ଗାଙ୍ଗଟକ, ୧୨ ଅକ୍ଟୋବର (ହି.ସ.)। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାର୍ବଜନୀନ ସେବାରେ ୨୫ ବର୍ଷ ପୂରଣ କରିଥିବା ଅବସରରେ ସିକ୍କିମ୍ ମୁଖ୍ୟମନ୍ତ୍ରୀ ପ୍ରେମ ସିଂହ ତମାଙ୍ଗ ଏକ ସ୍ୱତନ୍ତ୍ର କ୍ୟାବିନେଟ୍ ବୈଠକ ଆୟୋଜନ କରି ତାଙ୍କୁ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି।

ମୁଖ୍ୟମନ୍ତ୍ରୀ ତମାଙ୍ଗ ସୋମବାର ସୋସିଆଲ୍ ମିଡିଆ ମାଧ୍ୟମରେ କହିଛନ୍ତି ଯେ, ୨୦୦୧ ଅକ୍ଟୋବର ୭ ତାରିଖରେ ଗୁଜରାଟର ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ସହ ଆରମ୍ଭ ହୋଇଥିବା ପ୍ରଧାନମନ୍ତ୍ରୀ ମୋଦୀଙ୍କ ସାର୍ବଜନୀନ ସେବା ଯାତ୍ରାର ୨୫ ବର୍ଷ ପୂର୍ତ୍ତିର ଐତିହାସିକ ଅବସରରେ ସୋମବାର ସକାଳେ ଏକ ସ୍ୱତନ୍ତ୍ର କ୍ୟାବିନେଟ୍ ବୈଠକ ଆୟୋଜନ କରାଯାଇଥିଲା।

ମୁଖ୍ୟମନ୍ତ୍ରୀ ମନ୍ତ୍ରିପରିଷଦର ସଦସ୍ୟମାନଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱ ଯାତ୍ରାର ପ୍ରଶଂସା କରିବା ସହ ରାଷ୍ଟ୍ର ନିର୍ମାଣ, ସମାବେଶୀ ବିକାଶ, ସୁଶାସନ ଏବଂ ଏକ ସମୃଦ୍ଧ, ଆତ୍ମନିର୍ଭରଶୀଳ ଓ ବିଶ୍ୱରେ ସମ୍ମାନିତ ଭାରତ ଗଠନ ପାଇଁ ତାଙ୍କ ଦୃଷ୍ଟିକୋଣ ପ୍ରତି ସମ୍ମାନ ଜଣାଇଥିଲେ। ସେ କହିଥିଲେ ଯେ, ସାର୍ବଜନୀନ ସେବାରେ ୨୫ ବର୍ଷ ପୂରଣ କରିବା ଜନସାଧାରଣଙ୍କ ଆକାଂକ୍ଷା ପ୍ରତି ତାଙ୍କର ପ୍ରତିବଦ୍ଧତା ଏବଂ ଆହ୍ୱାନଗୁଡ଼ିକୁ ଜାତୀୟ ପ୍ରଗତିର ସୁଯୋଗରେ ପରିଣତ କରିବା ପାଇଁ ତାଙ୍କ ସଂକଳ୍ପର ପ୍ରମାଣ।

କ୍ୟାବିନେଟ୍ ପକ୍ଷରୁ ପ୍ରଧାନମନ୍ତ୍ରୀ ମୋଦୀଙ୍କ ମୂଳମନ୍ତ୍ର ‘ସବ୍କା ସାଥ୍, ସବ୍କା ବିକାଶ, ସବ୍କା ବିଶ୍ୱାସ, ସବ୍କା ପ୍ରୟାସ’ର ବିଶେଷ ପ୍ରଶଂସା କରାଯାଇଥିଲା। ମୁଖ୍ୟମନ୍ତ୍ରୀଙ୍କ ଅନୁଯାୟୀ, ଏହି ମୂଳମନ୍ତ୍ର ସାମୂହିକ ଭାଗୀଦାରି, ସମାବେଶୀ ବିକାଶ, ଜନସାଧାରଣଙ୍କ ବିଶ୍ୱାସ ଏବଂ ସାମୂହିକ ଦାୟିତ୍ୱବୋଧର ନୀତିକୁ ଅନ୍ତର୍ଭୁକ୍ତ କରେ। ସେହିପରି ‘ଏକ ଭାରତ, ଶ୍ରେଷ୍ଠ ଭାରତ’ର ଧାରଣା ଜାତୀୟ ଏକତା, ସାଂସ୍କୃତିକ ସଦ୍ଭାବ ଏବଂ ଏକୀକରଣକୁ ଅଧିକ ସୁଦୃଢ଼ କରିଛି। ଭାରତର ବିବିଧତା ହିଁ ଦେଶର ସବୁଠାରୁ ବଡ଼ ଶକ୍ତି ବୋଲି ସେ କହିଥିଲେ।

ଉତ୍ତର-ପୂର୍ବ ଭାରତର ବିକାଶ ପ୍ରତି ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣକୁ ମଧ୍ୟ କ୍ୟାବିନେଟ୍ ପ୍ରଶଂସା କରିଥିଲା। ମୁଖ୍ୟମନ୍ତ୍ରୀ କହିଥିଲେ ଯେ, ଉତ୍ତର-ପୂର୍ବାଞ୍ଚଳ ବିକାଶ, ଯୋଗାଯୋଗ ବ୍ୟବସ୍ଥା, ନିବେଶ, ପର୍ଯ୍ୟଟନ ଏବଂ ଆଞ୍ଚଳିକ ସହଯୋଗର ଏକ ପ୍ରମୁଖ କେନ୍ଦ୍ର ଭାବେ ଉଭା ହେଉଛି। ଉତ୍ତର-ପୂର୍ବର ଆଠଟି ରାଜ୍ୟକୁ ଭାରତର ‘ଅଷ୍ଟଲକ୍ଷ୍ମୀ’ ଭାବେ ବର୍ଣ୍ଣନା କରିବା ପଛରେ ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣ ଏହି ଅଞ୍ଚଳର ସମୃଦ୍ଧ ସାଂସ୍କୃତିକ ଐତିହ୍ୟ, ପ୍ରାକୃତିକ ସୌନ୍ଦର୍ଯ୍ୟ, ରଣନୈତିକ ଗୁରୁତ୍ୱ ଏବଂ ଆର୍ଥିକ ସମ୍ଭାବନାକୁ ପ୍ରତିଫଳିତ କରୁଛି।

ମୁଖ୍ୟମନ୍ତ୍ରୀ ତମାଙ୍ଗ ସିକ୍କିମ୍ ସରକାରଙ୍କ ପକ୍ଷରୁ ରାଜ୍ୟର ବିକାଶ ଓ ଜନକଲ୍ୟାଣ ପାଇଁ ପ୍ରଧାନମନ୍ତ୍ରୀ ମୋଦୀ ଯୋଗାଇ ଆସୁଥିବା ସହଯୋଗ, ପ୍ରୋତ୍ସାହନ ଏବଂ ନିରନ୍ତର ପ୍ରତିବଦ୍ଧତା ପାଇଁ ଗଭୀର କୃତଜ୍ଞତା ପ୍ରକାଶ କରିଥିଲେ। ସିକ୍କିମ୍ର ୫୦ତମ ରାଜ୍ୟ ପ୍ରତିଷ୍ଠା ଦିବସ ସମାରୋହର ଉଦ୍ଯାପନୀ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ଉପସ୍ଥିତି ରାଜ୍ୟବାସୀଙ୍କ ପାଇଁ ଏକ ସୌଭାଗ୍ୟର ବିଷୟ ଥିଲା ବୋଲି ସେ କହିଥିଲେ। ଏଥିସହ ପ୍ରଧାନମନ୍ତ୍ରୀଙ୍କ ସ୍ନେହ ଓ ସହଯୋଗ ପାଇଁ ସେ ହୃଦୟରୁ ଧନ୍ୟବାଦ ଜଣାଇଥିଲେ।

କୋଭିଡ୍-୧୯ ମହାମାରୀ, ବିନାଶକାରୀ ତିସ୍ତା ବନ୍ୟା, ଭୂମିକମ୍ପ, ଭୂସ୍ଖଳନ ଏବଂ ଅନ୍ୟାନ୍ୟ ସଙ୍କଟପୂର୍ଣ୍ଣ ପରିସ୍ଥିତି ସମୟରେ ପ୍ରଧାନମନ୍ତ୍ରୀଙ୍କ ଦ୍ୱାରା ଯୋଗାଇ ଦିଆଯାଇଥିବା ସହଯୋଗକୁ ମୁଖ୍ୟମନ୍ତ୍ରୀ ସ୍ମରଣ କରିଥିଲେ। ଏଥିପାଇଁ ସିକ୍କିମ୍ ସରକାର ସର୍ବଦା କୃତଜ୍ଞ ରହିବେ ବୋଲି ସେ କହିଥିଲେ। ପ୍ରଧାନମନ୍ତ୍ରୀଙ୍କ ନେତୃତ୍ୱ ଓ ଦୃଷ୍ଟିକୋଣ ସିକ୍କିମ୍ରେ ସ୍ଥାୟୀ ବିକାଶ, ଯୋଗାଯୋଗ ବ୍ୟବସ୍ଥାର ଉନ୍ନତି, ପର୍ଯ୍ୟଟନର ପ୍ରୋତ୍ସାହନ, ପରିବେଶ ସୁରକ୍ଷା, ସ୍ୱାସ୍ଥ୍ୟସେବା, ଶିକ୍ଷା ଏବଂ ଲୋକଙ୍କ ଜୀବିକାର ସୁଯୋଗ ବୃଦ୍ଧି ପାଇଁ ରାଜ୍ୟର ଆକାଂକ୍ଷାକୁ ଶକ୍ତି ପ୍ରଦାନ କରିଛି ବୋଲି ସେ ଉଲ୍ଲେଖ କରିଥିଲେ।

ପ୍ରଧାନମନ୍ତ୍ରୀଙ୍କ ନେତୃତ୍ୱ ଓ ଦୃଷ୍ଟିକୋଣକୁ ପ୍ରଶଂସା କରି କ୍ୟାବିନେଟ୍ କହିଥିଲା ଯେ, ତାଙ୍କ ନେତୃତ୍ୱ ରାଜ୍ୟଗୁଡ଼ିକୁ ନିଜସ୍ୱ ସ୍ୱତନ୍ତ୍ର ପରିଚୟ, ସାଂସ୍କୃତିକ ଐତିହ୍ୟ ଏବଂ ପରିବେଶଗତ ସମ୍ପଦର ସୁରକ୍ଷା କରିବା ସହ ଜାତୀୟ ବିକାଶରେ ସକ୍ରିୟ ଯୋଗଦାନ ଦେବା ପାଇଁ ନିରନ୍ତର ପ୍ରୋତ୍ସାହିତ କରିଆସିଛି। ସିକ୍କିମ୍ ଭଳି ହିମାଳୟୀ ରାଜ୍ୟ ପାଇଁ ଏହି ଦୃଷ୍ଟିକୋଣ ବିଶେଷ ଗୁରୁତ୍ୱପୂର୍ଣ୍ଣ। କାରଣ, ବିକାଶ ସହିତ ପରିବେଶର ସ୍ଥିରତା, ବିପର୍ଯ୍ୟୟର ମୁକାବିଲା କରିବାର କ୍ଷମତା ଏବଂ ସ୍ଥାନୀୟ ସମୁଦାୟର କଲ୍ୟାଣକୁ ମଧ୍ୟ ସମାନ ଗୁରୁତ୍ୱ ଦିଆଯିବା ଆବଶ୍ୟକ ବୋଲି ମୁଖ୍ୟମନ୍ତ୍ରୀ କହିଥିଲେ।

କ୍ୟାବିନେଟ୍ ବୈଠକରେ ୨୦୪୭ ସୁଦ୍ଧା ବିକଶିତ ଭାରତ ଗଠନର ସାମୂହିକ ଲକ୍ଷ୍ୟକୁ ଆଗକୁ ବଢ଼ାଇବା ପାଇଁ ଭାରତ ସରକାରଙ୍କ ସହ ଘନିଷ୍ଠ ସହଯୋଗ ଜାରି ରଖିବାକୁ ପ୍ରତିବଦ୍ଧତା ପୁନର୍ବ୍ୟକ୍ତ କରାଯାଇଥିଲା। ଏଥିସହ ଏକ ସମୃଦ୍ଧ, ପ୍ରଗତିଶୀଳ ଓ ଆତ୍ମନିର୍ଭରଶୀଳ ସିକ୍କିମ୍ ଗଠନ ପାଇଁ ରାଜ୍ୟର ନିଜସ୍ୱ ଆକାଂକ୍ଷାକୁ ଆଗକୁ ନେବା ପାଇଁ ମଧ୍ୟ ପ୍ରତିବଦ୍ଧତା ପ୍ରକାଶ କରାଯାଇଥିଲା।

ପ୍ରଧାନମନ୍ତ୍ରୀଙ୍କ ନିରନ୍ତର ମାର୍ଗଦର୍ଶନରେ ଉତ୍ତର-ପୂର୍ବାଞ୍ଚଳ ଭାରତର ବିକାଶ ଓ ପରିବର୍ତ୍ତନର ପ୍ରମୁଖ ବାହକ ଭାବେ ଆହୁରି ସୁଦୃଢ଼ ହେବ ବୋଲି କ୍ୟାବିନେଟ୍ ଆଶା ପ୍ରକାଶ କରିଥିଲା। ଏହି ଐତିହାସିକ ଅବସରରେ ମନ୍ତ୍ରିପରିଷଦର ସଦସ୍ୟମାନେ ପ୍ରଧାନମନ୍ତ୍ରୀ ମୋଦୀଙ୍କୁ ଶୁଭେଚ୍ଛା ଜଣାଇବା ସହ ତାଙ୍କ ନେତୃତ୍ୱ, ରାଷ୍ଟ୍ର ପ୍ରତି ସମର୍ପଣ ଏବଂ ଭାରତର ବିକାଶ ଯାତ୍ରାରେ ତାଙ୍କର ଦୀର୍ଘସ୍ଥାୟୀ ଅବଦାନ ପାଇଁ ଗଭୀର କୃତଜ୍ଞତା ପ୍ରକାଶ କରିଥିଲେ।

ମୁଖ୍ୟମନ୍ତ୍ରୀ ତମାଙ୍ଗ କହିଥିଲେ ଯେ, ସାର୍ବଜନୀନ ସେବାରେ ୨୫ ବର୍ଷ ପୂରଣ କରିବା କେବଳ ଏକ ବ୍ୟକ୍ତିଗତ ଉପଲବ୍ଧି ନୁହେଁ; ଏହା ନେତୃତ୍ୱ, ଜନସେବା ପ୍ରତି ପ୍ରତିବଦ୍ଧତା ଏବଂ ଜାତୀୟ ପରିବର୍ତ୍ତନର ଏକ ଉଲ୍ଲେଖନୀୟ ଯାତ୍ରାକୁ ସମ୍ମାନ ଜଣାଇବାର ଅବସର। ଏହି ଯାତ୍ରା ଲକ୍ଷ ଲକ୍ଷ ଲୋକଙ୍କୁ ପ୍ରେରଣା ଯୋଗାଉଛି ଏବଂ ଏକ ସୁଦୃଢ଼, ସମାବେଶୀ ଓ ସମୃଦ୍ଧ ଭାରତ ଗଠନ ପାଇଁ ସାମୂହିକ ସଂକଳ୍ପକୁ ଆହୁରି ମଜବୁତ କରୁଛି ବୋଲି ସେ କହିଥିଲେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା