏନ୍ଏଚ୍ଆର୍ସି) ଓ ନ୍ୟାୟପାଳିକାର ନିରବତା ଉପରେ ପ୍ରଶ୍ନ ଉଠାଇ ଦାସ ଏହି ମାମଲାରେ ଅଦାଲତଗୁଡ଼ିକ ସ୍ୱତଃପ୍ରବୃତ୍ତ ଭାବେ (ସୁଓ ମୋଟୋ) ହସ୍ତକ୍ଷେପ କରିବାକୁ ଦାବି କରିଛନ୍ତି। ମୁଖ୍ୟ ନିର୍ବାଚନ ଆୟୁକ୍ତଙ୍କୁ ସୁରକ୍ଷା ଦେବା ଏବଂ ବ୍ୟବସ୍ଥାଗତ ତ୍ରୁଟିଗୁଡ଼ିକୁ ଲୁଚାଇବା ପାଇଁ ଏହି ସମସ୍ତ କାର୍ଯ୍ୟାନୁଷ୍ଠାନ କରାଯାଉଛି ବୋଲି ସେ କହିଛନ୍ତି। ଦେଶରେ ବ୍ୟାପକ ଭାବେ ଭୋଟରଙ୍କ ଅଧିକାରକୁ, ବିଶେଷକରି ଯୁବ ଓ ଜେନ୍-ଜି ଭୋଟରଙ୍କ ଅଧିକାରକୁ ଅଣଦେଖା କରାଯାଇଛି ବୋଲି ସେ ଦାବି କରିଛନ୍ତି।

ଅନ୍ୟପକ୍ଷରେ, ଆଶୁତୋଷ ରାଙ୍କା କହିଛନ୍ତି ଯେ ଶନିବାର ସୀମାନ୍ତ ଓ ନକ୍ସଲ ପ୍ରଭାବିତ ଅଞ୍ଚଳରୁ ବିଏସ୍ଏଫ୍ ଏବଂ ଅନ୍ୟ କେନ୍ଦ୍ରୀୟ ସୁରକ୍ଷା ବାହିନୀର ଯବାନମାନଙ୍କୁ ଡକାଯାଇ ୪୦ ହଜାରରୁ ଅଧିକ ଯବାନଙ୍କୁ ମୁତୟନ କରାଯାଇଥିଲା। ୫୭ଟି ମେଟ୍ରୋ ଷ୍ଟେସନ୍, ଆନ୍ତଃରାଜ୍ୟ ରେଳ ସେବା ଏବଂ ପ୍ରମୁଖ ରାଜଧାନୀ ଟ୍ରେନ୍ଗୁଡ଼ିକର ଚଳାଚଳ ବାଧାପ୍ରାପ୍ତ ହୋଇଥିଲା। ସାଧାରଣ ନାଗରିକଙ୍କ ଯାତାୟାତ ଓ ବାଣିଜ୍ୟିକ କାର୍ଯ୍ୟକଳାପ ଉପରେ ଅଘୋଷିତ କଟକଣା ଲଗାଇ ଆନ୍ଦୋଳନ ବିରୋଧରେ ପରିବେଶ ସୃଷ୍ଟି କରିବାକୁ ଉଦ୍ୟମ କରାଯାଇଥିଲା ବୋଲି ସେ ଅଭିଯୋଗ କରିଛନ୍ତି।

ଗୁରୁଦ୍ୱାର ବଙ୍ଗଳା ସାହିବରେ ଆଶ୍ରୟ ନେଇଥିବା ପ୍ରତିବାଦକାରୀଙ୍କୁ ବାହାର କରିବା ପାଇଁ ସୁରକ୍ଷା କର୍ମୀମାନେ ଧାର୍ମିକ ମର୍ଯ୍ୟାଦାର ଉଲ୍ଲଂଘନ କରିଥିବା ମଧ୍ୟ ସେ ଅଭିଯୋଗ କରିଛନ୍ତି। ଏଥିସହ ସିଜେପିର ମୁମ୍ବାଇ ସଂଯୋଜକ ପ୍ରଣୟଙ୍କୁ ଅଟକ ରଖାଯାଇଥିବା ସମୟରେ ତାଙ୍କ ପ୍ରତି ନିର୍ମମ ବ୍ୟବହାର ଓ ହିଂସା କରାଯାଇଥିବା ଦାବି ମଧ୍ୟ କରାଯାଇଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା