କୋଲକାତା, ୧୨ ଅକ୍ଟୋବର (ହି.ସ.) ମାର୍କ୍ସବାଦୀ କମ୍ୟୁନିଷ୍ଟ ପାର୍ଟି (ମାକପା)ର ବରିଷ୍ଠ ନେତା ଏବଂ ପ୍ରସିଦ୍ଧ ଆଇନଜୀବୀ ବିକାଶ ରଞ୍ଜନ ଭଟ୍ଟାଚାର୍ଯ୍ୟଙ୍କୁ କୋଲକାତା ପୁଲିସ ଦୁଇଟି ଅଲଗା ଥାନାରେ ହାଜର ହେବା ପାଇଁ ନୋଟିସ ଜାରି କରିଛି। ଗରଫା ଏବଂ କସବା ଥାନା ପକ୍ଷରୁ ତାଙ୍କୁ ୧୩ ଏବଂ ୧୪ ଅକ୍ଟୋବରରେ ଥାନାରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି। ପୁଲିସର ଏହି ନୋଟିସକୁ ନେଇ ସୋମବାର ସକାଳେ ତାଙ୍କ ପ୍ରତିକ୍ରିୟା ଜାଣିବା ପାଇଁ ଯୋଗାଯୋଗ କରାଯିବାରୁ ତାଙ୍କ ପକ୍ଷରୁ କୌଣସି ମନ୍ତବ୍ୟ ମିଳିପାରିନଥିଲା।

ଏହି ସମ୍ପୂର୍ଣ୍ଣ ଘଟଣାକ୍ରମ ଇଏମ୍ ବାଇପାସ୍ ନିକଟରେ ଥିବା ପୂର୍ବଲୋକ ଅଂଚଳରେ ମାକପା ନେତାଙ୍କ ବାସଭବନ ଉପରେ ନିକଟରେ ହୋଇଥିବା ଆକ୍ରମଣ ପରେ ସାମ୍ନାକୁ ଆସିଛି। ଅଭିଯୋଗ ଅନୁଯାୟୀ, ଗତ ସପ୍ତାହରେ ସକାଳ ସମୟରେ କିଛି ଅଜ୍ଞାତ ଯୁବକ ନିଜ ମୁହଁ ଏବଂ ବାଇକ୍ର ନମ୍ବର ପ୍ଲେଟ୍କୁ କଳା କପଡ଼ାରେ ଢାଙ୍କି ତାଙ୍କ ଘର ସାମ୍ନାରେ ପହଂଚିଥିଲେ ଏବଂ ବାସଭବନ ଉପରକୁ ପଥର ଫିଙ୍ଗି ଝରକାର କାଚ ଭାଙ୍ଗି ଦେଇଥିଲେ। ଏହି ଘଟଣା ପରେ ବିକାଶ ରଞ୍ଜନ ଭଟ୍ଟାଚାର୍ଯ୍ୟ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ପ୍ରକାଶ କରି ଦାବି କରିଥିଲେ ଯେ ଏହି ସୁଚିନ୍ତିତ ଆକ୍ରମଣ ପଛରେ ହିନ୍ଦୁତ୍ୱବାଦୀ ଉପଦ୍ରବୀ' ସାମିଲ ଅଛନ୍ତି।

ମାକପା ନେତାଙ୍କ ଏହି ବୟାନ ଉପରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ କଡ଼ା ଆପତି ପ୍ରକାଶ କରିଥିଲେ। ମୁଖ୍ୟମନ୍ତ୍ରୀ ସ୍ପଷ୍ଟ ଶବ୍ଦରେ କହିଥିଲେ ଯେ ରାଜ୍ୟରେ ଆଇନ-ଶୃଙ୍ଖଳା ବିଗାଡ଼ିବା କିମ୍ବା ଅରାଜକତା ସୃଷ୍ଟି କରିବାକୁ କାହାକୁ ଅନୁମତି ଦିଆଯିବ ନାହିଁ। ସେ କହିଥିଲେ ଯେ ପୁଲିସ ଏହି ମାମଲାରେ ସମ୍ପୃକ୍ତ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି, କିନ୍ତୁ ଏହା ସତ୍ୱେ ନିଜର ଭେରିଫାଏଡ୍ ସୋସିଆଲ ମିଡିଆ ହ୍ୟାଣ୍ଡେଲରେ ସମଗ୍ର ହିନ୍ଦୁ ସମ୍ପ୍ରଦାୟକୁ ଟାର୍ଗେଟ୍ କରି ଏଭଳି ଅଭିଯୋଗ ଲଗାଇବା ଅତ୍ୟନ୍ତ ଆପତିଜନକ।

ମୁଖ୍ୟମନ୍ତ୍ରୀ ଚେତାବନୀ ଦେଇଥିଲେ ଯେ ଏଭଳି ଅପପ୍ରଚାରକୁ ଅଣଦେଖା କରାଯିବ ନାହିଁ ଏବଂ ଏପରି ମାମଲାରେ ସରକାରଙ୍କ ପକ୍ଷରୁ କଠୋର ଆଇନଗତ କାର୍ଯ୍ୟାନୁଷ୍ଠାନ ନିଆଯିବ।

ଏହା ପରେ ହିଁ ପୁଲିସ ତାଙ୍କୁ ନୋଟିସ ପଠାଇ ପଚରାଉଚରା ପାଇଁ ହାଜର ହେବାକୁ କହିଛି।

-------------------

ହିନ୍ଦୁସ୍ଥାନ ସମାଚାର / ଗଗନ