ବୌଦ୍ଧ, ୧୨ ଅକ୍ଟୋବର (ହି.ସ.)- ଅଗ୍ରୱାଲ ସମାଜର ସଂସ୍ଥାପକ ଶ୍ରୀଅଗ୍ରସେନ ମହାରାଜଙ୍କ ଜୟନ୍ତୀ ମହୋତ୍ସବ ବୌଦ୍ଧ ଟାଉନହଲ ଠାରେ ମହାସମାରୋହରେ ରବିବାର ରାତିରେ ପାଳିତ ହୋଇଛି । ମାରୱାଡି ଯୁବା ମଞ୍ଚ, ମାରୱାଡି ମହିଳା ସମିତି ଓ ମାରୱାଡି ସୋସାଇଟି ଦ୍ୱାରା ଅପରାହ୍ନରେ ବୌଦ୍ଧ ରଘୁନାଥ ମନ୍ଦିର ଠାରୁ ମହାରାଜ ଶ୍ରୀଅଗ୍ରେସନଙ୍କ ସୁସଜ୍ଜିତ ରଥ ସହ ଏକ ଶୋଭାଯାତ୍ରା ନାମ ସଂକୀର୍ତନ ସହ ବାହାରି ସହର ପରିକ୍ରମା କରିବା ପରେ ଟାଉନହଲ ଠାରେ ପହଂଚିଥିଲା ।

ଏହି ଅବସରରେ ଅଗ୍ରସେନ ଭବନ ସମ୍ମୁଖରେ ସ୍ଥାପିତ ଶ୍ରୀଅଗ୍ରସେନ ମହାରାଜଙ୍କ ପ୍ରତିମୂର୍ତିରେ ମାଲ୍ୟାର୍ପଣ କରାଯାଇ ପୂଜା ଓ ଆଳତି କରାଯାଇଥିଲା l

ମାରୱାଡି ସୋସାଇଟିର ସଭାପତି ମଙ୍ଗତୁଲାଲ ଅଗ୍ରୱାଲଙ୍କ ଅଧ୍ୟକ୍ଷତାରେ ଏକ ସାଧାରଣସଭା ଆୟୋଜିତ ହୋଇଥିଲା । ସଭାରେ ଆରକ୍ଷୀ ଅଧିକ୍ଷକ କୁଲଦୀପ ମୀନା ମୁଖ୍ୟ ଅତିଥି ଭାବେ ଓ ଡୁଙ୍ଗୁରିପାଲିର ବରିଷ୍ଠ ସାମ୍ବାଦିକ କିସନ କୁମାର ଅଗ୍ରୱାଲ ମୁଖ୍ୟ ବକ୍ତା ଭାବେ ଯୋଗ ଦେଇଥିଲେ l ସମାଜସେବା କ୍ଷେତ୍ରରେ ଅଗ୍ରୱାଲ ସମାଜର ଅବଦାନ ଯୁଗ ଯୁଗରୁ ରହିଆସିଛି ବୋଲି ଉଲ୍ଲେଖ କରିବା ସହ ମହାରାଜ ଶ୍ରୀଅଗ୍ରେସନଙ୍କ ସିଦ୍ଧାନ୍ତ ଏବଂ ଆଦର୍ଶ ସଂପର୍କରେ ଅତିଥିମାନେ ଆଲୋଚନା କରିଥିଲେ । ମୁଖ୍ୟ ଅତିଥି ମାରୱାଡି ସମାଜର ବରିଷ୍ଠ ନାଗରିକ ମାନଙ୍କୁ ମାନପତ୍ର, ଉପଢୌକନ ଦେଇ ଦେଇ ସମ୍ମାନିତ କରିଥିଲେ l ସଭାରେ ଅନ୍ୟମାନଙ୍କ ମଧ୍ୟରେ ସହ ସଂପାଦକ ମନିଶ କୁମାର ଅଗ୍ରୱାଲ, ଯୁବ ମଂଚ ସଭାପତି ଆଶିଷ କୁମାର ଗର୍ଗ, ମହିଳା ସମିତି ସଭାନେତ୍ରୀ ଶ୍ରୀମତୀ ପ୍ରେମଲତା ଅଗ୍ରୱାଲ ମଂଚାସିନ ଥିଲେ ।

ପୂର୍ବରୁ ଆୟୋଜିତ ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀମାନଙ୍କୁ ପୁରସ୍କାର ବଂଟନ କରାଯାଇଥିଲା । ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ପ୍ରଦର୍ଶିତ ହୋଇଥିଲା । କେତନ କୁମାର ଅଗ୍ରୱାଲ, ସୁରଜ କୁମାର ଅଗ୍ରୱାଲ, ଅଭିଷେକ କୁମାର ଅଗ୍ରୱାଲ, ମୋହିତ କୁମାର ଅଗ୍ରୱାଲଙ୍କ ସମତେ ଅନ୍ୟମାନେ ମଞ୍ଚ ଓ କାର୍ଯ୍ୟକ୍ରମ ପରିଚାଳନା କରିଥିଲେ l ବୌଦ୍ଧ ସହର ସମେତ ଜିଲାର ଅନ୍ୟାନ୍ୟ ଅଂଚଳରୁ ଏବଂ ପଡୋଶୀ ଜିଲାର ଶତାଧିକ ପରିବାର କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ l

ହିନ୍ଦୁସ୍ଥାନ ସମାଚାର / ସମ୍ପତ