ନୂଆଦିଲ୍ଲୀ, ୧୧ ଅକ୍ଟୋବର (ହି.ସ.)। ମହାରାଜା ଅଗ୍ରସେନ, ନାନାଜୀ ଦେଶମୁଖ ଏବଂ ଲୋକନାୟକ ଜୟପ୍ରକାଶ ନାରାୟଣଙ୍କ ଜୟନ୍ତୀ ଅବସରରେ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପ୍ରତିରକ୍ଷା ମନ୍ତ୍ରୀଙ୍କ ସମେତ ଅନେକ ନେତା ସେମାନଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି।

ପ୍ରଧାନମନ୍ତ୍ରୀ ମୋଦୀ ‘ଏକ୍ସ’ରେ ଲେଖିଛନ୍ତି, “ଜନସେବା ଓ ସାମାଜିକ ସମରସତାର ଅଗ୍ରଦୂତ ମହାରାଜା ଅଗ୍ରସେନଙ୍କ ଜୀବନ ଏବଂ ତାଙ୍କ ଆଦର୍ଶ ଆମକୁ ନିରନ୍ତର ମାନବତାର ପଥରେ ଚାଲିବାକୁ ପ୍ରେରଣା ଦେଇଥାଏ। ତାଙ୍କ ମହାନ ବିଚାର ଭାରତର ସାଂସ୍କୃତିକ ପୁନରୁତ୍ଥାନ ପାଇଁ ସର୍ବଦା ପ୍ରେରଣାର ଉତ୍ସ ହୋଇ ରହିବ।

“ସେହିପରି ନାନାଜୀ ଦେଶମୁଖଙ୍କୁ ଜଣେ ଅସାଧାରଣ ରାଷ୍ଟ୍ରନିର୍ମାତା ଭାବେ ସ୍ମରଣ କରାଯାଏ। ସେ ନିଜ ବିଚାର ଓ କାର୍ଯ୍ୟ ମାଧ୍ୟମରେ ପ୍ରମାଣ କରିଥିଲେ ଯେ ପ୍ରକୃତ ପରିବର୍ତ୍ତନ ତୃଣମୂଳ ସ୍ତରରୁ ହିଁ ଆରମ୍ଭ ହୋଇଥାଏ। ତାଙ୍କ ଜୀବନରେ ରାଜନୈତିକ ପ୍ରତିବଦ୍ଧତା ଓ ସୃଜନଶୀଳ ସାମାଜିକ କାର୍ଯ୍ୟର ଅନନ୍ୟ ସମନ୍ୱୟ ଦେଖିବାକୁ ମିଳିଥିଲା। ସେ ନିଜକୁ ଗ୍ରାମୀଣ ବିକାଶ ଓ ସାମୁଦାୟିକ ଅଂଶଗ୍ରହଣ ପାଇଁ ସମର୍ପିତ କରିଥିଲେ। ଏକ ସଶକ୍ତ ଓ ଆତ୍ମନିର୍ଭର ଭାରତ ଗଠନ ପାଇଁ ତାଙ୍କ ସ୍ୱପ୍ନକୁ ସାକାର କରିବାରେ ଆମେ କୌଣସି ଅବହେଳା କରିବୁ ନାହିଁ।

“ଲୋକନାୟକ ଜୟପ୍ରକାଶ ନାରାୟଣଙ୍କ ପ୍ରଭାବ ପ୍ରତ୍ୟେକ ପିଢ଼ିର ଲୋକଙ୍କ ଉପରେ ରହିଛି। ସାର୍ବଜନୀନ ଜୀବନ ଦେଶର ନବନିର୍ମାଣର ମାଧ୍ୟମ ହୋଇପାରେ ବୋଲି ସେ ଲୋକଙ୍କ ମନରେ ବିଶ୍ୱାସ ସୃଷ୍ଟି କରିଥିଲେ। ଜରୁରୀକାଳୀନ ପରିସ୍ଥିତି ସମୟରେ ତାଙ୍କର ନିର୍ଭୀକ ସ୍ୱର ମଧ୍ୟ ଉଲ୍ଲେଖନୀୟ ଥିଲା।”

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି ଯେ ରାଷ୍ଟ୍ରଋଷି, ବିଶିଷ୍ଟ ଚିନ୍ତକ, ସମାଜ ସଂସ୍କାରକ ଏବଂ ‘ଗ୍ରାମ ଉଦୟ’ର ପ୍ରବର୍ତ୍ତକ ଭାରତ ରତ୍ନ ନାନାଜୀ ଦେଶମୁଖଙ୍କ ସମଗ୍ର ଜୀବନ ତ୍ୟାଗ, ସେବା ଓ ନିଃସ୍ୱାର୍ଥ କର୍ମଯୋଗର ଏକ ଅନୁକରଣୀୟ ଉଦାହରଣ। ସେ ନିଜର ସମଗ୍ର ଜୀବନ, ଶକ୍ତି ଓ ସମୟକୁ ଗ୍ରାମୀଣ ବିକାଶ, ଗ୍ରାମ ସ୍ୱରାଜ ଏବଂ ଅନ୍ତ୍ୟୋଦୟ ପାଇଁ ସମର୍ପିତ କରିଥିଲେ। ମାନବତା ପ୍ରତି ତାଙ୍କ ସମର୍ପଣ ଓ ରାଷ୍ଟ୍ରନିର୍ମାଣରେ ତାଙ୍କର ଅତୁଳନୀୟ ଅବଦାନ ଆଗାମୀ ପିଢ଼ିକୁ ସର୍ବଦା ପ୍ରେରଣା ଯୋଗାଇବ।

ସେହିପରି ଲୋକନାୟକ ଜୟପ୍ରକାଶ ନାରାୟଣଙ୍କ ଜୀବନ ଗଣତାନ୍ତ୍ରିକ ମୂଲ୍ୟବୋଧ ଏବଂ ଜାତୀୟ ସ୍ୱାର୍ଥ ପ୍ରତି ଅଟଳ ପ୍ରତିବଦ୍ଧତାର ପ୍ରତୀକ। ‘ସମ୍ପୂର୍ଣ୍ଣ କ୍ରାନ୍ତି’ ପାଇଁ ତାଙ୍କର ଆହ୍ୱାନ ରାଜନୀତିରେ ସଚ୍ଚୋଟତା, ଶାସନରେ ଉତ୍ତରଦାୟିତ୍ୱ ଏବଂ ସମାଜରେ ନୈତିକ ନବଜାଗରଣର ସଂକଳ୍ପ ଥିଲା। ଜରୁରୀକାଳୀନ ପରିସ୍ଥିତିର ଅନ୍ଧକାରମୟ ସମୟରେ ସେ ଅଦମ୍ୟ ସାହସର ସହ ଏକଛତ୍ରବାଦର ବିରୋଧ କରିଥିଲେ। ସମ୍ବିଧାନ, ନାଗରିକ ସ୍ୱାଧୀନତା ଏବଂ ଗଣତାନ୍ତ୍ରିକ ଅଧିକାରର ସୁରକ୍ଷା ପାଇଁ ତାଙ୍କ ସଂଘର୍ଷ ଭାରତୀୟ ଇତିହାସରେ ସର୍ବଦା ସ୍ମରଣୀୟ ହୋଇ ରହିବ। ଲୋକନାୟକଙ୍କ ଜୀବନ ଆମକୁ ମନେ ପକାଇଦିଏ ଯେ ନୀତି ଓ ଆଦର୍ଶ କ୍ଷମତାଠାରୁ ବଡ଼ ଏବଂ ଜାତୀୟ ସ୍ୱାର୍ଥ ବ୍ୟକ୍ତିଗତ ଲାଭଠାରୁ ଊର୍ଦ୍ଧ୍ୱରେ।

କେନ୍ଦ୍ରୀୟ ଗୃହ ଓ ସମବାୟ ମନ୍ତ୍ରୀ ଅମିତ ଶାହ କହିଛନ୍ତି ଯେ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆର୍ଏସ୍ଏସ୍)ର ମୂଲ୍ୟବୋଧକୁ ନିଜ ଜୀବନରେ ଆତ୍ମସାତ୍ କରି ନାନାଜୀ ସମାଜର ଶେଷ ଧାଡ଼ିରେ ଥିବା ବ୍ୟକ୍ତିଙ୍କ ଉତ୍ଥାନ, ଗ୍ରାମୀଣ ବିକାଶ ଓ ଆତ୍ମନିର୍ଭରତା ପାଇଁ ନିଜକୁ ସମ୍ପୂର୍ଣ୍ଣ ସମର୍ପିତ କରିଥିଲେ। ସଂଗଠନ ପ୍ରତି ତାଙ୍କର ଅତୁଟ ନିଷ୍ଠା ଏବଂ ରାଷ୍ଟ୍ରନିର୍ମାଣରେ ତାଙ୍କର ଅତୁଳନୀୟ ଅବଦାନ ଯୁବପିଢ଼ି ପାଇଁ ସର୍ବଦା ପ୍ରେରଣାର ଉତ୍ସ ହୋଇ ରହିବ।

ସ୍ୱାଧୀନତା ସଂଗ୍ରାମରେ ଯୁବଶକ୍ତିକୁ ସାମିଲ କରିବାଠାରୁ ଆରମ୍ଭ କରି ଗ୍ରାମୀଣ ଭାରତକୁ ସଶକ୍ତ କରିବା ଏବଂ ସ୍ୱାଧୀନତା ପରେ ‘ସର୍ବୋଦୟ’ର ଲକ୍ଷ୍ୟ ହାସଲ କରିବା ପର୍ଯ୍ୟନ୍ତ ଜୟପ୍ରକାଶ ନାରାୟଣଙ୍କ ସମଗ୍ର ଜୀବନ ଦେଶ ଓ ସମାଜ ପାଇଁ ସମର୍ପିତ ଥିଲା। ଜରୁରୀକାଳୀନ ପରିସ୍ଥିତି ସମୟରେ ତାଙ୍କର ‘ସମ୍ପୂର୍ଣ୍ଣ କ୍ରାନ୍ତି’ ଆହ୍ୱାନ କୋଟି କୋଟି ଦେଶବାସୀଙ୍କ ସ୍ୱର ପାଲଟିଥିଲା। ଦେଶ ଓ ସମାଜ ପ୍ରତି ତାଙ୍କର ସମର୍ପଣ ଭାବ ଆଗାମୀ ପିଢ଼ିକୁ ମାର୍ଗଦର୍ଶନ କରିବ ବୋଲି ଅମିତ ଶାହ କହିଛନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା