ବଲାଙ୍ଗିର, ୧୧ ଅକ୍ଟୋବର (ହି.ସ.)- ଆଜିଠାରୁ ଆରମ୍ଭ ହୋଇଛି ଶାରଦୀୟ ନବରାତ୍ର ପୂଜା। ଏହି ଅବସରରେ ନବରାତ୍ର ପୂଜାର ପ୍ରଥମ ଦିବସରେ ବଲାଙ୍ଗିର ସହର ଅଧିଷ୍ଠାତ୍ରୀ ଦେବୀ ମା ସମଲେଶ୍ବରୀ ଶୈଳପୁତ୍ରୀ ବେଶରେ ଦର୍ଶନ ଦେଇଛନ୍ତି । ଦେବୀଙ୍କୁ ଏହି ବେଶରେ ଦର୍ଶନ ପାଇଁ ସକାଳୁ ମନ୍ଦିରରେ ଭକ୍ତଙ୍କ ପ୍ରବଳ ସମାଗମ ହୋଇଛି। ଆଜିଠାରୁ ଭକ୍ତମାନଙ୍କ ଦ୍ଵାରା ମାନସିକ ଅଖଣ୍ଡ ଦୀପ ପ୍ରଜ୍ବଳନ କରାଯାଇଛି।
ସ୍ଥାନୀୟ ମା ଦୁର୍ଗା ମନ୍ଦିରରେ ମା ଶୈଳପୁତ୍ରୀ ବେଶରେ ଦର୍ଶନ ଦେଉଛନ୍ତି, ମା ପାଟଣେଶ୍ୱରୀ ସମେତ ଅନ୍ୟ ଶକ୍ତିପୀଠ ଗୁଡିକରେ ମଧ୍ୟ ନବରାତ୍ର ପୂଜା ଚାଲିଛି। ଆଜି ଠାରୁ ସହର ଭିତରେ ବିଭିନ୍ନ ଦୁର୍ଗା ମଣ୍ଡପ ଗୁଡ଼ିକରେ ନବ ଦିନାତ୍ମକ ଦୁର୍ଗା ପୂଜା ଆରମ୍ଭ ହୋଇଛି। ବିଭିନ୍ନ ଶକ୍ତି ପୀଠ ଗୁଡ଼ିକରେ ପୂଜା ପାଇଁ ସ୍ଵତନ୍ତ୍ର ବ୍ୟବସ୍ଥା ହୋଇଛି। ନବରାତ୍ରୀ ପୂଜାର ପ୍ରଥମ ଦିବସରେ ମା' ନବଦୁର୍ଗାଙ୍କ ପ୍ରଥମ ସ୍ୱରୂପ 'ଦେବୀ ଶୈଳପୁତ୍ରୀ' ଭାବେ ଭକ୍ତଙ୍କୁ ଦର୍ଶନ ଦେଇଥାନ୍ତି। ଶକ୍ତିପୀଠରେ ମା' ସମଲେଶ୍ୱରୀଙ୍କ ଶୈଳପୁତ୍ରୀ ବେଶ (ଶୈଳପୁତ୍ରୀ ରୂପ) ଅନୁଷ୍ଠିତ ହୋଇଥାଏ। ମହାଳୟାର ସୁପ୍ରସିଦ୍ଧ ଧବଳମୁଖୀ ବେଶ ସମାପ୍ତ ହେବା ପରେ, ମା'ଙ୍କୁ ଶୁଭ୍ର କିମ୍ବା ଆକର୍ଷଣୀୟ ବସ୍ତ୍ର ଓ ଅଳଙ୍କାରରେ ସଜ୍ଜିତ କରାଯାଏ, ଯାହା ପବିତ୍ରତା, ଶାନ୍ତି ଓ ସରଳତାର ପ୍ରତୀକ ଅଟେ।
ହିନ୍ଦୁ ଶାସ୍ତ୍ର ଅନୁଯାୟୀ, ହିମାଳୟଙ୍କ କନ୍ୟା ହୋଇଥିବାରୁ ତାଙ୍କୁ 'ଶୈଳପୁତ୍ରୀ' କୁହାଯାଏ। ମା'ଙ୍କ ଏହି ରୂପରେ ଗୋଟିଏ ହାତରେ ତ୍ରିଶୂଳ ଏବଂ ଅନ୍ୟ ହାତରେ ପଦ୍ମଫୁଲ ଶୋଭା ପାଇଥାଏ। ନବରାତ୍ରୀର ପ୍ରଥମ ଦିନରେ ମା' ସମଲେଶ୍ୱରୀଙ୍କ ଏହି ଦିବ୍ୟ ରୂପ ଦର୍ଶନ କଲେ ମନସ୍କାମନା ପୂର୍ଣ୍ଣ ହେବା ସହ ଆଧ୍ୟାତ୍ମିକ ଶକ୍ତି ଓ ମାନସିକ ଶାନ୍ତି ପ୍ରାପ୍ତି ହୋଇଥାଏ ବୋଲି ବିଶ୍ୱାସ ରହିଛି।
ନବରାତ୍ରୀର ଆଗାମୀ ଦିନଗୁଡ଼ିକରେ ମା' ସମଲେଶ୍ୱରୀ କ୍ରମାନ୍ୱୟରେ ବ୍ରହ୍ମଚାରିଣୀ, ଚନ୍ଦ୍ରଘଣ୍ଟା, କୁଷ୍ମାଣ୍ଡା, ସ୍କନ୍ଦମାତା, କାତ୍ୟାୟନୀ, କାଳରାତ୍ରୀ, ମହାଗୌରୀ ଏବଂ ଶେଷରେ ରାଜରାଜେଶ୍ୱରୀ ବେଶରେ ଭକ୍ତମାନଙ୍କୁ ଦର୍ଶନ ଦେଇଥାନ୍ତି।
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
